د افغانستان د سولې امریکایي استازي خلیلزاد په خپلو یو لړ تویټونو کې په ډاګه کړې، چې د امریکا حکومت د ارزونې له مخې؛ داعش روانه اوونۍ په افغانستان کې پر یوه زیږنتون او د جنازې پر مراسمو وحشتناکه بریدونه کړي دي.

هغه زیاته کړې، چې داعش پر ولسي خلکو دغه راز شریرو بریدونو ته پرلپسې لیوالتیا ښودلې او دا کار یې نړې او افغانانو ته یو ګواښ دی.

دغه نوموړي دا عش د سولې تړون د دښمن په ټوګه په ګوته کړی او څرګندوي، چې داعش د افغانستان د اسلامي جمهوریت او طالبانو تر منځ د سولې د یوه تړون مخالف دی او هڅه کوي، چې د عراق او سوریې په څېر مذهبي او فرقوي جګړه راوپاروي.

د متحدو ایالتونو حکومت ارزونه کړې چې داعش-خراسان دا اونۍ په افغانستان کې پر یوه زیږنتون او د جنازې پر مراسمو وحشتناکه بریدونه وکړل. داعش پر ولسي خلکو دغه راز شریرو بریدونو ته پرلپسې لیوالتیا ښودلې ده، او افغانانو او نړۍ ته یو ګواښ ده.

— U.S. Special Representative Zalmay Khalilzad (@US4AfghanPeace) May 15, 2020

خلیلزاد د داعش جنګیالیو ځپلو ته په نغوته او اشاره کې څرګنده کړې، چې د داعش په لومه کې د ښکېلیدو او د سولې د ځنډولو یا ورته د خنډونو د جوړولو پر ځای افغانان باید سره راټول شي، چې دغه ګواښ ته ماتې ورکړي او د سولې تاریخي فرصت له لاسه ونوځي؛ ځکه نورې پلمې نشته؛ افغانان او نړۍ د غوره راتلونکې په هیله دي.

په افغانستان کې د امریکا د سولې استازي خلیلزاد له هغې وروسته دا څرګندونې کړي، چې تېره ورځ  وسلوالو طالبانو د پکتیا په مرکز ګردیز کې د پوځ پر پوځي ودانیو د برید مسوولیت ومانه او سرتېرو ته یې  د مرګ و ژوبلې اړولو ادعا وکړه.

دا په داسې حال کې ده، چې ولسمشر غني اوړمه ورځ په کابل، ننګرهار او لغمان ولایتونو کې له بریدونو او چاودنو وروسته د هېواد امنیتي ځواکونو ته د وسلوالو طالبانو پر ضد د فعالې جګړې سپارښتنه کړې؛ خو طالبانو په دې بریدونو کې نه یوازې لاس لرل رد کړي، بلکې غندلي یې هم دي.