تازه خبرونه
ټرمپ په لاتینه امریکا کې د نوي پېر پیل اعلان کړ
ډونالډ ټرمپ په یوه رسنیز کنفرانس کې ټینګار وکړ، چې لېږد باید روڼ او عادلانه وي؛ ځکه، چې امریکا د ونزویلا د خلکو پر سوله، آزادۍ او عدالت باور لري.
د ونزویلا د ولسمشر نیکولاس ماډورو له نیول کېدا وروسته د امریکا ولسمشر ډونالډ ټرمپ ویلي، چې امریکا به د وینزویلا واک تر هغه وخته پورې پر غاړه ولري، چې د واک قانوني، خوندي او منظم لېږد رامنځته شوی نهوي.
ډونالډ ټرمپ په یوه رسنیز کنفرانس کې ټینګار وکړ، چې لېږد باید روڼ او عادلانه وي؛ ځکه، چې امریکا د ونزویلا د خلکو پر سوله، آزادۍ او عدالت باور لري.
ټرمپ خبریالانو ته پرته له دې، چې نور جزئیات ورکړي ویلي، هغه به د خپلې کابینې ځینې غړي د ونزویلا د چارو د پرمخ وړلو لپاره وټاکي.
نیکولاس ماډورو پرون په کاراکاس کې د امریکا په يوه پوځي برید کې ونیول شو او نیویارک ته ولېږدول شو.
د امریکا ولسمشر ډونالډ ټرامپ وایي: ماډورو د خپلې مېرمنې سیلیا فلورس سره ونیول شو؛ دواړه اوس د امریکا له عدالت سره مخ دي. مونږ به له اوس څخه تر هغه وخته پورې ونزویلا اداره کړو، چې یو خوندي او عادلانه لېږد ترسره نشي. مونږ نه غواړو بل داسې څوک واک ترلاسه کړي، چې د ونزویلا د خلکو غوره ګټې په پام کې ونه نیسي.”
د امریکا ولسمشر ټینګار کړی، چې د دې هېواد د نفتو لوی شرکتونه به ونزویلا ته ورننوځي، چې د دغه هېواد د نفتو د بېخبناوو بیا رغونه وکړي.
د نوموړي د څرګندونو له مخې؛ د ونزویلا د نفتو صنعت تر دې دمه ناکام و.
ډونالډ ټرامپ ویلي:”هرڅوک پوهیږي، چې د ونزویلا د نفتو صنعت له ډېرې مودې راپدېخوا په ټپه ولاړ حالت کې دی. د هغې تولید د خپل رښتیني ظرفیت څخه ډېر ټیټ و. مونږ د امریکا د نفتو لوی شرکتونه راوړو، چې میلیارډونه ډالر پانګونه وکړي او د نفتو د زیانمن شوې بېخبنا بیا رغونه وکړي او د هېواد لپاره عاید تولید کړي. د وینزویلا او د امریکا ترمنځ دا ملګرتیا به د ونزویلا خلک شتمن، خپلواک او خوندي کړي.”
دغه راز د امریکا د جګړې وزیر ترسره شويو عملیاتو ته په نغوته کې د خپل هېواد دښمنانو ته خبرداری ورکړ، چې امریکا په هر وخت او هر ځای کې د خپلې ارادې د پلي کولو توان لري.
د امریکا د جګړې وزیرپیټ هیګسټ وایي: “دا ګډ پوځي او امنیتي عملیات بې عیبه ترسره شول. امریکایي ځواکونه بې ساري دي. زمونږ دښمنان باید پوه شي: امریکا کولی شي هغه څه وکړي، چې غواړي یې، هر وخت، هرچیرې. دا عملیات د امریکا د خلکو د امنیت، آزادۍ او هوساینې په اړه دي. دا یعنې “امریکا لومړی” دا یعنې”د ځواک له لارې سوله”.
ډونالډ ټرمپ ادعا کړې، چې دې عملیاتو د امریکا له لاسه ورکړشوی واک او عظمت بېرته راګرځولی دی، چې د هغه پر وینا له افغانستان څخه له وتلو وروسته زیانمن شوی و.
هغه ویلي، چې له افغانستان څخه “ګډوډ او له سپکاوي ډک” وتلو امریکا په نړیواله کچه د خندا وړ ګرځولې وه؛ خو اوس د امریکا د پوځ پیاوړتیا ښیي، چې د هېواد درناوی او اعتبار بېرته راګرځېدلی دی.
تازه خبرونه
امریکا باید په افغانستان کې ډیپلوماسي روانه وساتي- عایشه وهاب
مېرمن وهاب ویلي: « امریکا باید ډیپلوماسۍ ته مخه کړي. پرته له دې، چې کومه ډله په واک کې وي، مونږ باید ډیپلوماسي عملي کړو او اړیکې ولرو.»
