د ثبات او همپالنې ټاکنیزه ډله خبرداری ورکوي، که په ۲۷ ولایتونو کې د رایو شمېرنه بیا تر سره نشي؛ د ولسمشریزو ټاکنو لومړنۍ پایلې به ونه مني.

په څلور ولایتونو کې د رایو بیا شمېرنه روانه ده؛ خو په پنجشېر، سرپل او جوزجان کې د ټاکنډلو د څارونکیو له شتوالي سره سم دا بهیر بشپړ شوی دی.

د ثبات او همپالنې ټاکنډلې ویلي؛ څارونکي یې د ۲۷ ولایتونو د رایو په بیا شمېرولو کې نه ول او که دا رایې بیا ونه شمېرل شي، د ټاکنو هر ډول پایله ورته د منلو نده.

د ثبات او همپالنې د ټاکنډلې غړی یونس نواندیش ټینګار کوي، چې ټاکنیزو شکایتونو خپلواک کمیسیون باید په دې اړه همکاري وکړي.

نوموړی وایي: د ۲۷ ولایتونو بیا شمېرنه زمونږ په نشتوالي کې بشپړه شوې ده. مونږ له دولت جوړوونکې ټاکنډلې پرته د دغو رایو د بیا شمېرنې غوښتنه کړې ده. مونږ له ټاکنیزو شکایتونو کمیسیون څخه د زمینې برابرولو غوښتنه کړې؛ ځکه، چې ډېر شکایتونه ثبت شوي دي. پرته له دې د پایلو اعلامول مونږ ته د منلو نه دي.

ټاکنو خپلواک کمیسیون ټینګار کړی، چې د دوی د کړنلارو او قانون له مخې په ۲۷ ولایتونو کې د رایو بیا شمېرنه ترسره شوې ده.

د ټاکنو خپلواک کمیسیون غړی اورنګ زیب وایي: د ناظرانو په شتوالي کې د ۲۷ ولایتونو د رایو بیا شمېرنه د کمیسیون د کړنلارو  او قانون له مخې تر سره شوې ده. د ټاکنو خپلواک کمیسیون له ټولو نوماندانو او ټاکنډلو غوښتي وه، چې د شکمنو رایو له بیا شمېرنې څارنه وکړي؛ مونږ د ۲۷ ولایتونو د رایو بیا شمېرنه بښپړه کړې ده.                

ټاکنیزو شکایتونو خپلواک کمیسیون وایي، د ثبات او همپالنې ټاکنیزې ډلې دا غوښتنه ستونزه جوړونکې ده.

د ټاکنیزو شکایتونو خپلواک کمیسیون د ویاند مرستیال محمد رضا فیاض ویلي: اوسمهال دا غوښتنه ننګوونکې ده او ټاکنو کمیسیون یې په اړه پرېکړه نلري؛ خو د شکایتونو کمیسیون په اند باید د اووه ولایتونو د رایو بیا شمېرنه پای ته ورسیږي.            

دغه راز په هغوولایتونو کې، چې د رایو بیا شمېرنه شوې؛ آیا د ټاکنڅارو د قناعت وړ ګرزیدلې او کنه؟

د افغانستان د ټاکنو روڼتیا څار غړی حبیب الله شینواري ویلي؛ یو شمېر رایې، چې په دې بهیر کې باطلې وې؛ باوري شوی او یو شمېر رایې، چې باوري وې، تاطلې شوې دي.

د نوموړي د څرګندونو له مخې؛ د دوی څارونکیو همدا ستونزه لیدلې ده.          

ټاکل شوې د رایو بیا شمېرنه د سې شنبې پر ورځ( د لیندۍ ۲۶/ د دسمبر ۱۷) په ټولو اووه ولایتونو کې پاي ته ورسیږي د رایو له بیا شمېرلو وروسته به ښایې یوه روځ وروسته د ټاکنو لومړنۍ پایله اعلان شي.

خبریاله: دیانا صمدي