د کابل ۲۰۲۶ غوره لیګ د شنبې پر ورځ( د زمري اووه‌لسمه ) په کابل کې پیل شو، پامیر سټارز د سیالۍ په لومړۍ لوبه کې شمشاد ایګلز ته د ۱۱۶ منډو پر توپیر ماتې ورکړه.

دا ۲۰‌آوریزه لوبه د ایوبي کرکټ په لوبغالي کې ترسره شوه. شمشاد ایګلز پچه وګټله او لومړی یې د توپ اچونې پرېکړه وکړه.

پامیر سټارز په ۲۰آورونو کې د ۶ لوبغاړو پر سوځېدا ۳۰۷ منډې وکړې؛ عبدالمالک په ۴۸ توپونو ۱۱۷ منډې او هارون خان ۵۹ منډې جوړې کړې.

شمشاد ایګلز هدف ته د رسېدو لپاره په ۲۰آورونو کې د ۷ لوبغاړو پر سوځېدا ۱۹۱ منډې وکړې او له پامیر سټارز څخه یې د ۱۱۶ منډو پر توپیرماتې وخوړه. حیات الله ۵۵ او سمیع الله شینواري ۴۰ منډې جوړې کړې.

امیر ځاځي او وکیل احمد د پامیر سټارز لپاره دوه ـ دوه لوبغاړي وسوځول. په داسې حال کې، چې مسلم موسی او محمد ګل علیزي هم د شمشاد ایګلز لپاره دوه ـ دوه ویکټې واخیستې.

عبدالمالک د خپلې چټکې سلیزې له کبله د لوبې غوره لوبغاړی وټاکل شو؛ ځکه، نو پامیر سټار خپله لومړۍ بریا پر پرېکنده منډو پیل کړه.

د کابل غوره لیګ په سیالیو کې شپږ لوبډلې، پامیر سټارز، شمشاد ایګلز، کابل زلمي، سپین غر وریرز، آباسین ډیفنډرز او بند امیر؛ لوبیږي. دا سیالۍ کورنیو لوبغاړو ته پر لوړه کچه د سیالۍ او خپلې وړتیا د ښودلو زمینه برابروي.

د ۲۰۲۶ز.کال کابل غوره لیګ ټولې لوبې د آریانا ټلویزیون له لارې پر ژوندۍ او ځانګړې توګه خپرېږي، چې د افغانستان د کرکټ مینه‌وال یې پر زړه‌راکښونکې بڼه لیدلی شي.

د افغانستان کرکټ ملي لوبډلې د ایرلینډ پر وړاندې د پېنځه یو ورځۍ سیالیو لړۍ په دوه‌یمه لوبه کې د ۹۲ منډو پر توپیر له بریا سره د ۲۰۲۷ز.کال کرکټ نړیوال جام ته لار موندنه وروستۍ کړه.

افغانستان د جمعې پر ورځ د ایرلینډ په برېډي ښار کې کوربه لوبډله د ۹۲ منډو پر توپیر ماته کړه.

دا د افغانستان لپاره د دغې لړۍ لومړۍ بشپړه شوې لوبه وه؛ ځکه د دواړو لوبډلو لومړۍ لوبه د باران له کبله له یوې توپ اچونې پرته لغوه شوې وه.

د دې بریا په پایله کې افغانستان د هغو لوبډلو په ډله کې راغلو، چې د ۲۰۲۷ز.کال نړیوال جام ته یې پرته له خڼده لار وموندله.

تر اوسه د افغانستان ترڅنګ، سویلي افریقا، زیمبابوی، هند، اسټرالیا، نیوزیلینډ، پاکستان، انګلستان او سریلانکا د نړیوال جام ګډون ته لار موندلې ده.

سویلي افریقا او زیمبابوې د کوربه‌توب کوونکو هېوادونو په توګه له خنډ پرته نړیوال جام ته تللي دي.

په داسې حال کې، چې نورې لوبډلې د یو ورځنۍ نړیوالو سیالیو د مقام‌ټاکنې له مخې دې سیالیو ته رسېدلې دي.

