تازه خبرونه
له اسلامي امارت سره د نړۍ تعامل د ټولو هېوادونو په ګټه دی ـ سراج الدین حقاني
د کورنیو چارو وزارت چارسمبالي سراج الدین حقاني شنبه د چنګاښ ۲۵ د خوست ولایت د صبریو د عالمانو په غونډه کې ویلي؛ افغانستان د نړۍ کوم هېواد ته ګواښ ندی او د مثبتو دوه اړخیزو اړیکو د جوړولو وړتیاوې لري.
سراج الدین حقاني خوست ولایت ته د خپل سفر په ترڅ کې له ټولو هېوادونو سره ډیپلوماټیکې اړیکې مهمې وبللې او ټینګار یې وکړ، چې له اسلامي امارت سره د نړۍ تعامل د ټولو هېوادونو په ګټه دی.
د کورنیو چارو وزارت چارسمبالي له نړیوالې ټولنې غوښتي، چې اسلامي او افغاني عنعناتو ته درناوی وکړي او د نړیوالو قوانینو پر بنسټ دې اسلامي امارت پر رسمیت وپېژني.
هغه ویلي: د نړیوالو قوانینو او د اسلامي او افغاني عنعناتو له مخې مونږ وپېژنئ؛ که مو ونه پېژنئ، نو مونږ به خپلو خلکو ته ووایو، چې افغانان بې غیرته ندي او دوی اوس هم د تېرو شل کلونو په څېر مبارزه کولی شي.
سراج الدین حقاني له اسلامي امارت سره د نړۍ تعامل د ټولو هېوادونو په ګټه وباله او ټینګار یې وکړ، چې په اوسني وضعیت کې افغانستان او نړۍ متقابلې اړتیاوې لري.
هغه وایي: زه وایم؛ دا د دوی په خیر ده، چې له اسلامي امارت سره دیپلوماټیک تعامل وکړي. دوی مونږ ته اړتیا لري او دوی به سبا ته له مونږ سره د کوم اصولو او کوم رسميت له مخې خبرې کوي.
د ټولګډونه حکومت رامنځته کول، د بشري حقونو په ځانګړي توګه د ښځو او توکمیزو اقلیتونو د حقونو خوندیتوب او له افغانستان څخه د نورو هېوادونو پر وړاندې د ترهګریزو ګواښونو مخنیوی د اسلامی امارت په رسمیت پېژندلو لپاره د نړیوالې ټولنې له اساسی شرطونو څخه دي.
په تېرو يوولس مياشتو کې د افغانستان له نوي حکومت سره د تعامل د څرنګوالي په اړه د سيمې او نړۍ په بېلابېلو هېوادونو کې ډېرې غونډې وشوې؛ خو تر اوسه کوم هېواد د اوسني حکومت رسميت پېژندلو ته حاضر شوی ندی.
که څه هم اسلامي امارت وايي، چې د رسمیت پېژندلو لپاره یې د عالمانو د لویې غونډې د جوړولو په ګډون یې ټول شرایط پوره کړي؛ خو داسې ښکاري، چې تر دې دمه د نړیوالې ټولنې قناعت ندی حاصل شوی او د نوي افغان حکومت د مشروعیت بحران اوس هم پر ځای پاتې دی.
تازه خبرونه
جاپان د افغانستان له سیلاب ځپلیو سره د بېړنیو مرستو ژمنه وکړه
په افغانستان کې د جاپان سفارت د پنجشنبې پر ورځ په ډاګه کړه، چې د افغانستان د شمال له سیلاب ځپلیو خلکو سره به بېړنۍ مرستې وکړي.
د سفارت د خپرې شوې خبرپاڼې له مخې؛ دا مرستې به د جاپان د نړيوالې همکارۍ ادارې (JICA) له لارې د سره صليب او سرې مياشتې ټولنې (IFRC) او افغاني سرې مياشتې ټولنې (ARCS) پر همکارۍ ترسره شي.
دا مرست خیمې، کمبلې او نور اړین توکي رانغاړي.
په یادې خبرپاڼه کې راغلي؛ جاپان پرېکړه کړې، چې ډېر ژر به د افغانستان د سيلاب ځپلیو خلکو د مرستې لپاره بېړنۍ مرستې وکړي. مونږ تل د افغانستان د خلکو تر څنګ ولاړ یوو.
