تازه خبرونه
طالبان باید د ډیموکراټیکو لارو پر بنسټ بدلون وکړي – ایران
د ایران د بهرنیو چارو وزیر جواد ظریف د هند، ایران او افغانستان ګدې انلاین ناستې( رایزینا) ته په ډاګه کړې، چې طالبان باید د ډیموکراټیکو لارو پر بنسټ بدلون وکړي.
جواد ظریف نن د رایزینا آنلاین خبرو اترو ته څرګنده کړې؛ دا امکان نلري، چې طالبان د ۱۹۹۰ زېږدیزو کلونو د فکرونو له مخې ډګر ته راودانګي؛ ځکه، چې نوی افغانستان د ۱۹۹۰ کلونو له افغانستان سره توپیر لري.
د ایران د بهرنیو چارو وزیر دا څرګندونې په داسې حال کې راپورته کیږي، چې د امریکا ولسمشر جوبایډن او د ناټو سرمنشي ینس سټولټنبرګ په ډاګه کړې، چې دوی به د می میاشتې له پیله له افغانستان څخه د بهرنیو ځواکونو د ایستلو بهیر پیل کړي.
متحده ایالاتو او ناټو ویلي، چې د وتلو دا بهیر به د روان کال د سپټمبر پر ۱۱ نېټه بشپړ شي.
له افغانستان څخه د بهرنیو ځواکونو وتلو په غبرګون کې د ایران د بهرنیو چارو وزیر خبرداری ورکوي، چې د خلا د رامنځته کولو لپاره د طالبانو هڅې به پدې معنی وي، چې افغانستان بلې جګړې ته ولاړ شي.
جواد ظریف څرګنده کړې، چې د افغانستان ګاونډیان نشي کولی یوه بله جګړه وزغمي او طالبان اړ دي، چې له حکومت او سیاسي ډلو سره خبرو ته راودانګي.
ظریف ویلي؛ مونږ باید کومه ځای رامنځته نکړو او طالبان هم باید د تشې د رامنځته کولو هڅه ونکړي. طالبان باید اوس په افغانستان کې له خلکو، حکومت او بېلابېلو ډلو سره هر اړخیزې خبرې خبرې پیل کړي.
دغه راز په دې انلاین خبرو کې افغان حکومت خوشبین شوی، چې د هېواد د امنیت بشپړ کنټرول به ترلاسه کړي.
د ملي امنیت شورا سلاکار حمدالله محب د رایزینا دې ناستې ته ویلي، چې د بهرنیو ځواکونو وتل یو ښه فرصت دی؛ خو طالبانو ته پکار نده، چې غوږونه پرې کاڼه او د سولې بهیر ته شا راواړوي.
حمدالله محب زیاته کړې؛ ولسمشر غنی د اعلی سرقومندان په توګه ښایي د لیږد بهیر د مشرتابه لپاره ترټولو ښه شخص وي. هغه په ۲۰۱۴ کال کې د امریکا او ناټو له ځواکونو افغان ځواکونو ته د لېږد د بهیر مشري کړې ده. کله، چې له افغانستان څخه ډېر بهرني سرتېري ووتل. په راتلونکیو ورځو کې مونږ به یوه ډله وټاکو، چې د لیږد پر بهیر له بهرنیو ځواکونو سره ګډ کار وکړي.
همدارنګه نوی ډیلی هم د غونډې د ګډونوال په توګه د وضعیت په اړه اندېښمن دی؛ د هند د بهرنیو چارو وزیر وايي، چې که طالبان بدل شوي ندي، افغانستان او نړۍ بدله شوې او دوی باید شا ته ونګوري.
د هند د بهرنیو چارو وزیر ایس جی شنکر ویلي: که مونږ د افغانستان تاریخ ته وګورو بدبختانه د افغانستان ګاونډیو له دې هم منفي رول لوبولی دی. لکه څنګه، چې ما په دوشنبه کې ویلي وه، افغانستان دوه اړخیزې سولې ته اړتیا لري؛ پخپله سوله او له ګاونډیو سره سوله. د افغانستان ګاونډیان باید افغانانو ته اجازه ورکړي ، چې د افغانستان د خلکو په ګټه هڅې تر سره شي.
