د اصلي سندونو د صادرولو او بلونو له ثبتولو څخه د عوایدو راټولولو مرکز جوړ شو

د افغانستان د صنعت او سوداګرۍ وزارت په کابل کې د اصلي سندونو د صادرولو او د بلونو(انوایسونو) د ثبتولو له لارې د عوایدو راټولولو مرکز د جوړولو اعلان وکړ.

د صنعت او سوداګرۍ وزارت چارسمبالي ويلي، پر صنعتي هېواد د افغانستان د بدلولو لپاره خصوصي سکټور او حکومت باید د یو بل ملاتړ وکړي او له اختلافاتو ډډه وکړي.

نورالدین عزیزي دغه راز له پانګوالو، په ځانګړي توګه د تېلو او ګازو له واردونکو څخه غوښتنه کړې، چې له درغلیو ډډه وکړي او که نه اسلامي امارت به یې پر وړاندې اقدام وکړي.

د صنعت او سوداګرۍ وزارت چارسمبالي  نورالدین عزیزي زیاته کړې؛ دا مرکز د خصوصي سوداګرۍ او پانګونې خونې د کمزوري کولو لپاره ندی رامنځته شوی، بلکې دوی غواړي له خصوصي سکټور ملاتړ وکړي او خصوصي سکټور هم له حکومت ملاتړ وکړي؛ ځکه، چې پر صنعتي هېواد د افغانستان د بدلولو لپاره باید ګډې هڅې وشي.

نورالدین عزیزي پر پانګوالو په‌ځانګړي توګه د تېلو او ګاز پر واردونکو غږ کوي، چې درغلي ونکړي، که نه اسلامي امارت به یې پر وړاندې اقدام وکړي.

د صنایع او کانونو خونې او د سوداګرۍ او پانګونې خونې یو شمېر پانګوالو ويلي؛ دوی چمتو دي، چې په بېلابېلو برخو کې له اسلامي امارت ملاتړ وکړي او پانګونې زیاتې کړي.

د ګډونوالو د څرګندونو له مخې؛ دا، چې د عوایدو راټولول ستونزمن شوي، نو باید په لګښت کې یې هم له احتیاط څخه کار واخیستل شي؛ ځکه، چې هېواد باید ورو ورو له دې اقتصادي وضعیت څخه راووځي.