ولسمشریزې ټاکنې کړکیچ ته تللې دي- حکمتیار

د سولې او اسلامي عدالت ټاکنیزې ډلې مشر ګلبدین حکمتیار ادعا کوي، چې ولسمشریزې ټاکنې کړکیچ ته تللي دي.

له آریانا نیوز سره په خبرو کې نوموړي ویلي؛ دولت جوړونکې ټاکنیزې ډلې له ده سره اړیکې نیولي او ترې غوښتنه شوې، چې له اوسني کړکېچ څخه د وتو لپاره مشوره ورکړي.

ښاغلي حکمتیار زیاته کړې: دوی ته زما مشوره داده؛ راځئ له ملت او الله پاک سره رښتینې او ټینګه ژمنه وکړ او دا بحران حل کړو.

د سولې او اسلامي عدالت ټاکنیزې ډلې مشراو ولسمشرۍ ته نوماند انجنیر حکمتیار وایي، که د رایو د شمېرلو بهیر د بایومتریک دستګاوو له لارې وي؛ خپله مخکښ دی، دوه یمه د ثبات اوهمپالنې ټاکنیزه ډ‌له ده او دولت جوړونکې ټاکنیزه ډله په درېیم ځای کې راځي.

تر اوسه د ټاکنو د  پایلو په تړاو د ټاکنو خپلواک کمیسیون څه ندي ویلي؛ خو د ټاکنیزو ډلو څو مشران  ځانونه بریالي بولي.

اوس ټاکنیز کمیسیونونه او ټول نوماندان غواړي، چې یوازې بایومتریک رایې وشمېرل شي؛ خو د رایو په شمېرلو کې د ټاکنو خپلواک کمیسیون لاسوهنه او یا هم د ټاکنو بې پایلې پاتې کیدل او دوه یم پړاو ته د ټاکنو تلل هم هغه څه دي، چې ښاغلی حکمتیار یې اندېښمن کړی دی.

ښاغلي حکمتیار ویلي؛ مونږ پوره باور لرو، چې بایومتریک رایې د اعتبار وړ دي؛ خو که په دې کې هم لاسوهنه ونشي، د رایو شمېر بدل نشي باوري یو، چې دولت جوړوونکې ډله به درېیم ځای خپل کړي او مونږ له ټولو ډېرې او پاکې رایې لرو.

څه موده مخکې د دولت جوړونکې ټاکنیزې ډلې لومړي مرستیالامرالله صالح حکمتیار ته په خطاب کې ویلي وه؛ څوک، چې پر ټاکنو پښېمان دي او غواړي د جګړو لپاره بیا غرونو ته وخیژي، ځای یې پولیګون  او یا هم د عدلي طب سړخونه ده.

ولسمشریزو ټاکنو ته نوماند ګلبدین حکمتیار په دې اړه ویلي؛ هیله من یو، چې ماشومانه څرګندونې ونکړي او افغانان ونه ګواښي. د افغانانو ګواښل به د دې سبب شي، چې نوره میړانه هم وښیي او د بدل لار خپله کړي. له حکومتي ډلو مو هیله داده، چې سوله ییزه لار خپله کړي نه د تاوتریخوالي.             

د ټاکنو خپلواک کمیسیون د حکمتیار خبرو ته په غبرګون کې ویلي؛ دا ډول خبرې د عامه ذهیت له انحرافولو پرته بل څه نلري، ځکه دوی تر اسه د رای اچوونکیو د رایو پر شمېرلو خته دي.