د افغانستان کرکټ لوبډله به په متحده عربي اماراتو کې د ۲۰۲۶ز.کال د ټسټ، یو ورځنیو او شل‌اوریزو لوبو کوربتوب وکړي.

دا لړۍ به د اوکټوبر پر نهمه د بنګله‌دېش پر وړاندې له یوې ټسټ لوبې پیل شي؛ وروسته به د اوکټوبر له اووه‌لسمې څخه تر درویشتمې افغانستان، بنګله‌دېش او زیمبابوې په درې اړخیزه یو ورځنۍ لوبه کې ولوبېږي او دوه غوره لوبډلې به پایلوبې ته لار ومومي.

افغانستان به بیا د اوکټوبر له اووه‌ویشتمې څخه تر د نومبر لومړۍ پورې د زیمبابوې پر وړاندې درې شل‌آوریزې لوبې ترسره کړي. دواړه لوبډلې به وروسته د نومبر له پېنځمې څخه تر نهمې او له دیارلسمې تر ۱۷مې پورې په دوه ټسټ لوبو کې هم سره مخ شي.

له دغو سیالیو سره به افغانستان په ۲۰۲۶ز.کال کې ټولټال څلور ټسټ لوبې ترسره کړي، چې د دې لوبډلې لپاره په یو کال کې تر ټولو ډېرې ټسټ لوبې دي.

د افغانستان کرکټ بورډ اجرائیوي رییس نصیب خان د دغو لوبو ارزښت د لوبغاړو د ودې او تجربې لپاره مهم بللی او څرګندوي، چې د منظمې او باکیفیته نړیوالو لوبو برابرول د کرکټ بورډ له اړینو لومړیتوبونو څخه دي.

په متحده عربي اماراتو کې د سیالیو دقیق ځای اوس هم د افغانستان کرکټ بورډ نه‌دی اعلان کړی.

د افغانستان د شل کلنو فوټبال ملي لوبډلې د ۲۰۲۷ز.کال د آسیا شل کلنو فوټبال جام ته د غوراوي سیالیو په وروستۍ لوبه کې بحرین ته ۳ – ۱ماتې ورکړه.

دا د کوروش برمک تر مشرۍ لاندې د افغانستان لومړنۍ بریا وه.

افغانستان له دې بریا سره درې نمرې ترلاسه کړې او د «ډي» ګروپ درېیم ځای یې خپل کړ. تاجکستان د دې ګروپ لومړی او اردن دوه‌یم ځای خپل کړ.

د افغانستان لوبډلمشر حبیب‌الله هوتک د لوبې په شپږمه دقیقه کې لومړی ګول وواهه. هغه د بحرین له یوه لوبغاړي څخه د توپ له ترلاسه کولو او له دوه ساتونکو څخه بریالی تېر شو او په یوه پیاوړې توپوهنه یې د بحرین دروازه پرانیسته.

بحرین له ګول خوړلو وروسته د افغانستان پر دروازه بریدونه زیات کړل او په اووه‌ویشتمه دقیقه کې یې د مساوي کولو ښه فرصت درلود،؛ خو د علي مرهان علي توپ له دروازې پورته ووت.

د لومړۍ نیمایي په وروستیو دقیقو کې هم بحرین څو نور فرصتونه جوړ کړل؛ خو د مساوي ګول پر وهلو بریالی نه‌شو.

بحرین په دوه‌یمه نیمایي کې خپل بریدونه روان وساتل او په نهه‌پنځوسمه دقیقه کې یې مساوي ګول وواهه. عبدالله ابراهیم د کارنر له توپ‌وهنې وروسته پر سر ګول وواهه او پایله یې ۱-۱ کړه.

افغانستان ۱۱ دقیقې وروسته بیا مخکښ شو. یاسر ساپي د حمیدالله حیدري له پاس وروسته پر چپه پښه توپ وواه او د بحرین دروازې ته یې وردننه کړ.

فرزاد تاجک په څلوراتیایمه دقیقه کې د افغانستان درېیم ګول وواهه. هغه د بحرین له دروازه‌ساتونکي څخه له تېرېدا وروسته توپ تشې دروازې ته ولېږه او د افغانستان بریا یې یقیني کړه.

د لوبې په وروستیو دقیقو کې د بحرین مدافع کرار حسین له یوې نښتې وروسته له سور کارت سره مخ شو.

