د هند بهرنیو چارو وزارت په کابل کې د نشه‌یي توکو د درملنې پر روغتون د پاکستان وروستی هوايي برید سخت غندلې او هغه بې رحمانه او نه بښونکی بولي.

د وزارت په اعلامیه کې راغلي، چې دا یو “ظالمانه او نه‌بښونکی” برید دی، چې په کې د یوه روغتون ګڼ‌شمېر ملکي وګړي ووژل شول.

هند ټینګار کړی، چې دا ډول ودانیز بنسټونه هیڅکله پوځي هدف نشي ګڼل کېدی.

دغه راز د هند بهرنیو چارو وزارت دا پېښه “د افغانستان له ملي حاکمیت ښکاره سرغړونه” او د سیمې سولې او ثبات ته یو جدي ګواښ وباله او څرګندوي، چې دا عمل په سیمه کې د پاکستان د بې پروایۍ او تکراري چلند ښکارندویي کوي.

نوموړی زیاتوي؛ د روژې په میاشت کې د داسې برید ترسره کول، چې د مسلمانانو د سولې او پیوستون څلی دی؛ “نور هم د غندلو وړ” کوي او د روغتون او د هغې د ناروغانو پر نښه کولو لپاره هیڅ مذهبي یا اخلاقي توجیه نه‌لیدل کیږي.

هند له نړیوالې ټولنې غوښتي، چې د دې پېښې عاملان مسوول وګڼي او پر ملکي وګړو د نورو بریدونو مخه ونیسي.

په پای کې دې هېواد له زیانمنو کورنیو سره خپله خواخوږي څرګنده کړه؛ ټپیانو ته یې د روغتیا هیله وکړه او د افغانستان له حاکمیت او ځمکني بشپړتیا څخه یې خپل ملاتړ بیا تکرار کړ.

په کابل کې پر نشه‌یي توکو د روږدو روغتون له خونړي برید وروسته د سې‌شنبې پر ورځ( د کب شپږویشتمه) کورنیو چارو وزارت ویاند عبدالمتین قانع خبرداری ورکړی، چې د پاکستان پوځي رژیم به “غاښ ماتونکي” غبرګون ترلاسه کړي.

د دوشنبې پر شپه د کابل د څرخي‌پله په اړوند سیمه کې د روږدو پر ۲۰۰۰ بستریز امید روغتون برید لږ تر لږه ۴۰۰ کسان ووژل او ۲۵۰ نور یې ټپیان کړل.

قانع زیاته کړې، چې د ژغورنې هڅې نن( سې‌شنبه) سهار هم روانې دي او د ژغورنې ډلې تر کنډوالو لاندې جسدونه لټوي.

د افغانستان او پاکستان ترمنځ دا خونړۍ پېښه، چې له وروستیو اوونیو راپدېخوا د تاوتریخوالي زیاتېدا ښیي؛ په هېواد کې له هوایي او توپچي بریدونو سره مل ګنل شوي دي.