Connect with us

تازه خبرونه

د افغانستان په سویل کې د طالبانو مهم قومندانان وژل شوي – دفاع وزارت

خپور شوی

د

(Last Updated On: لړم ۱۷, ۱۳۹۹)

د افغانستان ملي دفاع وزارت نن (شنبه د لړم ۱۷) ویلي، چې په هلمند ولایت کې د طالبانو پر یوې ناستې د افغان ځواکونو په هوایي برید کې د طالبانو د استخباراتو د مشرپه ګډون د دوی ۱۰ غړي وژل شوي دي.

دې وزارت زیاته کړې، چې د هلمند ولایت لپاره د طالبانو نومول شوی والي هم په دې برید کې ټپي شوی دی.

طالبانو تر دې دمه په دې اړه څه ندي ویلي.

دغه راز ملي دفاع وزارت زیاته کړې، چې افغان ځواکونو د کندهار ولایت ارغنداب ولسوالي د وسلوالو طالبانو له شتون پاکه کړې ده.

د کورنیو چارو وزارت ويلي، چې د تېرې یوې اوونۍ په چاڼیزو عملیاتو کې له ۲۰۰ ډېر طالب جنګیالي وژل شوي او لسګونه نور ټپیان دي.

افغان ځواکونو ويلي؛ ولسوالي اوس په بشپړ ډول د افغان ځواکونو په واک کې ده او هغه سیمې، چې د وسلوالو لخوا ونیول شوي وې اوس ترې پاکې شوې دي.

د ملي دفاع وزارت چارواکو ویلي؛ په دې عملیاتو کې، چې د فعال دفاعي حالت په چوکاټ کې او د طالبانو بریدونو په غبرګون کې ترسره شوي دي؛ د دوی لس اعرادې وسایط، د طالبانو زیاته اندازه وسلې او مهمات هم له منځه وړل شوي دي.

دغې ولسوالۍ ته د هغو کورنیو د بېرته راستنېدلو بهیر راپیل شوی، چې د جګړې له وېرې یې خپلې مېنې او د مېوو ډک باغونه پرېيښي وه.

د کندهار والي ویاند احمد بهیر احمدي ویلي؛ په دغه جګړه کې د وسلوالو د مهمو قومندانانو په ګډون له ۴۰۰ ډېر طالبان وژلي دي.

د ملي دفاع وزارت لوی درستیز جنرال محمد یاسین ضیا وايي، د عملیاتو پر مهال افغان ځواکونو وسلوالو ته درنده مرګ ژوبله اړولې، چې شمېر يې تر ۵۰۰ زیات دی.

دده په وینا، چې په وژل شويو وسله والو کې د وسله والو مهم قوماندانان هم شامل دي.

تورنجنرال تادین خان، چي د ارغنداب ولسوالۍ له تصفیې وروسته يې رسنيو ته خبري کولې، دا کار یې د هېواد په ځانګړي ډول د کندهار په داخل کي د یوې خاصي کړۍ یاد کړ، خو په اړه يې نور جزئیات ورنه کړل.

د هېواد د کورنيو چارو وزارت امنيتي مرستيال جنرال عبدالصبور قانع وايي، چې له ارغنداب ولسوالۍ وروسته د پنجوايي او ژېړۍ ولسوالیو د نیول شويو سیمو عملیات روان دي.

هغه وايي، چې وسلوالو طالبانو په کندهار، روزګان او هلمند ولایتونو کې بریدونه د سولې په خبرو کې د امتیاز اخيستو لپاره کړي، خو د هغوئ ټول پلانونه يې شنډ کړي.

د کندهار امنیه قومندان وايي، چې د وسلوالو په لیکو کې په زیات شمېر بهرنيو جنګياليو هم شتون درلود.

دده په وینا، د کندهار امنیتي وضعیت اوس بیرته مخ پر ښه کېدو روان دی او ډېر ژر به پنجوايي او ژېړۍ ولسوالۍ هم د وسله والو له شتون څخه پاکې کړي.

ملي دفاع وزارت په دې عملیاتو کې د افغان ځواکونو د تلفاتو په اړه څه څرګندونې ندي کړي.

طالبانو په اړوند سیمو د امنیتي ځواکونو د پرمختګونو په اړه تر دې دمه څه ندي ویلي.

