د ډیورنډ فرضي کرښې په اوږدو کې د اغزنې کټارې لګول پر ځای کړنه وه – شهباز شریف

د پاکستان لومړي وزیر شهباز شریف د ډیورنډ فرضي کرښې په اوږدو کې د اغزنې کټارې له لګولو دفاع کړې او هغه یې د امنیت د ټینګښت او د پاکستان د وګړو د ساتنې لپاره اړینه کړنه بللې ده.

هغه د شنبې پر ورځ د پاکستان د ملي شورا په غونډه کې ویلي، چې د پاکستان حکومت د ډیورنډ کرښې په اوږدو کې د اغزنې کټارې او امنیتي تأسیساتو د جوړولو لپاره ستر لګښتونه کړي؛ خو د ده په وینا، دغه لګښتونه د امنیتي ګواښونو د مخنیوي او د ترهګریزو فعالیتونو د مهارولو لپاره د توجیه وړ دي.

شریف ویلي: « د ډیورنډ کرښې په اړه، چې تاسې یادونه وکړه، د پاکستان د امنیت د ټینګښت او د خلکو د ساتنې لپاره د سرحدونو په اوږدو کې د اغزنې کټارې لګول یو سم او پر ځای کړنه وه. که دغه کټاره د ترهګرۍ له ګواښ څخه د یوه ماشوم ژوند هم وژغوري، زما پر باور د دې نږدې دوه زره کیلومټره کرښې لپاره هر لګښت پر ځای او د توجیه وړ دی؛ ان که دا لګښت میلیارډونو روپیو ته هم ورسېږي.»

د پاکستان د لومړي وزیر دا څرګندونې په داسې حال کې راپورته کېږي، چې د ډیورنډ فرضي کرښې او د هغې په اوږدو کې د اغزنې کټارې موضوع تل د کابل او اسلام‌‌آباد ترمنځ له اختلافی مسایلو څخه ګڼل شوې ده.

یو شمېر افغان شنونکي وایي، پاکستان د اغزنې کټارې لګول امنیتي اقدام بولي؛ خو په افغانستان کې دا موضوع یوازې امنیتي اړخ نه‌لري، بلکې د کرښې د دواړو غاړو له تاریخي، سیاسي، فرهنګي او ټولنیزو واقعیتونو سره هم تړلې ده.