تازه خبرونه
ملګري ملتونه د افغانستان د وضعیت لپاره د یوې مناسبې حل لارې د موندلو په هڅه کې دي ـ امریکا
د امریکا د بهرنیو چارو وزارت ويلي؛ ملګري ملتونه هڅه کوي، چې د افغانستان د وضعیت لپاره یوه مناسبه حل لار ومومي؛ خو که د خبرو دا هڅې ناکامې شي امریکا، ملګري او متحدین به یې په اړه پرېکړه وکړي.
د دغه وزارت ویاند ند پرایس ويلي، له افغانستان سره د امریکا مرستې له نویو واکمنانو د ملاتړ معنا نلري او له خلکو سره به دغه مرستې روانې وي.
د امریکا د بهرنیو چارو وزارت ویاند ندپرایس وايي: مونږ د راتلونکیو مناسبو ګامونو ارزونه کوو؛ طالبان ( اسلامي امارت) به د دوی د هرعمل قیمت ادا کړي. مونږ د میز پر سر هر ډول پرېکړې لرو. مونږ له خپلو نړیوالو شریکانو او لوړ پوړیو چارواکو سره په اړیکه کې یوو او په افغانستان کې وضعیت له هغه څه سره څېړو، چې طالبان (اسلامي امارت) یې کوي.
د امریکا د بهرنیو چارو وزارت ویاند دا خبره رد کړه، چې ګواکې بشري مالي مرستې د اسلامي امارت د ملاتړ لپاره کیږي.
هغه وایي، دا مرستې د غيردولتي موسسو له لارې کیږي او ټولې هڅې دا دي، چې دا پيسې د افغانستان نویو واکمنانو ته ونه رسيږي او په مستقيمه توګه د خلکو د حالت ښه کولو لپاره وکارول شي.
ندپرایس زیاته کړې: د وروستیو پرېکړو په پایله کې ۸۳ سلنه مرستندویه موسسو، چې په افغانستان کې یې فعالیت کاوه؛ په دغه هېواد کې خپل فعالیتونه بند کړي دي. دا وضعیت زمونږ او نړیوالې ټولنې لپاره د منلو وړ ندی؛ ځکه ۲۰ میلیون افغانان د ژوند د دوام لپاره بشري مرستو ته اړتیا لري. طالبانو( اسلامي امارت) ته د مرستو پیسې نه ورکول کیږي، دا پیسې د غیر دولتي موسسو او مرستندویه کارمندانو لخوا کارول کیږي.
له بلې خوا په بروکسل کې د اروپايي ټولنې د بهرنیو چارو د وزیرانو شورا له غونډې وروسته د بهرنۍ پالیسۍ رییس خبریالانو ته ویلي، چې د وزیرانو شورا به د فبرورۍ په میاشت کې د افغانستان د وضعیت په اړه پرېکنده پرېکړې وکړي.
د اروپایي اتحادیې د بهرنۍ پالیسۍ رییس جوزف بوریل ویلي: مونږ په دې وروستیو کې د طالبانو( اسلامي امارت) لخوا پر ښځو د لګول شویو محدودیتونو په اړه خبرې وکړې. مونږ د وروستیو اقداماتو پایلې ارزوو او د اضافي میکانیزمونو له لارې به طالبان( اسلامي امارت) چې د ښځو او نجونو د حقونو څخه سرغړونې کوي، حساب ته را وبولو.
د جرمني د بهرنیو چارو وزیره هم خبرداری ورکوي، چې که اسلامي امارت په افغانستان کې ښځو ته له مرستندویه موسسو سره د کار کولو اجازه ورنکړي؛ نړیوالې مرستې به د افغانستان اړمنو خلکو ته ونه رسيږي.
د آلمان د بهرنیو چارو وزیره انالینا بربوک وایي: وضعیت د خلکو په ځانګړي توګه د ښځو لپاره پر ناورین اوښتی. که ښځې له نړیوالو موسسو سره کار ونکړي؛ له افغانستان سره به نوره مرسته ونشي. مونږ د نړیوالې ټولنې په توګه نشو کولی مرستې روانې وساتو.
دا په داسې حال کې ده، چې په افغانستان کې د پاکستان پخواني سفیر منصور احمد خان ويلي، چې په افغانستان کې وضعیت د اسلامآباد د تمې او اوږدمهالو اقتصادي ګټو پر خلاف روان دی.
نوموړي د «بول خبري شبکې» په اوبپاڼه کې څرګنده کړې، چې نه د افغانستان وضعیت او نه هم دوه اړخیزو اړیکې هغسې دي، چې تمه یې کیده.
تازه خبرونه
په ننګرهار کې د ناکامورا کانال پروژه بشپړه شوه
په ننګرهار ولایت کې د یوه کانال د جوړولو کار، چې د جاپان د یوه مرستندویه کارکوونکي تیتسو ناکامورا له خوا پیل شوې وه ترسره او بشپړه شوه.
