د اسلامي امارت د ویاند مرستیال حمدالله فطرت ویلي، چې د اسلامي امارت رهبر شیخ هبة‌الله آخوندزاده په کندهار ولایت کې د یو شمېر وزارتونو او ادارو د مسوولانو درې‌ورځنی اصلاحي سمینار ته د وینا پر مهال د اسلامي شریعت د اوصولو پر پلي کېدا او رښتیني خدمت ټینګار کړی دی.

د حمد الله فطرت د څرګندونو له مخې؛ د اسلامي امارت مشر په دې غونډه کې ویلي، چې د اسلامي امارت قوانین د اسلام له دین څخه اخیستل شوي او د څو کسانو د شخصي نظر پر بنسټ جوړ شوي ندي.

نوموړي زیاته کړې؛ د نظام د پیاوړتیا لپاره باید ټولې چارې د اسلامي شریعت له اوصولو سره سمې پر مخ یووړل شي.

دغه راز نوموړي ویلي، چې هبة‌الله آخوندزاده په خپلو خبرو کې د یتیمانو، کونډو، معلولانو، بې‌وزلو، کډوالو او بندیانو د حقونو پر اړتیا او ساتنې ټینګار کړی او د دغو قشرونو خدمت، روزنه او پالنه یې د حکومت له اساسي مسوولیتونو څخه بللي دي.

د اسلامي امارت مشر له مسوولانو غوښتي، چې خلکو ته پر اخلاص، شفقت او د اسلامي شریعت پر بنسټ خدمت او د هېوادوالو ستونزو او اړتیاوو ته پوره پاملرنه وکړي.

اروپایي ټولنې او د نړیوال مالي شرکت (IFC) د نړیوال بانک ډلې له غړیو سره د همږۍ له مخې په افغانستان کې د خصوصي سکټور د پیاوړتیا او د کاري فرصتونو د رامنځته کولو لپاره د ۵ میلیون یورو پر ارزښت یو نوی پروګرام پیل کړی دی.

د دې نوې هوکړې له مخې، دا بودجه به د افغانستان د خصوصي سکټور د ثبات پروګرام ملاتړ وکړي، چې موخه یې د کوچنیو او منځنیو سوداګرۍ وده، د افغان کار‌پنځوونکو( متشبثینو) هڅونه او مالي خدمتونو ته د لاسرسي پراخول دي.

دا نوښت د اروپايي ټولنې او نړيوال بانک د پراخو همکاريو يوه برخه ده، چې موخه يې په افغانستان کې د خصوصي سکټور پر بنسټ پراخې اقتصادي ودې ته وده ورکول دي. په دې پروګرام کې د ښځو، ځوانانو او راستنېدونکو اقتصادي ګډون ته ځانګړې پاملرنه شوې او د خصوصي سکټور له فعالانو سره به د سوداګريز چاپېريال د ښه کولو او د دوامدارو معيشتي فرصتونو د رامنځته کولو لپاره نږدې همکاري وشي.

ټاکل شوې، چې دا پروګرام له راتلونکې مياشتې پيل او د ۴۲ مياشتو لپاره به روان وي. د دې پروګرام اصلي تمرکز پر پېنځه بنسټیزو برخو دی، چې په کې د خصوصي سکټور د همغږۍ او ملاتړ پياوړتيا، د کوچنيو سوداګريو او نويو شرکتونو لپاره د ظرفیت لوړول، د مالي شموليت ښه‌والی، د کاري فرصتونو لپاره د خصوصي پانګې جذب او د خصوصي سکټور د پراخ ګډون له لارې د ښځو د اقتصادي مشارکت زياتېدا شامل دي.

په افغانستان کې د اروپايي ټولنې چارسمبالی ورنيکا بوسکووېچ پوخار ويلي؛ دا نوښت د افغانانو د ملاتړ په برخه کې د اروپايي ټولنې د هر اړخيزې ژمنې څرګندونه کوي، چې له بشردوستانه مرستو نيولې تر اوږدمهاله اقتصادي بيارغونې پورې پراخې هڅې رانغاړي.

همدارنګه د نړيوال بانک د منځني ختيځ، پاکستان او افغانستان لپاره سيمه‌ييز مدير خواجه آفتاب احمد ټينګار کړی، چې دا هوکړه د افغان کار‌پنځوونکو د ملاتړ لپاره د ګډې ژمنې څرګندونه ده.

ویل کیږي، چې د سوداګريزو کارونو پياوړتيا د خلکو د معيشـت د ساتنې او ان د اوسنیو ننګونو تر سختو شرايطو لاندې د هېواد د اقتصاد د باعزته بيارغونې يوه عملي لار هم ده.

د مالیې وزارت د ګمرکونو او عوایدو مرستیال عبدالمتین سعید له یو شمېر هندي پانګوالو سره د لیدنې پرمهال په افغانستان کې د پانګونې پر شته فرصتونو خبرې کړې دي.

د مالیې وزارت د خبرپاڼې له مخې؛ په دې لیدنه کې عبدالمتین سعید ټینګار کړی، چې د افغانستان اسلامي امارت صنعتکارانو او سوداګرو ته د پام وړ آسانتیاوې برابرې کړي او په دې اړه یې د ملاتړ رامنځته کولو هڅې روانې ساتلې دي.

نوموړي زیاته کړې، چې د افغانستان او هند اړیکې په ځانګړي توګه د سوداګرۍ او پانګونې په برخو کې د پراختیا په حال کې دي.

دغه راز هندي پانګوالو هم ژمنه کړې، چې په افغانستان کې به د انساني، کرنیزو او حیواني درملو د تولید، کرنې او کانونو د عصري ټکنالوژۍ کارونې او دغو برخو ته د افغان کدرونو د ظرفیت لوړونې لپاره د پروګرامونو پر برابرولو پانګونه وکړي.

ویل کیږي، چې یاده پانګونه کولی شي د کاري فرصتونو په رامنځته کولو، د تخنیکي پوهې په لېږد او د هېواد د اقتصادي ودې په برخه کې اغېزناک رول ولوبوي.