لوبی
زمبابوی ته د سفر لپاره د افغان کرکټ لوبډلو نوملړ په ډاګه شو
د افغانستان کرکټ بورډ غوراوي کمیټې د زمبابوې پر وړاندې د درې یو ورځنیو او درې شل آوریزو لوبو لپاره د ملي لوبغاړیو نوملړ اعلان کړ.
ټاکل شوې دغه لوبې به د غبرګولي پر ۱۴ پیل او تر ۲۴ به روانې وي.
د افغانستان کرکټ بورډ څرګنده کړې، چې د یو ورځنیو نړیوالو سیالیو لپاره په دغه نوملړ کې رحمان الله ګوربز، ریاض حسن، ابراهیم ځدراڼ، حشمت الله شهیدي (روزونکی)، رحمت شاه، نجیب الله ځدراڼ، شاهد کمال، اکرام علي خېل او محمد نبي شامل دي. عظمت الله عمرزی، راشد خان، مجیب الرحمن، ضیاء الرحمن اکبر، فضل الحق فاروقي، فرید ملک او یامین احمدزی هم په پام کې نیول شوي، چې پر دې سربېره نور احمد او نجات مسعود هم د احتیاطي لوبغاړیو په نوملړ کې شته دي.
همدارنګه د شل آوریزو سیالیو په نوملړ کې رحمان الله ګوربز د (ویکټ کیپر) په توګه، حضرت الله ځاځی، عثمان غنی، احسان الله جنت، نجیب الله ځدراڼ، دروېش رسولی، کریم جنت، محمد نبی (روزونکی)، عظمت الله عمرزی، شرف الدین اشرف شامل دي. افسر ځاځی، راشد خان، نور احمد، فضل فاروقي، فرید ملک او نجات مسعود شامل دي. په داسې حال کې، چې سید احمد شېرزاد او ظاهر خان په احتیاطي نوملړ کې دي.
افغان لوبغاړي، چې دا مهال په هېواد کې دننه تمرین کوي، د جون پر ۴، ۶ او ۹ به د زمبابوی پر وړاندې په یو ورځنیو نړیوالو لوبو کې لوبېږي. په داسې حال کې، چې د جون پر ۱۱، ۱۲ او ۱۴ نېټه به د زمبابوی پر وړاندې د ۲۰ آوریزو لوبو په لړ کې میدان ته ننوځي.
د افغانستان کرکټ بورډ په ډاګه کوي؛ د دغو سیالیو د لړۍ یو ورځنۍ لوبې د ۲۰۲۳ کال نړیوال جام ته د غوراوي لوبو یوه برخه ده او راتلونکي نړیوال جام ته د بشپړ چمتووالي پر موخه د ۲۰ آوریزو لوبو لړۍ ده او د یادو لوبو په درجه بندۍ کې شامل دي.
د افغانستان کرکټ بورډ زیاته کړې، چې د زمبابوی پر وړاندې به ټولې یادې لوبې د پلازمېنې په هراري لوبغالي کې ترسره شي، چې یو ورځنۍ سیالۍ به د افغانستان پر وخت شاوخوا ۱۱:۴۵ پیل شي او دغه ۲۰ آوریزه نړیواله سیالۍ به د افغانستان پر وخت په ۳:۳۰ بجو پیل شي.
لوبی
په آی ال ټي ۲۰ سیالیو کې ۲۵ افغان لوبغاړو قراردادونه ترلاسه کړل
د هوکړې له مخې، د سیالیو شپږ واړه فرنچایزونه مکلف دي، چې په خپلو لوبډلو کې لږ تر لږه دوه افغان لوبغاړي ولري.
د آی ال ټي ۲۰ سیالیو په پنځم پړاو کې به ۲۵ افغان کرکټ لوبغاړي د شپږ لوبډلو په جوړښت کې ولوبېږي؛ دا د افغانستان او متحده عربي اماراتو د کرکټ بورډونو ترمنځ د سټراټیژیکې همکارۍ په پایله کې شونې شوې ده.
د هوکړې له مخې، د سیالیو شپږ واړه فرنچایزونه مکلف دي، چې په خپلو لوبډلو کې لږ تر لږه دوه افغان لوبغاړي ولري.
په قرارداد ترلاسه کوونکو ۲۵ لوبغاړو کې د افغانستان د ملي لوبډلې پېژندل شوي لوبغاړي لکه راشد خان، محمد نبي، رحمانالله ګربز، ابراهیم ځدراڼ او عظمتالله عمرزی هم شامل دي.
