سیمه ییز خبرونه
د مركزي بغلان د پخواني ولسوال او امنيه كوماندان نه نيولو غبرگونونه راپارولي
د اميرگل او محمد كمين د نيولو پرسر د مشرانو جرگې په عومي غونډه كې بحث په لفظي شخړه بدل شو.
د مشرانو جرگې يو شمېرغړي وايي:
دا كسان د ځينو حكومي مشرانو په مرسته تښتيدلي او اوس په كابل كې پټ دي.
د كورنيو چارو وزارت كه څه هم له دغو كسانو سره د حكومتي چارواكو د مرستې په اړه څه نه وايي؛ خو پر نيولو يې ټينگاركوي.
دا دواړه كسان په دې ولسوالۍ كې د ملي اردو د درې منسوبينو په وژلو كې په لاس درلودو تورن شوي دي. د نيولو د حكم له صادريدو وروسته دې كسانو وسلې ته لاس كړ او څلور نور يې ټپيان او وروسته وتښتيدل.
د بغلان ولايتي شورا رييس محمد رسول محسني په دې برخه كې د كورنيو چارو وزارت مسوول گڼي.
د مشرانو جرگې غړي نظرمحمد فقيري د يكشنبې ورځې(د ليندۍ۱۲) په عمومي غونډه كې د دغو دوه كسانو د نيولو غوښتونكى شو.
د مشرانو جرگې غړې بلقيس روشن وايي:
ځينې لوړ پوړي حكومتي چارواكي له دغو دوه كسانو ملاتړ كوي او حتا كابل ته يې ليږدولي دي.
دا څرگندونې د دوه سناتورانو ترمنځ د لفظي شخړې لامل شوې.
په همدې وخت كې د كورنيو چارو وزارت په دې اړه له څه ويلو ډډه وكړه؛ خو پخپل پخواني دريځ، چې د دغو كسانو نيول دي ټينگاركوي.
له بلې خوا د ۲۰۹ شاهين قول اردو كوماندان زلمى ويسا وايي:
كه دا دوه كسان ونه نيول شي، ملي ځواكونه به د خپل ځان په اړه د امنيتي چارواكو په ملاتړ بې باوره شي.
د يادونې وړ ده، چې تېره اوونۍ د مركزي بغلان د پخواني ولسوال اميرگل او امنيه كوماندان محمد كمين د نيولو حكم وركړشوى دى، چې په اړه يې څېړنې بشپړې شوي.