د چرخي پله او بگرام زندان اتيا شكمن بنديان خوشې شول

چارواكي وايي:

د چرخي پله او بگرام  له زندانونو شاوخوا اتيا هغه زندانيان خوشې شول، چې امنيتي ځواكونو د بېلابېلو عملياتو په ترڅ كې له وسلوالو مخالفينو سره د همكارۍ په شك نيولي ول.

د جمعې په ورځ(د مرغومي ۱۵) په هغو مراسمو كې، چې خپلوانو ته د بنديانو د سپارلو لپاره جوړ شوي ول؛  د بگرام زندان مسوول جنرال غلام فاروق باركزى وويل:

تر راتلونكې يوې مياشتې پورې به په دغه زندان كې د دولس سوه نورو زندانيانو برخليك هم روښانه شي.

جنرال باركزى وايي:

د ديارلس سوه نويم كال د كب په مياشت كې افغانستان له امريكا سره هوكړې ته ورسيد، چې د بگرام زندان مسووليت به افغانانو ته سپارل كيږي. له هغه مهاله، چې  افغان دولت ته د بگرام زندان مسووليت سپارل شوى، د زندانيانو پر دوسيو هم  كار چتك شوى دى.

د هغه په وينا:

تر لس مياشتو به د ټولو زندانيانو دوسيي وڅېړل شي.

له زندان څخه خوشې شوي كسان وايي، چې:

د غلطو راپورونو پراساس د امنيتي ځواكونو له خوا نيول شوي وو.

په داسې حال كې، چې ويل كيږي د افغانستان وسلوال مخالفين په پاكستان كې روزل كيږي.

د ولسي جرگې غړي داود حساس له زندان څخه خوشې شويو كسانو ته وويل، چې:

د تخريبي كارونو لپاره بايد نور د پاكستانيو استخباراتو په لومه كې ځانونه بند نه كړي.

د يادونې وړ ده، چې له زندان څخه خوشي شوي كسان د پكتيا، لوگر، كابل، پروان، كاپيسا او وردگو اوسيدونكي دي، چې خپلوانو ته وسپارل شول.