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

تازه خبرونه

په تېرو ۶ میاشتو کې ۸ زره ۷۴۷ جنايي پېښې ثبت شوي

Published

on

(Last Updated On: وری ۹, ۱۴۰۳)

د کورنیو چارو وزارت ویاند عبدالمتین قانع د پنجشنبې پر ورځ (د وري نهمه) په یوه خبري ناسته کې د ۱۴۰۲ لمریز لېږدیز کال د وروستیو شپږ میاشتو هڅې او پرمختګونه رسنیو ته وړاندې کړل.

د عبدالمتین قانع د څرګندونو له مخې؛ د ۱۴۰۲ کال په تېرو شپږ میاشتو کې ۸ زره ۷۴۷ جنايي پېښې ثبت شوي، چې ۷ زره ۲۳۳ یې کشف او ۱۵ سوه ۲۵ نورې تر څېړنې لاندې دي.

قانع زیاته کړې؛ ۱۲ زره ۵۴۰ کسان د بېلابېلو جنايي جرمونو پر تړاو نیول شوي دي.

نوموړی وایي؛ په دې موده کې ۲۱ انسان تښتوونکي وژل شوي، ۱۸ کسان یې له منګولو ازاد شوي او ۱۷۲ د انسان تښتونې پر تور نیول شوي دي.

د کورنیو چارو وزارت ویاند د پاسپورټونو د وېش په اړه څرګنده کړې، چې په تېرو شپږ میاشتو کې ۸۳۷ زره پاسپورټونه خلکو ته وېشل شوي او په کابل کې به د وېش درې نورې نوې ادارې جوړې شي.

قانع ویلي: د پاسپورټ رياست له‌خوا هره ورځ لس زره پاسپورتونه هېوادوالو ته وېشل کېږي.

د دوی د څرګندونو له مخې؛ د نشه‌یي توکو کښت، تولید او قاچاق هم صفر ته رسېدلي او په هېواد کې د نشه‌یي توکو د تولید اته ماشینونه او د نشه‌یي توکو د تولید ۳۷۷ کارخونې کشف او له منځه وړل شوې دي. دوی د پولیسو د مسلکي کیدو، له فساد سره د مبارزې او د وسلو په راټولولو کې هم لاسته راوړنې لري.

هغه دا هم ويلي، چې په دې موده کې د هېواد په ډېرو ولايتونو کې کومه امنيتي پېښه نده رامنځته شوې او نه هم کوم امنيتي ضد فعاليتونه ترسره شوي دي.

د قانع د څرګندونو له مخې، امنیتي کچه د تېرو څو لسیزو پر پرتله بې سارې ده.

Continue Reading

تازه خبرونه

د ټاپي ګاز شرکت اجرائیه رییس له وروستیو پرمختګونو خوښي څرګنده کړه

Published

on

(Last Updated On: وری ۹, ۱۴۰۳)

د کانونو او پټرولیم وزارت چارسمبالي شهاب الدین دلاور د پنجشنبې پر ورځ ( د وري نهمه ) د ټاپي پروژې له اجرائیوي رییس او په کابل کې د ترکمنستان له سفیر سره وکتل او د دغې پروژې د پرمختګونو په اړه یې خبرې وکړې.

د ترکمنستان او افغانستان، پاکستان او هند (ټاپي) د ګازو نلیکې د پروژې اجرائیوي رییس مراد امانوف د پروژې له وروستي پرمختګه خوښي وښوده او د پروژې د عملي پیل په اړه یې خبرې وکړې.

د افغانستان د کانونو او پټرولیم وزارت چارسمبالي شهاب الدین لاور ويلي، چې د ټاپي پروژې لومړني کارونه چټک روان دي او په نږدې راتلونکي کې به د دې نلليکې د غځولو چارې پيل شي.

ویل کیږي، چې د ترکمنستان سفیر یاد هېواد ته د افغان پلاوي د وروستي سفر په اړه معلومات وړاندې کړل او څرګندوي، چې په نږدې راتلونکي کې به د دغه هېواد یو پلاوی هرات ولایت ته سفر وکړي.

TAPI د طبیعي ګاز یوه نللیکه ده، چې د آسیا پراختیایي بانک په ګډون د ګالکینیش – TAPI نللیکې شرکت له‌خوا پراختیا مومي.

دغه نللیکه به د ترکمنستان له ګالکینیش ګازو څخه طبیعي ګاز د افغانستان له لارې پاکستان او بیا هند ته لېږدوي.

Continue Reading

Trending

Copyright © 2022 Ariana News. All rights reserved!