تازه خبرونه
له کډوالو سره به د ایران ناوړه چلند پر دوه اړخیزو اړیکو ناوړه اغېز ولري – مولوي متقي
د افغانستان د بهرنیو چارو وزارت چارسمبالي امیر خان متقي د ایران له سفیر سره په کتنه کې ویلي؛ په ایران کې له افغان کډوالو سره ناوړه چلند د دواړو هېوادونو پر اړیکو او د خلکو پر احساساتو ناوړه اغېز کوي.
دغه لیدنه په کابل کې، چې د یکشنبې پر ورځ ترسره شوې ده.
د افغانستان د بهرنیو چارو وزارت د ویاند عبدالقهار بلخي د څرګندونو له مخې: مولوي متقي د ایران سفیر ته ویلي؛ د ایران مشرتابه ته باید پیغام ورکړ شي، چې خپلو اړوند امنیتي چارواکو ته لارښوونه وکړي او په ځانګړي توګه سرحدي سیمو کې له افغان کډوالو سره د ناوړه چلند مخه ونیسي.
نوموړي زیاته کړې؛ له افغان کډوالو سره ناوړه چلند به ځینو عناصرو ته دسیسې او شخړې رامنځته کولو وخت ورکړي.
هغه دا هم ویلي، چې د کډوالو په توګه د مجرمینو څرګندېدل؛ د ټولو افغان کډوالو استازیتوب نکوي.
د افغانستان د بهرنیو چارو وزارت ویاند عبدالقهار بلخي ویلي؛ په کابل کې د ایران سفیر بهادر امینیان د دغو اندېښنو په ځواب کې ویلي، چې په ایران کې د امام علي رضا په زیارت کې د چړې له برید وروسته یو شمېر اشخاصو د دواړو هېوادونو ترمنځ د کرکې او نفاق د رامنځته کولو لپاره تبلیغاتي کمپاین پیل کړ.
د ایران سفیر ویلي، چې افغان کډوال په ایران کې “میلمانه” دي او په تېرو ۴۳ کلونو کې د کډوالو چلند د ایران له خلکو سره د دوی مینه او له ملګرتیا ډکې اړیکې ښیي.
هغه دا هم ویلي، چې حکومت یې له افغان کډوالو سره د ناوړه چلند اراده نلري؛ خو تل د دواړو هېوادونو ترمنځ د باور رامنځته کولو هڅه کوي.
څو ورځې مخکې په ایران کې د افغان کډوالو د ځورولو، وهلو او ناوړه کړنو له ترسره کېدو راپورونه ورکړ شوي دي.
د پنجشنبې پر ورځ په دې اړه د افغانستان د بهرنیو چارو وزارت د دوه یمې سیاسي څانګې مشر فیضان الله ناصري په کابل کې له ایراني ډیپلوماټانو سره وکتل او ورته یې په ایران کې له افغان کډوالو سره پر ناوړه چلند اندېښنه څرګنده کړې ده.
تازه خبرونه
جاپان د افغانستان له سیلاب ځپلیو سره د بېړنیو مرستو ژمنه وکړه
په افغانستان کې د جاپان سفارت د پنجشنبې پر ورځ په ډاګه کړه، چې د افغانستان د شمال له سیلاب ځپلیو خلکو سره به بېړنۍ مرستې وکړي.
د سفارت د خپرې شوې خبرپاڼې له مخې؛ دا مرستې به د جاپان د نړيوالې همکارۍ ادارې (JICA) له لارې د سره صليب او سرې مياشتې ټولنې (IFRC) او افغاني سرې مياشتې ټولنې (ARCS) پر همکارۍ ترسره شي.
دا مرست خیمې، کمبلې او نور اړین توکي رانغاړي.
په یادې خبرپاڼه کې راغلي؛ جاپان پرېکړه کړې، چې ډېر ژر به د افغانستان د سيلاب ځپلیو خلکو د مرستې لپاره بېړنۍ مرستې وکړي. مونږ تل د افغانستان د خلکو تر څنګ ولاړ یوو.
