د ریاست‌الوزرا اقتصادي مرستیال ملا عبدالغني برادر د پنجشنبې پر ورځ( د چنګاښ اته‌لسمه) د پروان ولایت په جبل‌السراج ولسوالۍ کې د افغانستان د سمنټو د دوه‌یمې سترې کارخونې د بنسټ ډبره کېښوده.

ملا عبدالغني برادر د پروژې د پرانیستې په مراسمو کې ویلي، چې دا پروژه د افغانستان د صنعت د پیاوړتیا، اقتصادي ځان‌بساینې او د کورني تولید د زیاتوالي پر لور یو اړین ګام دی.

هغه زیاته کړې، افغانستان د پراخو طبیعي سرچینو، وړ بشري ځواک او مناسب جغرافیایي موقعیت له کبله د صنعتي پراختیا لپاره پراخ ظرفیتونه لري.

د نوموړي د څرګندونو له مخې، د اسلامي امارت له بیا واکمنېدا وروسته په هېواد کې سراسري امنیت ټینګ شوی، اداري فساد په بې‌ساري کچه کم شوی، اداري چارې ساده شوي او د پانګونې لپاره ډاډمن چاپېریال رامنځته شوی دی.

ملا عبدالغني برادر وایي، اسلامي امارت هڅه کوي د افغانستان اقتصاد پر وارداتو له متکي اقتصاد څخه پر کورني تولید او صادراتو ولاړ اقتصاد ته واړوي.

هغه د بنسټیزو او ودانیزو پروژو په پلي کولو کې د سمنټو پر اهمیت ټینګار وکړ او څرګندوي، چې د کورني تولید زیاتوالی به د وارداتو اړتیا کمه، د هېواد د اسعارو د وتلو مخه ونیسي او زرګونه کاري فرصتونه به رامنځته کړي.

هغه له بهرنیو پانګوالو هم وغوښتل، چې د افغانستان په بېلابېلو اقتصادي برخو کې پانګونه وکړي.

د ریاست‌الوزراء اداري مرستیال عبدالسلام حنفي هم په دغو مراسمو کې ویلي، چې دغه کارخانه به په هرو ۲۴ ساعتونو کې ۵ زره ټنه سمنټو د تولید وړتیا ولري او د هېواد د اړتیاوو د پام وړ برخه به پوره کړي.

حنفي زیاته کړې، د اسلامي امارت له بیا واکمنېدا او د امنیت له ټینګښت وروسته د هېواد د رغونې او پراختیا چارې چټکې شوې دي؛ خو د سمنټو کورنی تولید اوس هم د هېواد د اړتیاوو د پوره کولو لپاره بسنه نه‌کوي.

د نوموړي د څرګندونو له مخې، په وروستیو څو کلونو کې د سمنټو څو نوې کارخونې هم جوړې شوې دي.

د امارتي شرکتونو لوی رییس احمدجان بلال ویلي، چې افغانستان به په نږدې راتلونکې کې د سمنټو د تولید په برخه کې پر ځان‌بسیا شي او د دې محصول له واردولو به بې‌نیازه شي.

د اوبو او انرژۍ وزیر محمد یونس آخوندزاده هم ویلي، چې افغانستان د برښنا د تولید لپاره پراخې سرچینې لري او باید په دې برخه کې هم ځان‌بساینې ته ورسېږي.

د کانونو او پټرولیم وزیر هدایت‌الله بدري ویلي، چې په هېواد کې د سمنټو د تولید د کارخونو شمېر ۹ ته رسېدلی دی.

نوموړي زیاته کړې، د دغو کارخونو له فعالېدو سره به د افغانستان د سمنټو د تولید ظرفیت په ورځ کې شاوخوا ۳۰ زره ټنو ته ورسېږي.

هغه همداراز ټینګار څرګند کړ، چې افغانستان د سمنټو، ‌سیخ او ګاډر د تولید په برخه کې ځان‌بساینې ته نږدې شوی او د کورنیو صنعتونو د پراختیا لپاره هڅې روانې دي.