سره له دې بریا افغانستان د ۲۰۲۷ز.کال د آسیا شل کلنو فوټبال جام ته لار ونه موندله. تاجکستان د ګروپ لومړۍ لوبډلې د سیالیو وروستي پړاو ته ووته او افغانستان د درېیم ځای له خپلولو سره له سیالیو پاتې شو.

آریانا ټلویزیون د ۲۰۲۶/۲۷ پړاو په لړ کې د افغانستان د ملي کرکټ لوبډلې د یو شمېر مهمو لوبو د رسنیز خپراوي ځانګړي حق ترلاسه کړی دی.

د هوکړې له مخې: د افغانستان د ملي لوبډلې هغه نړیوالې لوبې، چې له هند، بنګله‌دېش، زېمبابوې، ایرلینډ، سریلانکا او نیوزیلنډ سره یې لري؛ په کې شاملې دي. دا ټسټ، یو ورځنۍ او شل‌آوریزې لوبې دي.

د لوبو لړۍ به د افغانستان او هند ترمنځ د درې شل‌آوریزو نړیوالو لوبو له لړۍ سره د وږيله دوه‌ویشتمې څخه تر شپږویشتمې /  د ۲۰۲۶ز.کال د سپټمبر له دیارلسمې څخه تر اووه‌لسمې پیل شي.

د هند د لوبو د خپراوي لړۍ پر شل‌آوریزو هغو پیلېږي

لومړنۍ سیالۍ به د سپټمبر په میاشت کې د افغانستان او هند ترمنځ د درې شل‌آوریزو نړیوالو لوبو لړۍ وي.

ټاکل شوې، چې دغه درې لوبې د سپټمبر له دیارلسمې څخه تر اووه‌لسمې پورې ترسره شي او تمه ده، چې په افغانستان او سیمه کې د کرکټ د مینه‌والو پام ځان ته راواړوي.

آریانا ټلویزیون به د دغې لړۍ ځانګړې خپرونه پر غاړه ولري او افغان لیدونکو ته به یې پر ژوندۍ او ځانګړې بڼه وړاندې کړي.

د افغان کرکټ مینه‌والو لپاره مهمه لاسته راوړنه

د خپرونو دغه تړون یوازې له هند سره تر لوبو محدود نه‌دی، بلکې افغانستان به په راتلونکو میاشتو کې د نړۍ له یو شمېر پیاوړو کرکټ لوبډلو سره هم لوبې ولري.

په ټاکل شوي مهالوېش کې له بنګله‌دېش او زیمبابوې سره ټسټ او د محدودو آورونو لوبې او ورپسې په ۲۰۲۷ز.کال کې له ایرلینډ، سریلانکا او نیوزیلینډ سره شاملې دي.

دا به افغان لیدونکو ته زمینه برابره کړي، چې د افغانستان د ملي لوبډلې پرله‌پسې نړیوالې لوبې د آریانا ټلویزیون له لارې وګوري؛ له چټکو او زړه‌راکښونکو شل‌آاوریزو لوبو نیولې تر ټسټ سیالیو پورې.

دغه هوکړه د آریانا ټلویزیون له هغې ژمنې سره هم سمون لري، چې د سپورټ او افغان لوبغاړو ملاتړ کوي، په ټول هېواد کې د نړیوالو او کورنیو لوبو لیدلو ته د افغان مینه‌والو لاسرسی زیاتوي او افغان لوبډلو او سپورټي استعدادونو ته د راڅرګندېدا زمینه برابروي.

دغه تړون په افغانستان کې د نړیوالو سپورټي لوبو د مخکښ خپروونکې( آریانا ټلویزیون) ونډه نوره هم پیاوړې کوي او په ټول هېواد کې لیدونکو ته د مهمو سپورټي لوبو د رسولو لپاره د دې ټلویزیون تلپاتې پانګونه ښیي.

د لوبو د پیل شېبې به د سپټمبر پر دیارلسمه له هند سره د افغانستان له لومړۍ لوبې راورسېږي. آریانا ټلویزیون به دا سیالۍ افغان لیدونکو ته پر ژوندۍ او ځانګړې بڼه وړاندې کړي.

له هند سره پرته دې د نورو ټولو لوبو کره نېټې ټاکل شوې نه‌دي. له همدې کبله له مینه‌والو غوښتل شوي، چې د تازه خبرونو، معلوماتو او تائید شویو مهالوېشونو لپاره د آریانا ټلویزیون ټولنیزې رسنۍ څارئ.

د دغو زړه‌راکښونکو کرکټ لوبو د نورو خبرونو او تازه معلوماتو لپاره د آریانا ټلویزیون خپرونې ګورئ.