د یادونې ده، چې په افغانستان کې د نوې جګړې د پیل او د سرتېرو د وتلو د اندېښنو تر څنګ د ایران بهرنیو چارو وزیر په داګه کړې؛ تهران داسې شواهد تر لاسه کړي، چې ځینې کړۍ داعش له عراق او سوریې څخه افغانستان ته لېږدوي.
تازه خبرونه
تېر ۲۰۲۳ کال د افغانستان د خلکو لپاره د سترو ننګونو کال و -راپور
په ۲۰۲۴ کال کې به د افغانستان شاوخوا ۱۵ اعشاریه ۸ میلیون خلک د خوړو د خوندیتوب له بحران او بېړنۍ کچې سره مخ شي.
په افغانستان کې د ملګرو ملتونو ټولنې د ۲۰۲۳ کال د پایلو په کلني راپور کې ویلي، چې په افغانستان کې میلیونونه وګړي له لوږې او خوارځواکۍ سره مخ دي، چې ډېري یې خپلې لومړنۍ اړتیاوې پوره کولی نشي.
ملګرو ملتونو څرګنده کړې، چې بشري ناورین په ۲۰۲۳ کال کې هم دوام درلود او دغه هېواد یوه لسیزه شاه تګ کړی او دا مهال د افغانستان نیمايي وګړي په بې وزلۍ کې ژوند کوي.
د اقتصاد وزارت مسلکي مرستیال عبداللطیف نظري له افغانانو سره د بشري مرستو پر اړتیا ټینګار کوي او زیاتوي، چې دغه وزارت په هېواد کې د فقر او لوږې د ختمولو لپاره مناسب پلانونه لري.
ملګرو ملتونو په راپور کې راغلي، چې له ۲۰۲۱ کال راپدیخوا د اقتصادي تولیداتو کچه یو پر څلورمه راټیټه شوې او د نړیوال بانک د راپور له مخې دا مهال د افغانستان نیمايي نفوس په بېوزلۍ کې ژوند کوي.
دا په داسې حال کې ده، چې ملګرو ملتونو اندېښنه ښودلې او څرګندوي؛ دوی له افغانستان سره د مرستو د دوام لپاره د بودجې له کمښت سره مخ دي.
تازه خبرونه
ملګرو ملتونو تېر کال په افغانستان کې د اوبو ۴۷۰ کیلومټره کانالونه جوړ کړل
د خوړو نړيوال پروګرام ویلي، چې تېر کال يې په افغانستان کې د سيمهييزو ټولنو پر همکارۍ د شاوخوا ٤٧٠ کيلومټرو پر اوږدوالي د اوبو کانالونه جوړ کړي دي.
د دې پروګرام د افغانستان برخې د چارشنبې پر ورځ (د وري نههویشتمه ) په ایکس پاڼه کې لیکلي؛ په افغانستان کې کروندګر اوبو ته له لاسرسي پرته خپل ژوند روان ساتلی نشي.
دغه راز څرګنده شوې؛ د اوبو کانالونو له کروندګرو سره مرسته کړې، چې خپلو کورنیو ته خواړه برابر کړي او خپل اضافي تولیدات او محصولات وپلوري.
د خصوصي سکتورغړي هم وايي؛ د خوړو نړیوال پروګرام لهخوا په هېواد کې د اوبو د مدیریت لپاره د کانالونو له جوړولو هرکلی کوي او څرګندوي، چې د هېواد د اوبو مدیریت کولی شي افغانستان له فقر او اقتصادي بحران څخه وژغوري.
دا په داسې حال کې ده، چې له څو کلونو وچکالۍ وروسته؛ وروستیو اورښتونو د افغانستان کروندګر هیله من کړي، چې راتلونکی کال به ښه حاصلات ولري.
تازه خبرونه
په بیجینګ کې د چین او افغانستان درېیمه اقتصادي ناسته تر سره شوه
په بیجينګ کې د افغانستان اسلامي امارت او د چين ولسي جمهوريت د بهرنيو چارو وزارتونو د اړوند سياسي څانګو پر مشرۍ د بشري مرستو او اقتصادي بيارغونې پر ميکانيزمونو درېيمه ناسته ترسره شوه.
د افغانستان بهرنیو چارو وزارت ویاند عبدالقهار بلخي په ایکس پاڼه کې لیکلي، چې په دې ناسته کې د افغانستان د بهرنيو چارو وزارت پر استازیو سربېره د صنعت او سوداګرۍ، کانونو او پټروليم، د کډوالو او بېرته راستنېدونکیو چارو او د طبيعي پېښو پر وړاندې د امارت وزارت استازو ګډون کړی و.
