سیمه ییز خبرونه
د كونړ په غازي اباد كې ۱۵۰ وسله والو مخالفينو ته مرگ و ژوبله اوښتې- آيساف
آيساف وايي:
د كونړ په غازي اباد ولسوالۍ كې مو له تېرې يوې اوونۍ راهيسې ۱۵۰ وسله والو مخالفينو ته مرگ و ژوبله اړولې ده.
دوى وايي:
په دغوعملياتو كې ۱۱۵تنه وسله وال وژل شوي او۴۰ نور ټپيان دي.
آيساف وايي:
په عملياتو كې گډو ځواكونو او ولسي وگړيو ته زيان نه دى اوښتى.
وسله والو طالبانو تراوسه په دې اړه څه ويلي نه دي.
په ختيځ كې د آيساف ځواكونو مطبوعاتي دفتر وايي:
افغان او بهرنيو ځواكونو د كونړ ولايت په غازي آباد ولسوالۍ كې د تېرې يوې اوونۍ راهيسې گډعمليات پيل كړي.
دوى وايي:
د عملياتو پرمهال دوى ته يو شمېر وسلې او مهمات هم په لاس ورغلي.
ناټو وايي:
په ياده سيمه كې يې د دغوعملياتوله تر سره كولو موخه په سيمه كې د وسله والو مخاليفينو ځپل، د هغو د اکمالاتي او ارتباطي لارو تړل او د وسله والو له خوا د کونړاو نورستان ترمنځ د تړل شوې لارې خلاصول دي.
دوى وايي:
دغه عمليات، چې اوس هم دوام لري؛ له پاى ته رسيدو سره سم به له يادې ولسوالۍ څخه نورستان ته دغزيدلي سړك د پخولو چارې پيل شي.
د كونړچارواكي د دغو عملياتو پخلى كوي، خو په دې اړه له نورو څه ويلو ډډه كوي.
د يادونې وړده، چې تردې څو مياشتې وړاندې هم بهرنيو ځواكونو د كونړ په غازي آباد ولسوالۍ كې ورته عمليات ترسره كړي وه، چې په لومړي سركې يې د گڼ شمېر وسله والو د وژلو ادعا كړې وه، خو په وروستيو څېړنو كې چارواكو ومنله، چې په وژل شويو كې۶۰ تنه ولسي وگړي هم ول.