سیمه ییز خبرونه
د كابل پاڅون دري دېرشمه كال ورځ ونمانځل شوه
د كب درېيمه يا د پخوانې شوروې د يرغل په وړاندې د كابل د پاڅون ورځ په كابل كې د افغانستان د اسلامي متحد گوند له خوا ونمانځل شوه.
وينا والو افغانستان دښمن ځپونكى هېواد او افغانان قهرمانان وبلل، چې د هيڅ يرغل په وړاندې يې سر نه دى ټيټ كړى.
د ۱۳۵۸ل كال د كب په درېيمه د كابل خلكو د پخواني شوروي د يرغل په وړاندې پاڅون وكړ، چې د وخت د رژيم له سخت غبرگون سره مخ شو او په كې گڼو خلكو ته مرگ و ژوبله واوښته.
د كب درېيمه په تېرو درې لسيزو كې د يرغل په وړاندې د افغانانو د پاڅون يوه مهمه او تاريخي ورځ بلل شوې ده.
دغه مراسم د افغانستان اسلامي متحد گوند له خوا د پنجشنبې په ورځ(د كب ۳) د پخواني شوروي د يرغل په وړاندې د كابل د خلكو د پاڅون د ورځې د نمانځنې په موخه په كابل كې جوړ شوې ول.
د ولسي جرگې او د سولې عالي شورا يو شمېر غړيو، د كابل ښار سلگونه اوسيدونكيو او په پاڅون كې د شهيدانو كورنيو برخه اخيستې وه.
د افغانستان د اسلامي متحد گوند مشر وحيدالله سباوون د كب درېيمه د ظلم او يرغل په وړاندې د افغانانو د يو موټي توب او مقابلې ورځ وبلله.
دغه پاڅون، چې افغانستان ته د سرو لښكرو تر دننه كيدو دوه مياشتې وروسته تر سره شوى وو، موخه يې له بهرينو حكومتونو څخه د افغانستان خپلواكه كيدل او له استعماري هڅو وتل ول.
ويل كيږي، چې دغه پاڅون د دولت له خوا د خلكو له ځپلو وروسته، چې گڼ شمېر خلكو ته په كې مرگ و ژوبله واوښته پاى ته ورسيد.
يو شمېر كارپوهان وايي، چې دغه پاڅون د ظلم او يرغل په وړاندې د افغانانو د يوالي ښكارندوى و، خو د وخت د حكومت د سرتېرو له خوا د خلكو ځپل د افغانستان په تاريخ كې تر ټولو بد او زړه بوږنونكى ځپل شمېرل كيږي.