د افغانستان له لارموندنې وروسته ویسټ انډیز نور نه‌شي کولی نړیوال جام ته د مستقیم صعود له پاتې ونډو څخه یوه ترلاسه کړي او ایرلینډ به د نړیوال جام د غوراوي په لس‌لوبډیزو سیالیو کې د ګډون له لارې د صعود هڅه کوي.

افغانستان او ایرلینډ به د دغې پېنځه لوبیزې لړۍ درې نورې لوبې هم ترسره کړي. درېیمه لوبه به د دوشنبې پر ورځ، څلورمه د اګست پر دولسمه او پېنځمه د اګست پر پېنځلسمه ترسره شي.

د ۲۰۲۷ز.کال کرکټ نړیوال جام به د سویلي افریقا، زیمبابوې او نامیبیا پر ګډ کوربه‌توب ترسره شي.

ځوان افغان کرکټ‌لوبغاړی زین‌الله احسان، چې یوازې څلور کاله مخکې سکاټلینډ ته یوه پناه‌غوښتونکی تللی و او یوازې څو کلمې انګلیسي یې زده‌وه؛ اوس د سکاټلینډ د کرکټ ملي لوبډلې لپاره د خپلې لومړۍ نړیوالې یو ورځنۍ لوبې ترسره کولو ته نږدې شوی دی.

د «نیشنل» د راپور له مخې: زین‌الله، چې اصلاً د ننګرهار ولایت دی؛ په ۲۰۲۲ز.کال کې له افغانستان څخه د اروپا له لارې له یوه ستونزمن سفر وروسته د سکاټلینډ په ګلاسګو ښار کې میشت شو.

هغه په افغانستان کې ډېری وخت ټیپ‌بال کرکټ کاوه او سکاټلنډ ته له رسېدا وروسته د خپلو ملګرو او مشر ورور پر هڅونه د کرکټ له یوه کلب سره یوځای شو.

زین‌الله سکاټلینډ ته له رسېدا یوازې ۱۴ ورځې وروسته په خپله لومړۍ کلبۍ لوبه کې ۴ ویکټې واخیستې او ډېر ژر یې د کلب اصلي لوبډلې ته لار وموندله.

دغه ۲۰ کلن لوبغاړی له هغه وخت راپدېخوا په کلبۍ، سیمه‌ییزو سیالیو او د سکاټلینډ له ۱۹ کلنو لوبډلې سره لوبېدلی او اوس د دغه هېواد د ملي لوبډلې غړیتوب هم ترلاسه کړی دی.

هغه په هند کې د کرکټ په وروستي شل‌آوریز نړیوال جام کې هم د سکاټلینډ په لوبډله کې شامل و؛ خو د اصلي لوبډلې په ترکیب کې د لوبېدا فرصت یې ونه موند.

زین‌الله تر اوسه د سکاټلینډ لپاره دوه نړیوالې شلآاوریزې لوبې کړي او اوس د کرکټ نړیوال جام د نړیوال لیګ سیالیو لپاره د دغه هېواد په لوبډله کې نیول شوی دی.

د هغه د پرمختګ کیسه یوازې د کرکټ تر ډګره محدوده نه‌ده. زین‌الله سکاټلینډ ته د رسېدا پر مهال نږدې په انګلیسي نه پوهېده او یوازې یې د «سلام» او «درود» په څېر څو کلیمې ویلی شوې؛ خو اوس له څلورو کلونو وروسته پر انګلیسي ژبه نږدې بشپړ برلاسی لري.

هغه وایي؛ له ټولو ستره هیله یې دا ده، چې د خپل مسلکي ژوند تر پایه د سکاټلینډ د ملي لوبډلې کمیس واغوندي.

زین‌الله همدارنګه ویلي: کورنۍ یې په افغانستان کې لومړی باور نه‌کاوه، چې هغه به د سکاټلینډ لپاره په ملي لوبډله کې ولوبېږي؛ خو کله، چې د لوبډلې نوملړ رسمي اعلان شو پلار یې ورسره اړیکه ونیوله او ورته یې وویل: خپلې هڅې روانې وساته؛ که په لوبه کې وي او که نه، باید یو ښه لوبغاړی او ښه انسان پاتې شي.