دغه راز د ملګرو ملتونو د بشري چارو د همغږۍ دفتر (OCHA) ویلي، چې په بغلان، بدخشان او تخار ولایتونو کې د سختو بارانونو او سیلابونو له کبله ۸ زره ۹۷۵ کورونه ویجاړ شوي او یا هم زیانمن شوي دي.
روسیې هم د اړتیا په صورت کې د مرستې ژمنه کړې ده.
دا په داسې حال کې، چې د اسلامي همکاریو ټولنې (OIC) هم له اسلامي هېوادونو او مرستندویه ټولونو غوښتي، چې د افغانستان له سیلاب ځپلیو سره مرسته وکړي.
تازه خبرونه
د ترکیې سفیر د افغانستان سیلاب ځپلیو ته د ۶۷۰ ټنو مرستې اعلان وکړ
په کابل کې د ترکیې سفیر د اقتصاد وزارت له چارسمبالي سره په کتنه کې څرګنده کړې، چې سبا (جمعه د غویی ۲۸ ) ته به د افغانستان د وروستیو سیلاب ځپلیو لپاره د لومړنیو توکو څه باندې۲۰ ټنه مرسته راولېږدول شي.
د اقتصاد وزارت د خبرپاڼې له مخې؛ جنګ اونال له دین محمد حنیف سره په کتنه کې له ترکیې څخه د ۶۵۰ ټنو نورو بشري مرستو له رالېدولو هم خبر ورکړی، چې په کې خیمې، خوراکي توکي، درمل، جامې او نور توکي شامل دي.
هغه دا ډاډ هم ورکړی، چې افغانستان ته به دا مرستې د اوسپنېپټلۍ له لارې د هرات تورغنډۍ بندر ته رادننه شي.
په دې کتنه کې دین محمد حنیف له دغو مرستو څخه د هرکلي تر څنګ ویلي، چې د ترکیې هېواد د تاریخ په اوږدو کې د افغانستان یو ښه دوست او همکار پاتې شوی دی.
تازه خبرونه
ملګري ملتونه غواړي په افغانستان کې د ځمکو خړبولو لپاره سولري پمپونه ولګوي
د ریاست الوزراء اداري مرستیال عبدالسلام حنفي د سې شنبې پر ورځ ( د غویی پېنځهویشتمه ) د ملګرو ملتونو د پروژې خدمتونو د دفتر (UNOPS) له اجرائیوي رییس جورج موریرا داسیلوا سره وکتل.
په دې کتنه کې جورج موریرا داسیلوا اداري مرستيال ته د خپلو تېرو هڅو او لاسته راوړنو په اړه معلومات ورکړل او څرګندوي؛ دا اداره غواړي، چې په افغانستان کې د سولري پمپونو پر لګولو د کرنيزو ځمکو د خړوبولو يوه نوې پروژه پيل کړي.
عبدالسلام حنفي د دې ادارې د فعالیتونو او لاسته راوړنو د ستاینې ترڅنګ ویلي، چې اسلامي امارت په افغانستان کې د (UNOPS) ادارې له هڅو ملاتړ کوي او د پروژو د پلي کولو لپاره یې لازمې اسانتیاوې برابروي.
ویل کیږي، چې عبدالسلام حنفي له ټولو نړیوالو مرستندویه بنسټونو وغوښتل، چې کروندګرو ته د کوکنارو د بدیل کښت او افغان ځوانانو ته د کار د زمینې په برابرولو کې همکاري وکړي.
-
تازه خبرونه5 days ago
الله ګل مجاهد د قتل پر تور ونیول شو
-
تازه خبرونه4 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
لوبی2 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه3 days ago
د یوناما استازې د ایران له بهرنیو چارو وزیر سره وکتل
-
تازه خبرونه4 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
سوداگري5 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه4 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه2 days ago
په ننګرهار کې د ناکامورا کانال پروژه بشپړه شوه