زرګونو کسانو د پنجشنبې پر ورځ په کابل کې د افغانستان کرکټ ملي لوبډلې د پخواني لوبغاړي شاپور ځدراڼ د جنازې او خاورو ته سپارلو په مراسمو کې ګډون وکړ او د هېواد د کرکټ له یوې اغېزمنې څېرې سره یې وروستۍ مخه ښه وکړه.

د نوموړي د جنازې لمونځ د پنجشنبې پر سهار(۱۰ بجو) د کابل په عیدګاه جومات کې ادا شو او وروسته یې جسد د مرنجان په غونډۍ کې خاورو ته وسپارل شو.

په دغو مراسمو کې د افغانستان کرکټ ملي لوبډلې مخکښو لوبغاړو؛ راشد خان، محمد نبي او مجیب‌الرحمن، د نوموړي د کورنۍ غړو، چارواکو، لوبغاړو او زرګونو مینه‌والو ګډون کړی و او د افغانستان کرکټ له یوه مخکښ لوبغاړي سره یې وروستۍ مخه ښه وکړه.

د شاپور ځدراڼ جسد د چارشنبې پر ورځ( د چنګاښ اووه‌لسمه) له هند څخه، چې د خپلې ناروغۍ د درملنې لپاره په یوه روغتون کې بستر و؛ د کام‌ایر په الوتکه کابل ته راولېږدول شو او د سې‌شنبې( دچنګاښ پر شپاړلسمه) پر ورځ یې د ورپېښې ناروغۍ له کبله ساه ورکړې وه.

شاپور ځدراڼ د افغانستان لپاره په ۴۴ یو ورځنیو، ۳۶ شل‌آوریزو نړیوالو او یوې ټسټ لوبه کې برخه اخیستې وه او نړیوالو سیالیو ته یې د افغانستان په لاره موندلو کې یې خپله ونډه ترسره کړه.

د نوموړي له مړینې وروسته د افغانستان او نړۍ له بېلابېلو برخو د کرکټ لوبغاړو، پخوانیو ملګرو او مینه‌والو د خواخوږۍ او درناوي پیغامونه خپاره شوي دي. ډېری کسان شاپور ځدراڼ د افغانستان کرکټ د بریاوو له بنسټګرو او هغو لوبغاړو څخه ګڼي، چې افغانستان یې د نړیوال کرکټ د راڅرګندېدونکي ځواک په توګه نړۍ ته وروپېژاند.

سرچینو آریانا نیوز ته ویلي، چې د ملګرو ملتونو سرمنشي انټونیو ګوترش بنګله‌دېشۍ ډیپلوماټه ربابه فاطمه افغانستان ته د خپلې ځانګړې استازې په توګه د دندې لپاره د ملګرو ملتونو امنیت شورا ته نومولې ده.

د سرچینو د څرګندونو له مخې، امنیت شورا به د نوموړې د ګومارنې په اړه پرېکړه وکړي.

که نوموړې تائید شي؛ د روزا اوتنبایوا ځای به ونیسي، چې د ماموریت موده یې د تېر کال په سپټمبر کې پای ته رسېدلې وه.

ربابه فاطمه د بنګله‌دېش له مخکښو ډیپلوماټانو څخه ده. نوموړې له ۲۰۲۲ز. کال راپدېخوا د ملګرو ملتونو د سرمنشي د مرستیالې او د لږ پرمختللو، په وچه کې راګیرو او کوچنیو ټاپوییزو مخ پر ودې هېوادونو لپاره د ملګرو ملتونو د لوړې استازې په توګه دنده ترسره کوي.

هغې له دې مخکې په ملګرو ملتونو ټولنه کې د بنګله‌دېش د دایمي استازې او په جاپان کې یې د خپل هېواد د سفیرې په توګه هم دنده ترسره کړې ده. نوموړې همداراز د کډوالۍ نړیوالې ټولنې او د ګډو ګټو هېوادونو په دارالانشا کې لوړې دندې ترسره کړي او د کډوالۍ، بشري حقونو او نړیوالې پراختیا په برخو کې یې کار کړی دی.

ملګرو ملتونو تر اوسه د نوموړې د دې نوې دندې لپاره نومونه په رسمي ډول اعلان کړي نه‌ ده.