جاپانی الاصله افغان ډاکټر تیتسو ناکامورا، چې په افغان ټولنه کې کاکا مراد یاد شوی؛ هغه څېره ده، چې د افغانستان په ختیځ کې یې د اوبو د مدیریت او ځمکو خړبولو لپاره ډاډمنې هڅې کړي او نوم یې پر زرین خط لیکل شوی دی.
ډاکټر تیتسو ناکامورا په ننګرهار ولایت کې د شاړو ځمکو د خړوبولو، د څښاک د پاکو اوبو رسولو او د اوبو دزیرمه کولوو او کانالونو د جوړیدو په برخه کې کارونه کړي دي.
د جاپان د سولې طبي خدمتونو يا PMS اداري مسوولینو ويلي؛ د ناکامورا له مرګ وروسته ټولې نیمګړې پروژې بشپړې شوې؛ خو فعالیتونه يې اوس هم روان دي، چې تازه يې د دغه ولایت په کوټ ولسوالۍ کې د بالاکوټ کانال ګټي اخستنې ته سپارلی دی.
نوموړي په ننګرهار کې هغه مهال درې روغتيايي کلينکونه جوړ کړل، چې اوسمهال يې شمېر ۱۰ کلينکونو ته رسېږي.
یاد ډاکټر تر مرګه پورې له ۱۶۰۰ زياتې د پاکو اوبو ژورې څاه ګانې کيندلي او د خلکو د بېوزليو، د ناروغیو د مخنيوي او اقلیمي بدلون د اغېزو د کمولو لپاره د چاپېريال د زرغونولو هڅې پیل کړې.
نوموړي په ۲۰۰۳ ز. کال کې د کونړ له سينده د ننګرهار کوز کونړ يا ښېوې ولسوالۍ ته د يوه ۲۵ کيلومټره کانال (چې وروسته مرواريد ونومول شو) کار پیل کړ، چې سلګونه زره جريبه ځمکه يې خړوبه او زرغونه کړه.
دغه راز وروسته بیا په دې ولسوالۍ کې د ناکامورا پر نوم يو تفریحې پارک او تحقیقاتي فارم جوړ شو، چې پر درې سوه اووه شپېته جریبه ځمکه يې مالټې، لیمو، خرما او نور زینتي نیالګي کېنول.
ناکامورا له لغمان څخه د رالګېدونکیو موسمې بادونو د مخنیوي لپاره څلورنیم کیلومټره شين کمربند جوړ کړ اووه سوه پنځوس زره نیالګي یې په کې کینول او سلګونه بې روزګاره وګړو ته یې د کار زمینه برابره کړه.
له ډاکټر تیتسو ناکامورا سره په دغه کارونو کې بوخت د وخت کارګر يې فعالیتونه ستايي او وایي، چې خپله يې له کارګرو سره وخت ناوخت کار ته اوږه ورکوله او هغوی ته يې د هېواد د ابادولو سپارښتنې کولي.
ناکامورا نه يوازي په کوز کونړ ولسوالۍ کې بلکي په کامه ولسوالۍ کې هم د شاړو ځمکو د آبادولو لپاره د کونړ له څپاند سیند څخه اوبه رابېلې کړې دي.
د کامې ولسوالۍ اوسیدونکي هم د ډاکټر ناکامورا کړنې ستايي او د PMS مرستندویه ادارې له مسولینو غواړي، چې د ناکامورا لار تقیب او د دغه ولایت پاتې شاړې دښتې، غرونه او رغونه هم زرغون کړي.
د ناکامورا کانال پېنځه کیلومټره اوږدوالی، دوه اتیا زره مټره مکعب اوبه زیرمه کوي.
ډاکټر ناکامورا ته د جمهوري نظام د ولسمشر له لورې تابعیت هم ورکړ شوی و.
ډاکټر تیتسو ناکامورا پر ۲۰۱۹ میلادي کال د جلالآباد ښار په لومړۍ ناحیه کې د ناڅرګنده وسلهوالو له لورې هغه مهال پر ډزو ووژل شو، چې په خپل موټر کې له دفتره د کار سیمې ته روان و.
تراوسه د هغه د وژل کیدو علت او د قاتلینو هویت ندی څرګند شوی.
د یادونې ده، چې دغه چاپانۍ مرستندویه اداره اوس هم د اوبولو لګولو تر څنګ په روغتیایي، کرنیزو، مالدارۍ او يو شمېر نورو برخو کې هڅې ترسره کوي.
تازه خبرونه
په روزګان کې د ماین پاکۍ موسسې یو کارکوونکی د ماین چاودنې له کبله ووژل شو
د روزګان پولیسو ويلي، په دې ولایت کې د ماین پاکۍ موسسې یو کارکوونکی د ماین چاودنې له کبله وژل شوی دی.