دغه راز د ملګرو ملتونو د بشري چارو د همغږۍ دفتر (OCHA) ویلي، چې په بغلان، بدخشان او تخار ولایتونو کې د سختو بارانونو او سیلابونو له کبله ۸ زره ۹۷۵ کورونه ویجاړ شوي او یا هم زیانمن شوي دي.
روسیې هم د اړتیا په صورت کې د مرستې ژمنه کړې ده.
دا په داسې حال کې، چې د اسلامي همکاریو ټولنې (OIC) هم له اسلامي هېوادونو او مرستندویه ټولونو غوښتي، چې د افغانستان له سیلاب ځپلیو سره مرسته وکړي.
تازه خبرونه
د ترکیې سفیر د افغانستان سیلاب ځپلیو ته د ۶۷۰ ټنو مرستې اعلان وکړ
په کابل کې د ترکیې سفیر د اقتصاد وزارت له چارسمبالي سره په کتنه کې څرګنده کړې، چې سبا (جمعه د غویی ۲۸ ) ته به د افغانستان د وروستیو سیلاب ځپلیو لپاره د لومړنیو توکو څه باندې۲۰ ټنه مرسته راولېږدول شي.
د اقتصاد وزارت د خبرپاڼې له مخې؛ جنګ اونال له دین محمد حنیف سره په کتنه کې له ترکیې څخه د ۶۵۰ ټنو نورو بشري مرستو له رالېدولو هم خبر ورکړی، چې په کې خیمې، خوراکي توکي، درمل، جامې او نور توکي شامل دي.
هغه دا ډاډ هم ورکړی، چې افغانستان ته به دا مرستې د اوسپنېپټلۍ له لارې د هرات تورغنډۍ بندر ته رادننه شي.
په دې کتنه کې دین محمد حنیف له دغو مرستو څخه د هرکلي تر څنګ ویلي، چې د ترکیې هېواد د تاریخ په اوږدو کې د افغانستان یو ښه دوست او همکار پاتې شوی دی.
تازه خبرونه
ملګري ملتونه غواړي په افغانستان کې د ځمکو خړبولو لپاره سولري پمپونه ولګوي
د ریاست الوزراء اداري مرستیال عبدالسلام حنفي د سې شنبې پر ورځ ( د غویی پېنځهویشتمه ) د ملګرو ملتونو د پروژې خدمتونو د دفتر (UNOPS) له اجرائیوي رییس جورج موریرا داسیلوا سره وکتل.
په دې کتنه کې جورج موریرا داسیلوا اداري مرستيال ته د خپلو تېرو هڅو او لاسته راوړنو په اړه معلومات ورکړل او څرګندوي؛ دا اداره غواړي، چې په افغانستان کې د سولري پمپونو پر لګولو د کرنيزو ځمکو د خړوبولو يوه نوې پروژه پيل کړي.
عبدالسلام حنفي د دې ادارې د فعالیتونو او لاسته راوړنو د ستاینې ترڅنګ ویلي، چې اسلامي امارت په افغانستان کې د (UNOPS) ادارې له هڅو ملاتړ کوي او د پروژو د پلي کولو لپاره یې لازمې اسانتیاوې برابروي.
ویل کیږي، چې عبدالسلام حنفي له ټولو نړیوالو مرستندویه بنسټونو وغوښتل، چې کروندګرو ته د کوکنارو د بدیل کښت او افغان ځوانانو ته د کار د زمینې په برابرولو کې همکاري وکړي.
-
تازه خبرونه5 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
لوبی3 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه4 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
تازه خبرونه3 days ago
د یوناما استازې د ایران له بهرنیو چارو وزیر سره وکتل
-
تازه خبرونه3 days ago
په ننګرهار کې د ناکامورا کانال پروژه بشپړه شوه
-
تازه خبرونه3 days ago
ملګرو ملتونو د دې ټولنې په عمومي ناسته کې د افغانستان د رایې حق وځنډاوه
-
نړۍ4 days ago
انټوني بلینکن اوکراین ته رسېدلی
-
د هوا حالاتو بدلونونه2 days ago
په تېرو ۲ زره کلونو کې د تېر کال اوړی له ټولو تود و – څېړنه