تازه خبرونه
د لوړو زدهکړو وزیر د روسیې د تاتارستان جمهوریت ته سفر کړی
د اسلامي امارت د لوړو زدهکړو وزیر ندا محمد ندیم د سې شنبې پرشپه ( د غبرګولي ) د یوه پلاوي په مشرۍ د روسیې د تاتارستان پلازمېنې کازان ته روان شو.
د لوړو زده کړو وزارت ویاند ضیاء الله هاشمي ويلي، دغه سفر د روسیې فدراسیون د تاتارستان په رسمي بلنه ترسره شوی او ندا محمد ندیم د تاتارستان له چارواکو سره د کتنې ترڅنګ مسکو ته د بېلابېلو پوهنتونونو او افغان محصلینو سره د لیدنې لپاره هم سفر وکړي.
ضیاء الله هاشمي زیاته کړې، چې په دغه سفر کې به ندا محمد ندیم او ورسره پلاوی په تاتارستان کې د پوهنې او لوړو زدهکړو د وزیرانو په غونډه کې ګډون وکړي.
دغه راز د بهرنیو چارو وزارت د ویاند مرستیال په ډاګه کړې، چې د لوړو زدهکړو وزیر شیخ ندا محمد ندیم او ورسره مل پلاوی یې د روسیې فدراسیون د تاتارستان په جمهوریت کې د پوهنې وزیرانو نړیوال فورم (راتلونکې جوړونه) ته د ګډون لپاره دغه هېواد ته سفر کړی دی.
یاد فورم د روان زېږدیز کال د می له ۷ څخه تر ۱۰ مې نېټې دوام مومي، چې د افغانستان په ګډون ورته د نړۍ د ٢٠ هېوادونو د ښوونې او روزنې وزیران لکه؛کوبا، وینزویلا، کنګو، میانمار، زیمبابوی، پاکستان، او قطر حضوري او د ۸ نورو هېوادونو لکه؛ ویتنام، شمالي کوریا، ماداګاسکار، نامیبیا، اتیوپي، برازیل او جنوبي آفریقا وزیران به په انلاین ډول په فورم کې ګډونوال وي.
په روسیه کې د افغانستان پر لوی سفارت سربېره، د عربي متحده اماراتو، برازیل، کیوبا او زیمبابوې سفیران او دیپلوماتان هم را بلل شوي دي.
یو شمېر کار پوهانو ویلي، چې په داسې شرایطو کې، چې د افغانانو پر زدهکړو محدودیتونه دي، دا ډول سفرونه د محصلینو د شمېر پر لوړولو، د محصلینو لپاره د بورسونو د ونډې پر زیاتولو او همدارنګه د حکومتدارۍ د ښې تجربې پر ترلاسه کولو مثبت اغېز لرلی شي.
که څه هم د اسلامي امارت ځینو چارواکو ویلي؛ د نجونو لپاره د پوهنتونونو او ښوونځیو د بیا پرانستلو پر کړنلاره کار روان دی؛ خو خلک پر اسلامي امارت نیوکه کوي، چې دا ستونزه باید زر تر زره حل کړي او نجونو ته د تعلیم او تحصیل بشپړه زمینه برابره کړي.
تازه خبرونه
د سولې په چارو کې د ملګرو ملتونو د عمومي منشي مرستیال کابل ته راغلی
د سولې په چارو کې د ملګرو ملتونو د عمومي منشي مرستیال ژان پیر لاکروا به د دوه ورځني سفر په بهیر کې له جګړې څخه د پاتې چاودیدونکیو توکو د خطرونو په اړه د پوهاوي پر لوړولو راوڅرخیږي.
د سولې په چارو کې د ملګرو ملتونو د عمومي منشي مرستیال ژان پیر لاکروا له یوه پلاوي سره کابل ته راغلی دی.
د ملګرو ملتونو د ویاند مرستیال فرحان له دې مخکې په یوه خبري غونډه کې ویلي وه، چې ین پییر لاکروا به افغانستان ته په خپل سفر کې د چاودېدونکیو توکو د اغېزو په اړه د اسلامي امارت له چارواکو سره خبرې وکړي.
په دغه سفر کې له نوموړي سره د ملګرو ملتونو د ماین پاکۍ د څانګې مشره هم مل ده.
هغه زیاته کړې، چې لاکروا به د مې تر اووهلسمې پورې په کابل کې وي او په دې سفر کې به د ملګرو ملتونو د ماین پاکۍ د څانګې مشره ایلین کوهن هم ورسره مل وي.
