نړۍ
د امریکا بي-۵۲ بم غورځوونکې الوتکه په کالیفورنیا کې ولوېده؛ په کې اته کسان ووژل شول
د رویټرز د راپور له مخې: دغه الوتکه، چې د اټومي او دودیزو وسلو د لېږد لپاره جوړه شوې؛ په یو عادي روزنیز ماموریت کې له الوتنې څخه لږ وروسته د هوايي ډګر پر ځغاستليکه راوغورځېده او اور یې واخیست.
د امریکا د هوايي ځواک یوه بي-۵۲ بم غورځوونکې الوتکه د دوشنبې پر ورځ د کالیفورنیا ایالت د اېډوارډز له هوايي اډې د الوتنې پر مهال راوغورځېده او اور یې واخیست. امریکايي چارواکو ویلي، په دې پېښه کې د الوتکې ټول اته سپاره کسان وژل شوي دي.
د رویټرز د راپور له مخې: دغه الوتکه، چې د اټومي او دودیزو وسلو د لېږد لپاره جوړه شوې؛ په یو عادي روزنیز ماموریت کې له الوتنې څخه لږ وروسته د هوايي ډګر پر ځغاستليکه راوغورځېده او اور یې واخیست.
د امریکا د هوايي ځواک ویاند جېمز هیز ویلي، په الوتکه کې دولتي ملکي کارکوونکي، قراردادي کارکوونکي او پوځي پرسونل سپاره ول.
بوینګ شرکت هم ویلي، چې د پېښې په قربانیانو کې یې دوه کارکوونکي شامل دي.
هیز زیاته کړې؛ دغه الوتنه د راداري سیسټمونو د نوي کولو د پروګرام په چوکاټ کې ترسره کېده.
د نوموړي د څرګندونو له مخې، د الوتکې د لوېدو لامل تر دې دمه څرګند شوی نهدی او په اړه یې څېړنې روانې دي.
د امریکا هوايي ځواک تر اوسه د وژل شویو کسانو نومونه خپاره کړي نهدي او څرګندوي، چې تر هر څه مخکې باید د هغوی کورنۍ خبرې شي.
د پېښې له ځایه اخیستل شوي هوايي انځورونه، چې د لاس انجلس ښار شاوخوا ۱۶۰ کیلومټره شمال ته ثبت شوي؛ د سوځېدلې او لوګي نیولې پراخې سیمې انځور وړاندې کوي. په دغو انځورونو کې د الوتکې د پاتې شونو سترې ټوټې نه تر سترګو کېږي.
هیز ویلي، د هوايي ډګر د ځغاستليکې د زیانمنېدا له کبله په اېډوارډز اډه کې ټولې الوتنې لږ تر لږه د سېشنبې تر ورځې ځنډول شوې دي.
بي-۵۲ بم غورځوونکې الوتکه د امریکا د هوايي ځواک له مهمو سټراټیژیکو الوتکو څخه ده او له څو لسیزو راپدېخوا په بېلابېلو پوځي ماموریتونو کې کارول کېږي. دا الوتکه د ډېرو دودیزو او اټومي وسلو د لېږد وړتیا لري او د سونګ له بیا اخیستو پرته تر ۱۲ زره کیلومټرو زیات واټن وهلی شي.
د شته څرګندونو له مخې، دا له ۲۰۱۶ کال راپدېخوا د بي-۵۲ الوتکې لومړنۍ مرګونې پېښه بلل کېږي.