د امریکا د کانګرس غړې عایشه وهاب ويلي؛ امریکا باید پرته له دې، چې په افغانستان کې کومه ډله واکمنه وي له دې هېواد سره ډیپلوماسي روانه وساتي. د هغې دا څرګندونې له هغې وروسته را پورته شوې، چې د امریکا استازو جرګې په ځانګړیو ټاکنو کې بریالۍ شوه او د دغه هېواد د کانګرس لومړنۍ افغانالاصل غړې شوه.
مېرمن وهاب هیله څرګنده کړې، چې مونږ به« هغوی(طالبان) د بشري حقونو، د ښځو د حقونو او مدني حقونو په برخو کې یوې سمې لارې ته سوق کړو.»
مېرمن وهاب ویلي: « امریکا باید ډیپلوماسۍ ته مخه کړي. پرته له دې، چې کومه ډله په واک کې وي، مونږ باید ډیپلوماسي عملي کړو او اړیکې ولرو.»
نوموړې د طالبانو مخالفې ډلې« جنګسالاران » بللي او استدلال کوي، چې د افغانستان ستونزې یوازې تر طالبانو پورې محدودې نهدي.
هغه وایي: « بېلابېل جنګسالاران هم شته، چې د واک غوښتونکي دي؛ خو طالبان نهدي. زما پر اند هغوی ټول ناکام او بېلارې شوي؛ ځکه د هېواد په ګټه کار نهکوي، بلکې خپلې شخصي ګټې تعقیبوي.»
د نوموړې ټینګار کړی: «مونږ ولیدل، چې ان د امریکا تر ملاتړ لاندې هم دغو جنګسالارو ډلو په عملي توګه هېواد چور کړ.»
هغې ویلي: افغانستان په وچه کې راګیر هېواد دی؛ د سیمې د بېلابېلو قدرتونو ترمنځ پروت دی او د پام وړ طبیعي سرچینې لري. امریکا باید لږ تر لږه له افغانستان سره د اقتصادي قراردادونو او همکاریو په برخه کې ونډه واخلي.
د یادونې ده، چې عایشه وهاب د کلیفورنیا د ایالتي سنا غړې ده.
تازه خبرونه
واشنګټن ښايي کابل ته خپل ډیپلوماټیک شتون ولېږدوي – د امریکا پخوانی سفیر
نیومن له«آی۲۴ نیوز» شبکې سره په خبرو کې ویلي، که د اسلامي امارت په سیاستونو کې څرګند بدلونونه رامنځته شي؛ افغانستان ته د امریکا د ډیپلوماټیک حضور بېرته ستنېدل د اټکل وړ ده؛ خو هغه د دې کړنې د ترسره کولو لپاره کومه نېټه ځانګړې کړې نهده.
په افغانستان کې د امریکا پخواني سفیر رونالډ نیومن ویلي، چې واشنګټن ښايي په راتلونکي کې کابل ته خپل ډیپلوماټیک شتون بېرته ولېږدوي؛ خو ټینګار یې کړی، چې له اسلامي امارت سره هر ډول نوې اړیکه باید«ګام پر ګام» او د دواړو لوریو د عملي اقداماتو پر بنسټ رامنځته شي.
نیومن له«آی۲۴ نیوز» شبکې سره په خبرو کې ویلي، که د اسلامي امارت په سیاستونو کې څرګند بدلونونه رامنځته شي؛ افغانستان ته د امریکا د ډیپلوماټیک حضور بېرته ستنېدل د اټکل وړ ده؛ خو هغه د دې کړنې د ترسره کولو لپاره کومه نېټه ځانګړې کړې نهده.
د نیومن د څرګندونو له مخې؛ د ښځو حقونه او پر ښځو او نجونو لګېدلي محدودیتونه له هغو مسئلو څخه دي، چې له کابل سره د اړیکو د عادي کولو په اړه به د واشنګټن هره پرېکړه له سیاسي فشار سره مخ کړي.
هغه له دې سره-سره ویلي، چې امریکا افغانستان ته د بېرته ستنېدا دلایل لري او واشنګټن اوس هم په ځینو برخو کې لکه؛ د امریکايي وګړو د خوشې کولو او د ترهګرۍ پر وړاندې د مبارزې په مسئلو کې د اسلامي امارت له چارواکو سره عملي اړیکې لري.
دا څرګندونې له هغې وروسته راپورته کېږي، چې د بهرنیو چارو وزیر امیرخان متقي له امریکا څخه په کابل کې د سفارت د بېرته پرانیستلو غوښتنه وکړه او په اقتصادي برخو؛ کانونو، بندونو او سړکونو کې پانګونه وکړي.