د دوی ترڅنګ یو شمېر ځوانو او مخ پر ودې لوبغاړو هم په دې سیالیو کې د ګډون فرصت ترلاسه کړی دی.
د ۲۵ افغان لوبغاړو نومونه د شپږ لوبډلو په جوړښت کې دادي:
ابوظبي نایټ رایډرز
- ګلبدین نایب
- قیس احمد
- عرب ګل
- عبدالله ترهخېل
ډیزرټ وایپرز
- مجیب الرحمن
- ننګیالی خروټی
- سلیم ساپی
- عبدالله احمدزی
دوبۍ کپېټلز
- نور احمد
- صدیقالله اتل
- کریم جنت
- دروېش رسولي
ګلف جاینټس
- رحمانالله ګربز
- ابراهیم ځدراڼ
- عظمتالله عمرزی
- عمران میر
- وحیدالله ځدراڼ
ام آی امارات
- راشد خان
- فضلالحق فاروقي
- اللهمحمد غضنفر
- فریدون داوودزی
شارجه واریرز
- محمد نبي
- وقار سلامخېل
- فرید ملک
- شرفالدین اشرف
افغان لوبغاړو په داوطلبۍ کې ښه جګ تړونونه ترلاسه کړل
په وروستۍ داوطلبۍ کې افغان لوبغاړو د پام وړ مالي تړونونه ترلاسه کړل.
فضلالحق فاروقي د افغان لوبغاړو په ډله کې تر ټولو جګ تړون ترلاسه کړ او له ام آی امارات لوبډلې سره یې د درې سوه او اتیا زره امریکايي ډالرو پر ارزښت تړون لاسلیک کړ.
رحمانالله ګربز له ګلف جاینټس لوبډلې سره د درې سوه او لس زره ډالرو پر ارزښت خپل قرارداد وساته او اللهمحمد غضنفر له ام آی امارات سره د یو سل او پنځوس زره ډالرو پر ارزښت قرارداد ترلاسه کړ.
دغه راز محمد نبي له شارجه واریرز سره د یو سل او څلوېښت زره ډالرو او ګلبدین نایب له ابوظبي نایټ رایډرز سره د پنځه اویا زره ډالرو پر ارزښت تړونونه لاسلیک کړل.
دا تړونونه په نړیوالو شلآوریزو سیالیو کې د افغان لوبغاړو د مخ پر زیاتېدونکي ارزښت او غوښتنې څرګندونه کوي؛ ځکه افغان لوبغاړي د توپوهنې او توپاچونې په دواړو برخو کې د پام وړ وړتیا لري.
آی ال ټي ۲۰ د افغان کرکټ د ودې لپاره مهم فرصت دی
د افغانستان کرکټ بورډ اجرائیوي رییس نصیب خان ځدراڼ د آی ال ټي ۲۰ سیالیو په پنځم پړاو کې د ۲۵ افغان لوبغاړو ګډون د هېواد د کرکټ د ودې لپاره یوه مهمه لاسته راوړنه بللې ده.
نوموړي د افغانستان او متحده عربي اماراتو د کرکټ بورډونو او آی ال ټي۲۰ ترمنځ د سټراټیژیکې همکارۍ پر ارزښت ټینګار کړی او څرګندوي، چې دغې همکارۍ افغان لوبغاړو ته د لوبېدو فرصتونه برابر کړي او په افغانستان کې یې د کرکټ د پراختیا زمینه هم برابره کړې ده.
د آی ال ټي۲۰ سیالیو پنځم پړاو به د ۲۰۲۶ز.کال د نومبر له یوویشتمې د ډسمبر تر شلمې دوام وکړي، چې په کې به یې د متحده عربي اماراتو په بېلابېلو لوبغالو کې ۳۴ لوبې ترسره شي.
د دغو سیالیو دفاعي اتله ډیزرټ وایپرز لوبډله به د نومبر پر یوویشتمه په پرانیستونکې لوبه کې له ام آی امارات سره مخ شي.
د آریانا راډیو ټلویزیون په افغانستان کې د دغو سیالیو د خپرولو ځانګړي حقونه ترلاسه کړي او د هېواد د کرکټ مینهوال به وکولی شي، چې ټولې ۳۴ لوبې پر ژوندۍ بڼه وګوري.
په دغو سیالیو کې د ۲۵ افغان لوبغاړو ګډون او په هره لوبډله کې د لږ تر لږه دوه افغان لوبغاړو د شتون شرط، د افغانستان د کرکټ د مخ پر ودې وړتیاوو د څرګندولو لپاره یو مهم فرصت بلل کېږي.
