تازه خبرونه
په لوګر کې طالبانو د پولیسو یوه پوسته نیولې

د لوګر د ولایتي شورا مشر حسیب ستانکزي آریانانیوز ته ویلي؛ تېره شپه وسلوالو طالبانو د بره کي برک ولسوالۍ د پولیسو پر سنګ مرمر نومې پوسته ډله ییز برید کړی، چې د یادې پوستې ۵ پولیس وژلي او ۴ نور یې له ځان سره ژوندي بیولي.
ستانکزي زیاته کړې، چې د مرکز پل عالم اړوند نور سیمو کې هم وسلوالو طالبانو تېره شپه بریدونه کړي، چې دواړو لوریو ته ځاني زیانونه اوښتي؛ خو کره شمېر یې تر دې دمه څرګند شوی ندی.
د لوګر والي ویاند دیدار لونګ څرګنده کړې؛ تېره شپه طالب وسلوالو د برکي برک ولسوالۍ اړوند د سنګ مرمر سيمې پر امنيتي پوستې بريد کړى، چې د افغان ځواکونو په ځوابي ډزو کې ۷ طالب وسلوال وژل شوي.
د نوموړي د څرګندونو له مخې؛ د دغې نښتې پر مهال څلور تنه پوليس هم وژل شوي او د دوښمن دا ادعا ، چې پوستې سقوط کړى حقيقت نلري.
هغه دا هم ویلي، چې د جګړې له پای ته رسیدو وروسته د طالب وسلوالو جسدونه هم په سيمه کې پاتې دي.
د یو بل خبر له مخې؛ د لوګر د جمع کلا په اړوند سیمه کې ۱۲ طالب وسلوالو ته مرګ ژوبله اوښتې ده.
د لوګر والي ویاند دیدار لونګ ویلي؛ تېره شپه طالب وسلوالو د لوګر ولایت مرکز اړوند په جمعه کلا سیمه کې د ملي امنیتي ځواکونو پر پوستو د برید پلان درلود؛ خو ملي امنیتي او دفاعي ځواکونو د هوایي ځواک پر ملتیا د دغو بریدونو مخنیوی کړی دی.
د لوګر ولایت د رسنیو مرکز په ډاګه کړې، چې له جګړې وروسته ۱۱ وسلوال طالبان د يو طالب قومندان قاري زبير په ګډون وژل شوي او یو يې ټپي دى.
د سرچینې د څرګندونو له مخې؛ افغان ځواکونو يو میل پیکا او يو میل کلاشینکوف ترې تر لاسه کړي او يو شمېر وسلې او مهمات يې په بشپړ ډول له منځه وړي دي.
دا په داسې حال کې ده، چې د والي ویاند دیدار لونګ د دې ولایت د ولایتي شورا د مشر ستانکزي هغه څرګندونې او د پوستې سقوط رد کړی، چې په برکي برک کې یې د یوې پوستې له سقوط خبر ورکړی و.
د لوګر امنیتي مسوولینو تر اوسه د یادو پېښو په تړاو څه نه دي ویلي؛ خو خلکو د لوګر ولایت پر امنیتي وضعیت بېلابېلې اندېښنې په ډاګه کړي دي.
طالبانو تر دې دمه په دې اړه څه ندي ویلي.
تازه خبرونه
د خراسان داعشیان افغانستان، سیمې او نړۍ ته ګواښ دی – د م.م امنیت شورا
د امریکا، روسیې او پاکستان استازو د داعش خراسان څانګې ګواښونه جدي وبلل او د دوی پر وړاندې یې د مبارزې غوښتنه وکړه.

د ملګرو ملتونو امنیت شورا غړو په یوه ناسته کې د داعش ډلې لخوا رامنځته شوي ګواښونه وڅېړل او د دې ډلې د فعالیتونو او تازه ځواکونو د جذب په اړه یې خپلې اندېښنې څرګندې کړي.
د امریکا، روسیې او پاکستان استازو د داعش خراسان څانګې ګواښونه جدي وبلل او د دوی پر وړاندې یې د مبارزې غوښتنه وکړه.
له ترهګرۍ سره د مبارزې په برخه کې د ملګرو ملتونو د رییس دفتر د امنیت شورا په ناسته کې د خراسان څانګې داعش ډله د افغانستان او نړۍ لپاره یو لوی ګواښ یادکړی دی.