د ملګرو ملتونو دغه چارواکي ویلي، چې د افغانستان خلک د ماینونو له خطر سره مخ دي او د ۲۰۲۳ کال له جنورۍ څخه د ۲۰۲۴ کال تر مارچ پورې په افغانستان کې د ۸۲۱ چاودېدونکیو توکو د وژل شویو ۸۱ سلنه ماشومان ول.
تر اوسه اسلامي امارت په دې اړه جزئیات ندي ورکړي.
د سولې په چارو کې د ملګرو ملتونو د عمومي منشي مرستیال په داسې حال کې افغانستان ته سفر کوي، چې ټاکل شوې د روان کال په جون میاشت کې د افغانستان په اړه په دوحه کې درېیمه غونډه جوړه شي.
دا په داسې حال کې ده، چې د ملګرو ملتونو د څرګندونو پر بنسټ، له دې مخکې د سولې په چارو کې د ملګرو ملتونو د عمومي منشي مرستیال قطر ته د سفر پر مهال د دغه هېواد له چارواکو سره د سولې د ټینګښت او د ستونزو په اړه خبرې کړې وې.
تازه خبرونه
په غور ولايت کې د ژغورنې د عملیاتو پر مهال يوه پوځي چورلکه رالوېدلې
نن سهار (چارشنبه د غویی شپږویشتمه ) د غور ولایت په مرکز فیروزکوه ښار کې د ملي اردو یوه چورلکه راغورځېدلې، چې په کې ۱ کس مړ او ۱۲ نور ټپیان دي.
د ملي دفاع وزارت ویاند عنایت الله خوارزمي زیاته کړې؛ د هوايي ځواک «MI 17» ډوله چورلکه غور ولایت د یوه فلانکوچ موټر د هغو کسانو د جسدونو د راایستلو لپاره لېږل شوې وه، چې د هریرود سیند ته لوېدلی و. د ژغورنې له عملیاتو وروسته دغه چورلکه له تخنیکي ستونزې سره مخ او په فیروزکوه ښار کې د بېړنۍ ناستې پر مهال له یوه دیوال سره ولګېده او راوغورځېده.
آریانانیوز ته د دې چورلکې د رارسېدلې ویډیو له مخې؛ په اوبو کې د چورلکې د راغورځېدو پر مهال یو شمېر کسان هم لیدل کیږي.
ویل کیږي، چې یوه ورځ مخکې د فیروزکوه په غازي دره سیمه کې فلانکوچ موټر له سړکه واوښت او په هریرود سیند کې ډوب شو، چې له کبله یې دوه کسان مړه او یو بل ټپي شوی و.
تازه خبرونه
جاپان د لویدیځو هېوادونو پر مستقیمو اړیکو خپل ټینګار څرګند کړ
په افغانستان کې د جاپان سفیر تاکایوشي کورما د اسلامي امارت د ریاست الوزراء له سیاسي مرستیال مولوي عبدالکبیر سره په لیدنه کې ویلي، چې په افغانستان کې د لویدیځو هېوادونو د ډیپلوماټیک حضور نشتوالی د دې لامل شوی، چې دوی په افغانستان کې له مثبتو پرمختګونو بې خبره پاتې شي او پر وینا یې دا مناسبه ده، چې نړیواله ټولنه مستقیماً له اسلامي امارت سره اړیکې ولري.
تاکایوشي کورما زیاته کړې، چې جاپان له افغانانو سره د طبیعي پېښو د مخنیوي، پر نشهیي توکو د روږدو کسانو د درملنې او د افغان کروندګرو لپاره د بدیل کښت په برخو کې همکارۍ ته ژمن دی.
دغه راز مولوي عبدالکبیر په دې لیدنه کې ویلي؛ د ولسونو د ملاتړ له کبله اسلامي امارت بریالی شوی، چې ملي سوله رامنځته، سترې پروژې پیل او ګڼ نور اصلاحات رامنځته کړي.
ویل کیږي، چې اسلامي امارت د خلکو د اقتصادي ستونزو د اواري هڅه کوي او له نړۍ سره مثبت تعامل او پراخې اړیکې غواړي.
-
تازه خبرونه4 days ago
الله ګل مجاهد د قتل پر تور ونیول شو
-
تازه خبرونه3 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
سوداگري4 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه3 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
تازه خبرونه3 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه2 days ago
د یوناما استازې د ایران له بهرنیو چارو وزیر سره وکتل
-
لوبی1 day ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه1 day ago
په ننګرهار کې د ناکامورا کانال پروژه بشپړه شوه