لوبی
ارمان افسي استقلال کابل ته پنځه پر صفر ماتې ورکړه
د افغانستان د اتلانو لیګ شپږم پړاو به د دوشنبې پر ورځ، د نومبر پر شپاړلسمه، د عینو مېنې او آریانا افسي ترمنځ په لوبه پای ته ورسېږي.
د افغانستان اتلانو لیګ په لوبو کې ارمان افسي استقلال کابل ته ۵ پر ۰ ماتې ورکړه.
سلیمان آریا د لوبې په لومړۍ دقیقه کې ارمان افسي ته لومړی ګول وواهه. رستمي په څلورڅلوېښتمه دقیقه کې دوهیم ګول وواهه او لومړۍ نیمایي د ارمان افسي د دوه ګولونو پر بریا پای ته ورسېده.
په دوهیمه نیمایي کې مالکوم اشعیا شا په شپږپنځوسمه دقیقه کې درېیم ګول وواهه.
د ارمان افسي لوبډلمشر حفیظ مهجور په نههشپېتمه دقیقه کې څلورم ګول وواهه او دامولا آکاني په نوییمه دقیقه کې پنځم ګول وواهه.
حفیظ مهجور د لوبې په پای کې د ډګر غوره لوبغاړی وټاکل شو.
د افغانستان د اتلانو لیګ روشن پایلوبه دوشنبه کېږي
د افغانستان د اتلانو لیګ شپږم پړاو به د دوشنبې پر ورځ، د نومبر پر شپاړلسمه، د عینو مېنې او آریانا افسي ترمنځ په لوبه پای ته ورسېږي.
په دې سیالیو کې ۱۰ لوبډلو ګډون کړی او د ۹ اوونیو په اوږدو کې یې د تګراتګ ۹۰لوبې ترسره کړې دي.
د دغو سیالیو وروستۍ لوبه به په ټول هېواد کې د آریانا راډیو ټلویزیون له لارې پر ژوندۍ او ځانګړې بڼه خپره شي.
لوبی
په آی ال ټي ۲۰ لیګ کې د افغان او اماراتي لوبغاړو ګډون اړین شو
د نویو اصولو له مخې؛ د دغه لیګ ټولې شپږ لوبډلې باید په خپل یوولس کسیز لړلیک کې لږ تر لږه د متحده عربي اماراتو دوه، د افغانستان دوه او د کرکټ نړیوالې شورا د همکارو غړيو هېوادونو یو لوبغاړی ولري.
د ډيپي ورلډ نړیوال شلآوریز لیګ( آی ال ټي ۲۰) د خپل پنځم پړاو لپاره د لوبو نوي اصول اعلان کړي، چې له مخې به یې په هره لوبډله کې د متحده عربي اماراتو او افغانستان لوبغاړو ته د لوبې په پیلني یوولس کسیز لړلیک کې ځانګړی ځای ورکړ شي.
د نویو اصولو له مخې؛ د دغه لیګ ټولې شپږ لوبډلې باید په خپل یوولس کسیز لړلیک کې لږ تر لږه د متحده عربي اماراتو دوه، د افغانستان دوه او د کرکټ نړیوالې شورا د همکارو غړيو هېوادونو یو لوبغاړی ولري.
دغه بدلون د افغانستان کرکټ لوبغاړو ته اړین فرصت برابروي؛ ځکه د سیالیو په ټول بهیر کې به په هره لوبډله کې لږ تر لږه دوه افغان لوبغاړي د لوبې په پیلني یوولس کسیز لړلیک کې ولوبېږي.
دغه شرط به د لوبې پر مهال د لوبغاړو د بدلولو او د ځانګړو بدیل لوبغاړو د کارولو پر وخت هم پر ځای وي.
که د متحده عربي اماراتو، افغانستان یا د کرکټ د همکارو غړيو هېوادونو کوم لوبغاړی له لوبې ووځي؛ نو که لوبډلې یوازې د اړوندې ډلې لږ تر لږه ټاکل شوی شمېر لوبغاړي غوره کړي وي، باید پر ځای یې د هماغې ډلې بل لوبغاړی ولوبوي.
دا نوي اصول د آی ال ټي ۲۰ لیګ د هغو پراخو هڅو برخه ده، چې موخه یې د سیمې او د کرکټ نړیوالې شورا د همکارو غړیو هېوادونو د لوبغاړو ونډې پیاوړي کول او د نوموتو نړیوالو لوبغاړو ترڅنګ ځوانو او مخ پر ودې لوبغاړو ته د ډېرو فرصتونو برابرول دي.
