Connect with us

تازه خبرونه

خلیلزاد له طالبانو سره د سولې هوکړې لاسوند ولسمشر غني ته ښودلی دی- وحید عمر

خپور شوی

د

(Last Updated On: لړم ۳, ۱۴۰۱)

د ولسمشر د عامه اړیکو او ستراتیژۍ په چارو کې ځانګړي سلاکار وحید عمر په خپل یوه تویت کې څرګنده کړې، چې د افغانستان د سولې ځانګړي استازي خلیلزاد د امریکایانو او طالبانو د سولې هوکړې لاسوند ولسمشر غني ته ښودلی دی.

د سولې د دغې طرحې له مخې؛ طالبان ډاډ او تضمین ورکوی، چې د افغانستان خاوره به د امریکا او د هغه د متحدانو پر ضد ونه کارول شي.

د افغانستان د سولې لپاره د امریکا ځانګړی استازی تېر ماښام ( یکشنبه د وږي ۱۰) د دوحې د نهم پړاو خبرو له پای ته رسیدو وروسته کابل ته راورسید ، چې د دغو خبرو بشپړ جزئیات د افغانستان حکومت ته وړاندې کړي.  

دوحې ته د آریانا نیوز لیږل شوي خبریال زمریالي اباسین ته د طالبانو د مرکچي پلاوي غړي او ویاند سهیل شاهین ویلي، چې دلته له امریکایي پلاوي سره پر وروستي تخنیکي ټکي خبرې روانې دي.

دغه راز ښاغلي شاهین کابل ته د زلمي خلیلزاد د سفر په اړه ویلي، چې د سولې هوکړه وروستۍ ده؛ خو پر وروستي تخنیکي اړخ یې د خلیلزاد له پلاوي سره دلته خبرې روانې دي، چې هیله ده په دې اړه هم ښه پایله ولرو.

دغه راز سهیل شاهین د خلیلزاد د سفر او له حکومتي چارواکو سره د هغه د لیدنې په اړه ویلي، چې هوکړه وروستۍ شوې او د نوموړي لیدنې به پرې کوم اغېز ونلري او د هوکړې ارزښت به پخپل ځای وي.    

حکومت څرګنده کړې، چې خلیلزاد د حکومت مشرانو ته د سولې خبرو د وروستیو پایلو په اړه جزئیات ورکړي دي.

کابل ته د افغانستان د سولې د ځانګړي استازي زلمي خلیلزاد د سفر په اړه د ولسمشرۍ ویاند صدیق صدیقي د دوشنبې پر ورځ( د وږي ۱۱) یوې خبري ناستې ته څرګند شو او د سولې هڅې یې د حکومت لومړیتوب وګاڼه او دغه راز یې په کندوز او بغلان کې د طالبانو د تحمیلي جګړې پر ضد د افغان ځواکونو سرښندنې وستایلې.

نوموړي څرګنده کړه، چې ښاغلي خلیلزاد د طالبانو او امریکایانو د هوکړې لاسوند ولسمشر غني ته وړاندې کړی او حکومت به د هوکړه لیک جزئیات وګوري او بیا به خپل اند خلیلزاد ته څرګند کړي.

هغه دغه راز ویلي، چې د افغانستان حکومت د هوکړه لیک جزئیات سیاسي مشرانو ته هم وړاندې کوي او د هغو ملاحظات به هم په نظر کې ونیول شي.

ښاغلي صدیقي د خبریالانو د پوښتنې په ځواب کې په ډاګه کړې، چې اوربند او مستقیمې خبرې د افغانستان حکومت ته د هوکړې غوره برخې دي.

هغه د ولسمشریزو ټاکنو د تر سره کیدو په اړه هم څرګنده کړه، چې ولسمشریزې ټاکنې به پخپل وخت ترسره شي او امریکا د افغانستان له ولسمشریزو ټاکنو رسمي ماتړ کوي.

ښاغلي خلیلزاد په دې سفر کې له ولسمشر اشرف غني، عبدالله عبدالله، پخواني ولسمشر او یو شمېر نورو افغان سیاسي مشرانو سره هم بېلابېل وکتل.

د یادونې وړ ده، چې د امریکا او طالبانو استازیو د قطر د دوحې په نهم پړاو خبرو کې یوولس ورځې د سولې هوکړه لیک پر موضوعاتو خبرې اترې کړې دي.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!