د دې ولايت امنيه قومندانۍ وياند حضرت بلال روزګاني زیاته کړې، چې دا پېښه د سې شنبې پر ورځ سهار شاوخوا لس بجې د دې ولايت د مرکز ترينکوټ ښار د خرما په اړوند سيمه کې رامنځته شوې ده.
د روزګاني د څرګندونو له مخې، دا پېښه د ماین پاکۍ د عملیاتو پر مهال رامنځته شوې ده.
ویل کیږي، چې په دې پېښه کې يو بل کس ټپي شوى دى.
تازه خبرونه
د یوناما استازې د ایران له بهرنیو چارو وزیر سره وکتل
د ایران بهرنیو چارو وزیر حسین امیرعبداللهیان د یوناما له مشرې سره په لیدنه کې د افغانستان ستونزې “پېچلې” وارزولې او د ” بېلابېلو او څو اړخیزو حل لارو” په اړه یې ټینګار څرګند کړ.
د ایران بهرنیو چارو وزارت په یوه خبرپاڼه کې، چې پرون (دوشنبه د غویی څلیریشتمه) خپره شوې؛ لیکلي، چې په افغانستان کې د ملګرو ملتونو د عمومي منشي استازې ميرمن روزا اوتنبایوا له ډاکټر امیر عبداللهیان سره کتلي او خبرې کړې دي.
په دې خبرپاڼه کې د ایران بهرنیو چارو د وزیر د څرګندونو له مخې لیکل شوي، چې: د افغانستان په کورنیو چارو کې د امریکا د هدفي لاسوهنو غځېدا به د دغه هېواد حالات نور هم پېچلي کړي.
نوموړي ویلي: د افغانستان ستونزې پېچلې دي؛ نو اړينه ده، چې پر څو اړخيزو حل لارو غور وشي.
دا غونډه د دوحې د درېیمې ناستې په څنډه کې جوړه شوې، چې د دوحې له لومړۍ او دوهیمې ناستې وروسته به د افغانستان پر وضعیت د ملګرو ملتونو پر کوربتوب جوړه شي.
د ایران بهرنیو چارو وزارت په خبرپاڼه کې راغلي، چې په دې کتنه کې رورا اتونبایوا د امیر حسین عبداللهیان سره د دوحې د درېیمې غونډې په اړه سلامشورې او د نظر تبادله وکړه.
میېرمن اتونبایوا د ایران د حکومت او خلکو له میلمه پالنې او د هغوی د وضعیت د ښه کېدو لپاره له ترسره شویو هڅو د مننې ترڅنګ په افغانستان کې د بشري ناورین په اړه د نړیوالې ټولنې پر بېتفاوتۍ نیوکه وکړه.
په افغانستان کې د ملګرو ملتو استازې په افغانستان کې د حالاتو پېچلتیا او د پرمختګونو بهیر تائید کړ او د دغه هېواد د پرمختګ او ثبات لپاره د سیمهییزو فعالانو د بېلابېلو دریځونو پر همغږي کولو یې ټینګار وکړ.
اتونبایوا د ایران د سیمهییزو نوښتونو د اهمیت پر ارزولو د ګاونډیانو د غونډې په چوکاټ کې د ایران د سیاسی هڅو هرکلی وکړ.
دغه راز د افغانستان په چارو کې د ایران سفیر او د ولسمشر ځانګړي استازي حسن کاظمي قُمي له میرمن اوتنبایوا سره په جلا کتنه کې د افغانستان او سیمې واقعیتونو ته د ملګرو ملتونو د ځانګړې استازې د پاملرنې غوښتنه کړې ده.
د دوحې د درېیمې غونډې د نېټې او د هغې د اجنډا په اړه څه ول شوي ندي؛ خو د ملګرو ملتونو لهخوا د افغانستان لپاره د ځانګړي استازي ټاکل، چې د افغانستان د ستونزې د حل لپاره د دې ټولنې پرېکړه ده، اړینه برخه وي. په داسې حال کې، چې د اسلامي امارت بهرنیو چارو وزارت چارسمبالی امیرخان متقي د افغانستان لپاره د یوناما تر څنګ د بل استازي ټاکل د وخت اړتیا نه بولي.
-
تازه خبرونه3 days ago
الله ګل مجاهد د قتل پر تور ونیول شو
-
تازه خبرونه3 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
سوداگري3 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه2 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
تازه خبرونه3 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه1 day ago
د یوناما استازې د ایران له بهرنیو چارو وزیر سره وکتل
-
لوبی23 hours ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه19 hours ago
په ننګرهار کې د ناکامورا کانال پروژه بشپړه شوه