دغه لیګ د سر د ټپ له کبله د لوبغاړو د بدلولو اصول هم بدل کړي دي. له دې وروسته به لوبډلې اړ نه وي، چې د لوبې له پیل مخکې د احتمالي بدیل لوبغاړو نوملړ وړاندې کړي؛ خو هر بدیل لوبغاړی باید طبي تائید ولري، له ټپي شوي لوبغاړي سره د لوبې د وړتیا له پلوه ورته وي او د لوبڅار اجازه ترلاسه کړي. د لوبغاړو د لږ تر لږه ونډې شرطونه به هم پر خپل ځای وي.
په نورو بدلونونو کې د« توپوهونکي د سیمې» پر نوم د نوي اصل رامنځته کول شامل دي، چې له مخې به یې د توپ د پراخې یا وایډ پرېکړه د توپوهونکي د آف او لګ دواړو لوریو ته کېږي.
دغه راز د ۶۰ ثانیو د تمساعت اصول به له دې وروسته د توپوهنې پر لوبډلې هم پلي کېږي او یوازې د توپاچوونکې لوبډلې پورې به محدود نهوي.
د توپوهنې لوبډلې ته به د آورونو ترمنځ په ټاکلي وخت کې د نهچمتووالي له کبله دوه ځله خبرداری ورکول کېږي؛ خو له درېیمې سرغړونې وروسته به سیالې لوبډلې ته د جرمې پنځه منډې ورکړ شي.
د آی ال ټي ۲۰ لیګ پنځم پړاو به د ۱۴۰۵ لمریز لېږدیز کال د لړم له دېرشمې څخه د لیندې نههویشتمې / د ۲۰۲۶ز.کال د نومبر له یوویشتمې څخه د ډسمبر تر شلمې پورې دوام وکړي، چې شپږ لوبډلې به په کې ګډون وکړي او د نړۍ یو شمېر نوموتي کرکټ لوبغاړي به ولوبېږي.
تمه ده، چې د افغانستان د کرکټ نوموتي لوبغاړي راشد خان او فضلالحق فاروقي د امآی امارات او محمد نبي د شارجه واریرز لوبډلې په ګټه ولوبېږي. دغه راز به د نورو لوبډلو په ترکیب کې هم یو شمېر افغان لوبغاړي ولوبېږي.
د دې سیالیو لومړۍ لوبه به د لړم پر دېرشمه / د نومبر پر یوویشتمه په دوبۍ کې د ډیزرټ وایپرز او امآی امارات لوبډلو ترمنځ ترسره شي.
د افغانستان لپاره په هره لوبډله کې د لږ تر لږه دوه لوبغاړو د لوبېدا تضمین ځانګړی ارزښت لري؛ ځکه افغان لوبغاړو ته به د نړیوالو سیالیو د تجربې، د وړتیاوو د ښودلو او د سیمې په یوه مخکښ شلآوریز لیګ کې د پام وړ ونډې فرصت برابر کړي.
د دغو سیالیو ټولې لوبې به په افغانستان کې د آریانا راډیو او ټلویزیون (ATN) له لارې پر ژوندۍ او ځانګړې بڼه خپرې شي. مینهوال کولی شي د سیالیو د تازه معلوماتو، مهالوېش او نورو خبرونو لپاره د آریانا راډیو او ټلویزیون د خواله رسنیو پاڼې هم وګوري.
-
تازه خبرونه4 days agoعراق له کردستان څخه افغانستان ته د تېلو د احتمالي قاچاق څېړنه کوي
-
سیمه ییز خبرونه4 days agoد سعودي عربستان په مکه کې د دوه توغندیو د شنډولو پاتې شوني لوېدلي
-
تازه خبرونه4 days agoافغانستان او ازبکستان د مالدارۍ په برخه کې د همکاریو پر پراختیا هوکړه وکړه
-
سوداگري4 days agoپه کابل کې د اسلامي پانګونې د پراختیا پر لارو چارو خبرې وشوې
-
تحول5 days agoتحول: کابل ته د روسیې د لوړپوړي پلاوي سفر
-
تازه خبرونه4 days agoد ریاستالوزراء اقتصادي مرستیالۍ د سوالګرۍ د مدیریت طرحه نړیوالو بنسټونو ته وړاندې کړه
-
تازه خبرونه1 day agoترکیې یونان ته د اوښتو په هڅه کې ۳۵ افغان کډوال ونیول
-
لوبی1 day agoپه آی ال ټي ۲۰ لیګ کې د افغان او اماراتي لوبغاړو ګډون اړین شو