د ملګرو ملتونو ټولنې دې لوړ پوړي چارواکي زیاته کړې، چې افغانستان ته د تروریستي ډلو د سفرونو راپورونه شتون لري.
له ترهګرۍ سره د مبارزې په برخه کې د ملګرو ملتونو د دفتر رییس ولادیمیر ایوانوویچ ورونکوف ویلي: ” د خراسان داعش ډله افغانستان، سیمې او نړۍ ته ګواښونه پېښوي. سربېره پر دې په افغانستان کې دننه حملې، په اروپا کې داعشیان پر تروریستي بریدونو مرتکب شوي او هڅه کوي، چې د مرکزي آسیا څخه نوي کسان جذب کړي. همدا رنګه راپورنه شته، چې بهرنۍ ترهګرې ډلې افغانستان ته سفر کوي.”
د دې ناستې پر دوام امریکا هم په افغانستان او سیمه کې د داعش ډلې پر ځواکمن کېدو اندېښنې ښودلي دي.
د ملګرو ملتونو په امنیت شورا کې د امریکا استازې دوروټی شیا وایي: “هغه ډلې، چې له مرکزي آسیا څخه بهر له داعش سره تړاو لري؛ په ځانګړي توګه د داعش خراسان ډله هم یو نړیوال ګواښ ګڼل کیږي. مونږ په خراسان کې د داعش څانګې د وړتیا په اړه هم اندېښمن یوو، چې پلان جوړونه، بریدونه ترسره کول او همدارنګه د نويو کسانو د استخدام، دغه اندېښنې په ځانګړي ډول افغانستان او پاکستان په تړاو ډېرې شوې دي.”
په دې ناسته کې د پاکستان استازي هم په افغانستان کې د داعش شتون لوړ یاد کړ.
په ملګرو ملتونو کې د پاکستان استازي منیر اکرم ویلي: ” دا مهال په افغانستان کې له ۲۰ څخه زیاتې ترهګرې ډلې فعالې دي او دا هېواد د داعش د تمویل، اسانتیا او تسهیلاتو او د جذب اصلي مرکز ګرځېدلی دی. له همدې کبله، زه غواړم بیا تکرار کړم، چې افغانستان د داعش لپاره د جلب او جذب اصلي مرکز ګرځېدلی او مونږ هغه ادعا ردوو، چې داعش په پاکستان کې پټن ځایونه لري. مونږ همدا اوس له داعش او ټی ټي پي سره په جګړه کې ښکېل یوو.”
د ملګرو ملتونو ر امنیت شورا په ناسته کې د روسیې سفیر ویلي، چې په افغانستان کې د داعش شتون او فعالیت تصادفي ندی. د امریکا هغه وسلې، چې په افغانستان کې پاتې دي د داعش لاس ته لوېدلې دي.
په ملګرو ملتونو کې د روسیې سفیر واسیلی نبنزیا ویلي: ” مونږ نشو کولی، چې په افغانستان کې د داعش فعالیت او حضور نالیدلی ونیسو. دا یو تصادف ندی. ناټو ځواکونو، چې افغانستان په ناڅاپي ډول پرېښود ډېری وسلې یې هلته پرېښودي؛ نو دا وسلې د داعش او نورو ډلو لاس ته لویدلي.”
په ملګرو ملتونو کې د چین استازی فو کانګ وایي: ” ترهګرې ډلې لکه داعش او القاعده اوسمهال په افغانستان کې ډېر فعال دي او له یو بل سره همکاري کوي. دوی غواړي، چې په افغانستان کې امنیتي وضعیت کمزوری کړي، بلکې سیمهییزې او نړیواله سوله او امنیت له خطر سره مخ کړي. د چین حکومت غواړي، چې په افغانستان کې د ټولو ترهګرو ډلو له منځه وړلو لپاره محسوس او پلي کېدونکي اقدامات وکړي.
اسلامي امارت تل ټینګار کړی، چې افغانستان خاوره د هیڅ هېواد لپاره ګواښ ندی او زیاتوي، چې په سیمه کې د دې ډلې فعالیتونه په افغانستان پورې تړاو نلري.
