رسنۍ دې له ۲۰۱۴م كال وړاندې د مبارزې لپاره ځانونه چمتو كړي

له آزادو رسنيو څخه د ملاتړ اداره يا نى وايې:

رسنۍ بايد له ۲۰۱۴ كال وړاندې د ځينو زور لرونكيو او متعصبو افرادو  له گواښونو سره د مبارزې لپاره ځانونه چمتو كړي.

دا بنسټ وايي:

ځينې افراد غواړي، چې له افغانستان څخه د بهرنيو ځواكونو له وتو وروسته پر رسنيو ځينې محدوديتونه ولگوي.

نى همدا راز تمه لري، چې سږكال د كاپي رايټ قانون مسوده، اطلاعاتو ته د لاسرسي حق او د خبريالانو د امتيازونو د مقررې مسوده تصويب شي.

له آزادو رسنيو څخه د ملاتړ اداره( نى) د ۲۰۱۳ م كال په لومړيو ورځو كې په ډاگه كوي، چې:

په تېرميلادي كال كې رسنيو وده كړې.

د( نى)  ادارې د معلوماتو له مخې:

په بغلان، هرات، بلخ او ننگرهار ولايتونو كې تېركال يوولس تلويزيونونو او دولس راديوگانو په فعاليت پيل وكړ. تېر كال په هرات كې يوې چاپي خپرونې د مالي ستونزو له كبله د لنډې مودې لپاره خپل فعاليت ودراوه او طرف خپرونه د ولسي جرگې د فشار له وجې د تل لپاره بنده او مسوول يې په مرگ وگواښل شو.

د افغانستان د آزادو رسنيو د ملاتړ ادارې رييس صديق الله توحيدي وايي:

له افغانستان څخه به د بهرنيو ځواكونو له وتو وروسته ممكن د رسنيو په وړاندې جدي محدوديتونه ولگول شي او له گواښونو سره به مخ شي.

امنيتي ستونزې، په ډېرو مواردو كې اطلاعاتو ته نه لاسرسى، په دندو كې د خبريالانو گمارلو ، شړلو ،   امتياز وركولو او د  رسنيو داخلي ستونزې هغه برخې دي، چې د توحيدي په وينا خبريالان يې له ستونزو سره مخ كړي دي.

د عدليې وزارت چارواكي وايي:

اطلاعاتو ته د لاسرسي د قانون مسوده څه موده وړاندې رارسيدلې او ټاكل شوې په څو اوونيو كې وزيرانو شورا ته واستول شي.