سیمه ییز خبرونه
د وزيرانو استيضاح د ولسي جرگې غړو ترمنځ په يوه ناندريزه موضوع بدله شوې ده
د كابينې د هغو يوولس وزيرانو د استيضاح څرنگوالى، چې له پنځوس سلنې لږه پرمختيايي بودجه يې لگولې د ولسي جرگې غړو ترمنځ په يوه ناندريزه موضوع بدله شوې.
تر اوسه هم د ولسي جرگې ټول غړي د هغو ۱۱ وزيرانو د استيضاح په څرنگوالي موافقې ته نه دي رسېدلي، چې له پنځوس سلنې لږه پرمختيايي بودجه يې لگولې ده.
د ولسي جرگې يو شمېر غړي ټينگار كوي، چې دا وزيران بايد استيضاح شي.
په همدې حال كې د ولسي جرگې يو شمير نور غړي بيا هڅه كوي، چې د يوولسو وزارتونو د پرمختيايي بودجې د نه لگېدو مسئله ځانگړي كميسيون ته وسپارل شي.
خو د ولسي جرگې لومړي مرستيال محمد ظاهر قدير، چې د غونډې مشري يې كوله بل ډول تصميم ونيو.
د ېادونې وړ ده، چې دوې اوونۍ وړاندې د ولسي جرگې غړو پرېكړه وكړه، چې د كابينې يوولس وزيران له دې امله استيضاح كړي، چې ولې يې له پنځوس سلنه لږه پرمختيايي بودجه لگولې ده.