تازه خبرونه
د غزني په ناوه ولسوالۍ کې د اوبو بند جوړولو چارې پیل شوې
د کلیو د بیارغونې او پراختیا وزارت د خبرپاڼې له مخې؛ د دې وزارت چارسمبالي( سرپرست) محمد یونس اخندازاده د دې ولسوالۍ ولسونو ته د وینا پر مهال ويلي: « تاسې هغه خلک ياست، چې تل له مجاهدينو سره اوږه پر اوږه ولاړ وﺉ او اوس مونږ ستاسې په خدمت کې يوو او له خپلو امکاناتو سره سم به ستاسو ستونزو ته رسېدنه کوو.»

د غزني ولایت د ناوه ولسوالۍ په فيضو کلي کې د ۱۹ میلیون افغانیو پر لګښت د اوبو بند د بنسټ ډبره کېښودل شوه.
د کلیو د بیارغونې او پراختیا وزارت د خبرپاڼې له مخې؛ د دې وزارت چارسمبالي( سرپرست) محمد یونس اخندازاده د دې ولسوالۍ ولسونو ته د وینا پر مهال ويلي: « تاسې هغه خلک ياست، چې تل له مجاهدينو سره اوږه پر اوږه ولاړ وﺉ او اوس مونږ ستاسې په خدمت کې يوو او له خپلو امکاناتو سره سم به ستاسو ستونزو ته رسېدنه کوو.»
نوموړي زیاته کړې؛ د دې بند د کار په بهیر کې به «لسګونه کسانو ته د کار زمینه برابره او له بشپړېدو سره به يې د دې کلي د باران اوبه مهار او د ځمکې لاندې اوبو سطحه لوړه وساتل شي.»
ویل کیږي، چې د اوبو دغه بند به ۲۱۰ مټره اوږدوالی، ۶ مټره لوړوالی او د ۳ زره مټر مکعب اوبو زيرمه کولو وړتیا ولري.
تازه خبرونه
په کندوز کې ځانمرګي ۱۲ کسانو ته مرګ او ژوبله واړوله
د امنیه قومندانۍ ویاند جمعهالدین خاکسار زیاته کړې، چې ځانمرګي بریدګر په کندوز ښار کې کابل بانک ته نږدې ځان ته چاودنه ورکړې ده.

د کندوز امنیه قومندانۍ ویاند ویلي، چې نن سهار (سې شنبه د سلواغې درویشتمه) په یوه ځانمرګي برید کې ۵ کسان وژل شوي او ۷ نور ټپیان دي.
د امنیه قومندانۍ ویاند جمعهالدین خاکسار زیاته کړې، چې ځانمرګي بریدګر په کندوز ښار کې کابل بانک ته نږدې ځان ته چاودنه ورکړې ده.
د خاکسار د څرګندونو له مخې؛ د دې پېښې قربانیان سرتېري، د بانک ساتونکي او ملکي وګړي دي.
هغه زیاته کړې؛ د دې پېښې په تړاو څوک نیول شوي ندي؛ خو امنیتي ځواکونه د چاودنې د عاملینو د پېژندلو په لټه کې دي.
تر دې دمه چا یا ډلې د چاودنې مسوولیت ندی منلی.
-
تازه خبرونه3 days ago
افغانستان ته د نغدو پیسو لېږل روان ساتل شوي – د یوه امریکایي سناتور ادعا
-
نړۍ3 days ago
ټرمپ د انټوني بلینکن او جیک سالیوان امنیتي باور لیکونه لغوه کړل
-
تازه خبرونه3 days ago
افغانستان او چین په واخان دهلیز کې پر همکاریو ټینګار وکړ
-
تازه خبرونه3 days ago
یونیسف په افغانستان کې د ۲۱۳ خوارځواکو ماشومانو له درملنې خبر ورکړ
-
تازه خبرونه3 days ago
سعودي عربستان د فلسطینیانو د بې ځایه کېدو په اړه د نتانیاهو څرګندونې وغندلې
-
سیمه ییز خبرونه2 days ago
مصر به د عربي هېوادونو د بېړنۍ سرمشریزې کوربتوب وکړي
-
نړۍ2 days ago
د اوکراین د سولې په خبرو کې پرمختګ شوی – ټرمپ
-
تازه خبرونه2 days ago
پاکستان به له اسلامآباد څخه زرګونه افغان کډوال وباسي