په افغانستان کې د قطر سفیر د ترکیې سفارت د مرستیال له دندې سره د مخه‌ښې په لیدنه کې د دواړو هېوادونو د اړیکو او همکاریو په پیاوړتیا کې د هغه پر رول ټینګار وکړ.

په کابل کې د قطر سفارت ویلي، چې د دغه هېواد سفیر ډاکټر میردف بن علي القاشوطي په کابل کې د ترکیې د سفارت د ډیپلوماتیک پلاوي له مرستیال بلال امره سره د مخه‌ښۍ لیدنه کړې ده.

دغه لیدنه په افغانستان کې د ترکي ډیپلومات د دندې له پای ته رسېدا سره هم‌مهاله شوې ده.

د قطر سفیر په دې لیدنه کې د دواړو هېوادونو د اړیکو او همکاریو د پیاوړتیا په برخه کې د بلال امره له هڅو او همکاریو مننه کړې او په راتلونکو دندو کې یې ورته د بریا هیله کړې ده.

د اسلامي امارت ویاند ذبیح‌الله مجاهد د یو شمېر ملکي او امنیتي چارواکو له تازه ګومارنو خبر ورکړی دی.

مجاهد په «ایکس» پاڼه کې لیکلي، چې د اسلامي امارت د رهبر د حکم پر بنسټ لاندې بدلونونه رامنځته شوي دي:

د کورنیو چارو وزارت پخوانی اداري مرستیال رحمت‌الله نجیب د بدخشان والي شوی دی.

د سرپل پخوانی والي احمدشاه دین‌دوست د بدخشان امنیه قومندان ټاکل شوی دی.

د ټولګټو چارو وزارت د سړکونو ساتنې او څارنې پخوانی مرستیال عبدالجبار معاون د کورنیو چارو وزارت اداري مرستیال ټاکل شوی دی.

د بدخشان پخوانی والي محمد اسماعیل غزنوي د ټولګټو چارو وزارت د سړکونو ساتنې او څارنې مرستیال شوی دی.

د لغمان پخوانی والي بختیار معاذ د سرپل والي ټاکل شوی دی.

د بدخشان پخوانی امنیه قومندان عبدالبصیر مظهري د کندهار د ټولګټو چارو رییس ټاکل شوی دی.

دغه بدلونونه په بدخشان، سرپل او کندهار ولایتونو کې د کورنیو چارو وزارت او د ټولګټو وزارت په یو شمېر ملکي او امنیتي بستونو کې رامنځته شوي دي.

د امریکا د کانګرس غړې عایشه وهاب ويلي؛ امریکا باید پرته له دې، چې په افغانستان کې کومه ډله واکمنه وي له دې هېواد سره ډیپلوماسي روانه وساتي. د هغې دا څرګندونې له هغې وروسته را پورته شوې، چې د امریکا استازو جرګې په ځانګړیو ټاکنو کې بریالۍ شوه او د دغه هېواد د کانګرس لومړنۍ افغان‌الاصل غړې شوه.

مېرمن وهاب هیله څرګنده کړې، چې مونږ به« هغوی(طالبان) د بشري حقونو، د ښځو د حقونو او مدني حقونو په برخو کې یوې سمې لارې ته سوق کړو.»

مېرمن وهاب ویلي: « امریکا باید ډیپلوماسۍ ته مخه کړي. پرته له دې، چې کومه ډله په واک کې وي، مونږ باید ډیپلوماسي عملي کړو او اړیکې ولرو.»

نوموړې د طالبانو مخالفې ډلې« جنګسالاران » بللي او استدلال کوي، چې د افغانستان ستونزې یوازې تر طالبانو پورې محدودې نه‌دي.

هغه وایي: « بېلابېل جنګسالاران هم شته، چې د واک غوښتونکي دي؛ خو طالبان نه‌دي. زما پر اند هغوی ټول ناکام او بې‌لارې شوي؛ ځکه د هېواد په ګټه کار نه‌کوي، بلکې خپلې شخصي ګټې تعقیبوي.»

د نوموړې ټینګار کړی: «مونږ ولیدل، چې ان د امریکا تر ملاتړ لاندې هم دغو جنګسالارو ډلو په عملي توګه هېواد چور کړ.»

هغې ویلي: افغانستان په وچه کې راګیر هېواد دی؛ د سیمې د بېلابېلو قدرتونو ترمنځ پروت دی او د پام وړ طبیعي سرچینې لري. امریکا باید لږ تر لږه له افغانستان سره د اقتصادي قراردادونو او همکاریو په برخه کې ونډه واخلي.

د یادونې ده، چې عایشه وهاب د کلیفورنیا د ایالتي سنا غړې ده.