د افغانستان په ختیځ کې د زلزلې له کبله سلګونه کسان مړه او ترې پاتې کسانو ته د مرستو هڅې روانې دي

د یکشنبې پر شپه د افغانستان په ختیځ کې په ځانګړي توګه کونړ او ننګرهار ولایتونو د رښتر پر کچه ۶.۲ درجې زورورې زلزلې ولړزاول، چې له کبله یې له ۶۰۰ ډېر کسان وژل شوي او سلګونه نور ټپیان دي؛ زلزلې د کورونو پراخ ویجاړی او د ځمکې ښویېدنه رامنځته او لرې پرتو کلیو ته یې د تګ راتګ لارې بندې کړي، چې ور سره د ژغورنې عملیات ستونزمن شوي دي.

د ژغورنې ډلې زلزله ځپلو سیمو ته د رسېدو لپاره مبارزه کوي؛ چې خلک اوس هم د کنډوالو لاندې بند پاتې دي. سیمه‌ییز چارواکي خبرداری ورکوي، چې د مړو شمېر ممکن لوړ شي؛ ځکه، چې له زلزلې وروسته ټکانونو دوام درلود او له لرې پرتو ولسوالیو څخه راپورونه راځي.

په افغانستان کې ملګرو ملتونو دا پېښه “ژوره خواشینونکې” بللې او ویلي یې دي، چې د دوی د مرستې ډلو په روغتونونو او روغتیایي مرکزونو کې د بېړنیو مرستو رسولو لپاره ځای پر ځای شوي دي.

د روغتیا نړیوالې ټولنې هم تائید کړې، چې طبي ډلې په روغتونونو او روغتیایي مرکزونو کې ځای پر ځای شوي؛ د ټپیانو درملنه کوي او اړین درمل او تجهیزات وېشي.

اروپايي ټولنې هم په یوه خبرپاڼه کې د افغانستان له خلکو سره پیوستون څرګند کړی او د بشري شریکانو له هڅو ملاتړ کوي، چې بیړنۍ مرستې یې چمتو کړي دي. اروپايي ټولنې له طبیعي پېښو څخه د بیارغونې لپاره د خپلې اوږدمهاله ژمنې ټینګار کړی دی.

په کورني کچه، د افغانستان کرکټ بورډ او ملي لوبغاړو دا پېښه یوه “لویه غمیزه” وبلله او د قربانیانو له کورنیو سره یې خواخوږي څرګنده کړه. د افغانستان کرکټ بورډ پر شتمنو سوداګرو او وګړو غږ کړی، چې د ختیځو ولایتونو په ځانګړي توګه کونړ کې د زیانمنو خلکو سره مرستې ته ورودانګي.

ویل کیږي، چې د بېلابېلو بنسټونو مرستې روانې دي او په اغیزمنو سیمو کې ژوندي پاتې شوي کسان د سرپناه، خوړو او روغتیایي پاملرنې له کمښت سره مخ دي. ډېری کورنۍ تر شنه آسمان لاندې پاتې دي او د زلزلې له وروستیو ټکانونو هم وېره لري. دا په داسې حال کې ده، چې د ژغورنې ډلې د بندو سړکونو د نیولو او لرې پرتو خلکو ته د رسېدو لپاره مبارزه کوي.