نیومن د افغانستان د کانونو ظرفیتونو ته په نغوته کې ویلي، چې دغه برخه د امریکايي شرکتونو لپاره بالقوه د پام وړ ده؛ خو ټینګار یې کړی، چې د دا ډول پانګونو د عملي کېدا لپاره تلپاتي امنیت، د قانون حاکمیت او د شرکتونو باور ته اړتیا ده؛ هغه شرایط، چې د ده پر وینا اوسمهال برابر نهدي.
د امریکا پخواني سفیر همداراز خبرداری ورکړی، چې افغانستان له پامه غورځول د واشنګټن لپاره پایلې لرلی شي او دغه هېواد اوس هم د منځنۍ او جنوبي آسیا پر امنیت اغېز کولی شي.
نیومن د امریکا او افغانستان د راتلونکو اړیکو په اړه وړاندیز کړی، چې هر ډول پرمختګ باید د« واقعي اقدام په بدل کې د واقعي اقدام» پر بنسټ وي. هغه ویلي، چې واشنګټن باید یوازې پر ژمنو یا د سیاستونو د بدلون پر هیلو تکیه ونهکړي.
هغه ټینګار کړی، که په کابل کې د امریکا سفارت بېرته پرانیستل کېږي؛ واشنګټن باید د دغه اقدام په بدل کې له کابل څخه مشخص امتیازات او عملي اقدامات ترلاسه کړي.
تازه خبرونه
په افغانستان کې د ګوزڼ پېښې ۱۹ ته ورسېدې – د روغتیا نړیواله ټولنه
د روغتیا نړیوالې ټولنې د ختیځې مډیټرانې سیمې د تازه راپور له مخې؛ نوې پېښې په هرات، پکتیکا او کندهار ولایتونو کې ثبت شوې دي.
د روغتیا نړیوالې ټولنې ویلي، چې د ګوزڼ د لومړي ډول د ویروس د څلورو نویو پېښو له ثبتېدا سره په افغانستان کې د ۲۰۲۶ز. کال له پیل راپدېخوا د دې ناروغۍ د تائید شویو پېښو ټول شمېر ۱۹ ته رسېدلی دی.
د روغتیا نړیوالې ټولنې د ختیځې مډیټرانې سیمې د تازه راپور له مخې؛ نوې پېښې په هرات، پکتیکا او کندهار ولایتونو کې ثبت شوې دي.
د هرات په شینډنډ او ادرسکن ولسوالیو کې دوه پېښې ثبت شوې دي. په داسې حال کې، چې د پکتیکا په ډیله او د کندهار په ارغستان ولسوالیو کې هم یوه – یوه نوې پېښه ثبت شوې ده.
د دې ټولنې په راپور کې ویل شوي، چې د روان کال د اګست تر شپاړلسمې د ختیځې مډیټرانې په سیمه کې د ګوزڼ یا پولیو د لومړي ډول ۲۲ پېښې تائید شوې، چې ۱۹ یې په افغانستان او درې نورې په پاکستان کې ثبت شوې دي.
افغانستان په ۲۰۲۵ز.کال کې د ګوزڼ ۲۱ پېښې او پاکستان ۳۱ پېښې ثبت کړې وې.
د چاپېریالي څارنې پایلې هم ښيي، چې په افغانستان او پاکستان کې د ګوزڼ ویروس اوس هم په خپرېدو دی.
د روغتیا نړیوالې ټولنې د راپور له مخې، سږ کال تر دې دمه په افغانستان کې د چاپېریال ۵۸ مثبتې نمونې او په پاکستان کې ۱۱۸ مثبتې نمونې ثبت شوې دي.
افغانستان او پاکستان هغه دوه هېوادونه دي، چې د ګوزڼ وحشي ویروس په کې شتون لري.
-
تازه خبرونه5 days agoیو افغان په ایران کې اعدام شو
-
تازه خبرونه5 days agoد افغانستان په اړه د اسلامآباد پر تګلاره ملي خبرو ته اړتیا ده – پاکستاني کارپوه
-
تازه خبرونه5 days agoدرېیمو هېوادونو ته له قطره د بند پاتې افغانانو د لېږد خبرې روانې دي- امریکا
-
لوبی4 days agoآباسین ډیفنډرز د کابل خان روغتون کرکټ غوره لیګ د څلورم پړاو اتلولي وګټله
-
تازه خبرونه3 days agoافغان پلاوي په بیلاروس کې له تولیدي کارخونو لیدنه وکړه
-
ساینس او ټیکنالوژي5 days agoله افغان بیسیم شرکت سره د ۳۱ مخابراتي انټنونو د جوړولو تړون لاسلیک شو
-
سوداگري1 day agoد افغانستان د ټرانزیټي سوداګرۍ کموالی د پېښور سوداګریز چاپېریال ګواښي – ډاننیوز
-
تازه خبرونه2 days agoولې منځګړي د افغانستان او پاکستان په اوربند ټینګولو کې پاتې راغلل؟
