شپږ افغان کرکټ‌لوبغاړي د ۲۰۲۶ سریلانکا غوره لیګ سیالیو لپاره غوره شوي، چې دا چاره د شل اوریزو سوداګریزو کرکټ‌لیګونو په ډګر کې د افغانستان د مخ پر ودې ځایګي څرګندونه کوي.

ابراهیم ځدراڼ د تېر پړاو اتلې لوبډلې «جفنا کینګز» له لوري غوره شوی دی. په داسې حال کې، چې مجیب الرحمن به په دغو سیالیو کې د «کولمبو کپس» استازیتوب وکړي.

همدارنګه رحمن‌الله ګربز او ظاهر خان دواړه د «کنډي رویالز» لوبډلې له لوري غوره شوي دي.

فضل‌الحق فاروقي او ګلبدین نایب به د «ډمبولا سیکسرز» لوبډلې لپاره ولوبېږي.

د ۲۰۲۶ سریلانکا غوره لیګ به د دغو سیالیو شپږم پړاو وي.

ټاکل شوې، چې دا پېنځه لوبډلې لرونکې سیالۍ د جولای پر اوولسمه پیل شي.

هندي رسنیو راپور ورکړی؛ افغانستان به ښایي په ډیلي کې راروان سپټمبر د هند پر وړاندې د درې نړیوالو شل اوریزو سیالیو کوربه‌توب وکړي.

د «ټایمز اف انډیا» ورځپاڼې د راپور له مخې، ټاکل شوې دغه سیالۍ د سپټمبر پر دیارلسمه، شپاړسمه او نولسمه د نوي ډهلي په «آرون جیټلي» لوبغالي کې ترسره شي؛ خو تر اوسه یې رسمي اعلان نه‌دی شوی.

افغانستان دا مهال د هند پر وړاندې د یوې ټسټ او درې یو ورځنیو لوبو لپاره چمتووالی نیسي، چې ټاکل شوې روانه میاشت ترسره شي.

افغانستان په تېره یوه لسیزه کې د نړیوالو سیالیو لپاره د هند او متحده عربي اماراتو لوبغالي د خپلو کورنیو ډګرونو په توګه کارولي دي.

د افغانستان فوټبال ملي لوبډلې په مالډیپ کې د الماس جوبیلي نړیوال څلور اړخیز ټورنمنټ او سیالۍ په لومړۍ لوبه کې کوربه لوبډلې ته ۱پر۰ ماتې ورکړه.

په دې ټورنمنټ کې افغانستان، پاکستان، بنګله دیش او مالډیپ لوبې کوي.

افغان لوبډله به د پنجشنبې پر ورځ په خپله راتلونکې لوبه کې له بنګله‌دېش سره مخ شي.