دغه راز په دې ناسته کې د چين د سوداګرۍ، طبيعي سرچينو، د چين نړيوالې پراختيايي ادارې او نړيوالې همکارۍ ادارو استازو هم برخه اخیستې وه.
د بهرنیو چارو وزارت د څرګندونو له مخې؛ په دې ناسته کې له تېرو دوه نيمو کلونو راپدیخوا د طبيعي پېښو، جبري راستانه شویو کډوالو او روغتيا په برخه کې د مرستو پر میکانیزمونو بیا کتنه وشوه.
افغان پلاوي د چين د مرستو د ګټورتوب لپاره خپل وړانديزونه او سلا مشورې چينايي اړوند لوري ته وړاندې کړل.
چينايي لوري ژمنه کړې، چې له افغانستان سره به د چين بشري مرستې د افغان لوري د اړتياوو او لومړيتوبونو له پام کې نيولو سره تنظيم کړي. دغه راز به له افغانستان سره د جبري راستانه شویو کډوالو د مېشتېدو په برخه کې د چين د سل میلیون يوانو په مرستو کې د افغان لوري وړانديزونه هم په پام کې ونيول شي.
د چين سره صليب ټولنې ژمنه کړې، چې په چين کې به د افغان ماشومانو د زړه ناروغيو د درملنې د بيا پيل زمينه هم برابره کړي.
د عبدالقهار بلخي د څرګندونو له مخې؛ د افغانستان د اقتصادي بيارغونې ميکانيزم په چوکاټ کې د دواړو هېوادونو ترمنځ د سوداګرۍ پر زياتوالي په ځانګړي توګه چين ته د زیاتو افغان توکو د صادرولو د زمينې برابرولو، وړتیا لوړونې او په افغانستان کې د کانونو او معاصرې سوداګرۍ په برخه کې د چين د پانګونې د فرصتونو په اړه هر اړخیزې خبرې وشوې.
دواړو لوريو چين ته د افغانستان د جلغوزو له صادراتو وروسته د انارو د صادراتو زمينې د برابرولو د هرکلی ترڅنګ په افغانستان کې د نفتو د استخراج کچې لوړولو او د لوګر مس عینک کان د استخراج د پيلولو په برخه کې د وروستيو پرمختګونو په اړه خبرې وکړې او ټينګار وشو، چې د چارو د چټکتيا پر طرحو به غور وشي.
افغان لوري د چين پر ملاتړ د افغانستان د حکومت په ګڼو وزارتونو او ادارو کې د ملکي مامورينو د وړتیا لوړونې لپاره له روزنيزو پروګرامونو او افغانانو ته د سکالرشپونو د لړۍ له پراخولو هرکلی وکړ.
ویل کیږي، چې په دې ناسته کې د واخان اقتصادي دهلیز د اهميت او احتمالي ګټو او د دې کوريډور د پرانيستو پر امکاناتو هم بحثونه شوي دي.
-
لوبی3 days ago
د افغانستان اتلانو ليګ د درېيم پړاو سیالیو پچهاچونه پای ته ورسېده
-
ساینس او ټیکنالوژي2 days ago
اپل شرکت د نړۍ د تر ټولو د لوی ګرځند پلورونکي دریځ له لاسه ورکړ
-
سیمه ییز خبرونه4 days ago
پر ایران به د اسرائیلو برید له سخت ځواب سره مخ شي
-
تازه خبرونه3 days ago
د کابل په هوايي ډګر کې د ۲۰۲۱ ز. کال ځانمرګی بریدګر عبدالرحمن لوګری و- امریکا
-
سیمه ییز خبرونه4 days ago
ایران پر اسرائیلو د بې پیلوټه الوتکو او توغندیو غچ اخیستونکی برید ترسره کړ
-
نړۍ1 day ago
امريکا او متحدین یې پر ايران د نورو بنديزونو لګولو هڅې کوي
-
نړۍ3 days ago
امریکا به پر ایران د اسرائیلو په ځوابي برید کې برخه وانخلي
-
تازه خبرونه2 days ago
ازبکستان، سعودي عربستان او قطر پر افغانستان او افغان – ټرانس پټلۍ خبرې وکړې