د اقتصاد وزارت ویلي، د دې وزارت چارسمبالي دین‌محمد حنیف د افغانستان لپاره د ناروې کمیټې له عمومي مشر تاریا مګنوسون واټرډال او مل پلاوي سره کتلي او د ګډو همکاریو د پراختیا، د بشري او پراختیایي مرستو د دوام او د دې بنسټ د څلورکلنې سټراټیژۍ په اړه خبرې کړې دي.

د اقتصاد وزارت د خبرپاڼې له مخې، د افغانستان لپاره د ناروې کمیټې عمومي رییس په دې کتنه کې د افغانستان لپاره د دغه بنسټ د څلورکلنې سټراټیژۍ په اړه معلومات وړاندې کړل او څرګندوي، چې دا سټراټیژي پر درې بنسټیزو برخو؛ د خوړو خوندیتوب، د طبیعي سرچینو مدیریت او روغتیا او بیارغونې ولاړه ده.

هغه زیاته کړې، چې د ظرفیت لوړول او مسلکي زده‌کړې هم د دې سټراټیژۍ له مهمو برخو څخه دي.

نوموړي څرګنده کړې، د اړیکو برخه د دې سټراټیژۍ له مهمو برخو څخه ده او د ناروې کمیټه به هڅه وکړي، چې د همدې لارې د افغانستان رښتینی او مثبت انځور نړیوالې ټولنې ته وړاندې کړي.

د ناروې کمیټې عمومي رییس د نړیوالو مرستو د کمېدا د یادولو تر څنګ ویلي، دغه بنسټ به د امکاناتو له محدودیتونو سره – سره د معلولیت لرونکو کسانو او نورو اړمنو قشرونو ملاتړ ته دوام ورکړي او د اقتصاد وزارت پر همغږۍ به د خلکو د ژوند د ښه کېدا لپاره هڅې وکړي.

دغه راز د اقتصاد وزارت چارسمبالي دین‌محمد حنیف د ناروې کمیټې له فعالیتونو او همکاریو مننه کړې او وایي، چې د پراختیايي او بشري پروژو د اغېزمنې پلي کېدا لپاره د اقتصاد وزارت او کورنیو او بهرنیو بنسټونو ترمنځ همغږي اړینه ده.

هغه د ناروې کمیټې د څلورکلنې سټراټیژۍ پلي کول د افغانستان د خلکو د ژوند د ښه کېدا لپاره اغېزمن ګام وباله او څرګندوي:« مونږ له هغو پروګرامونو ملاتړ کوو، چې د ملي ګټو، اقتصادي ودې، د تلپاتې کاري فرصتونو د رامنځته کولو او د افغانستان د خلکو د هوساینې لپاره وي او د آسانتیا برابروونکي ادارې په توګه به اړینې همکارۍ وکړو.»

ویل کیږي، چې د ناروې کمیټې عمومي رییس د اسلامي امارت له همکارۍ، همغږۍ او مدیریت، په ځانګړي توګه هېواد ته د وروستیو کلونو د راستنو شویو کډوالو د چارو د سمبالښت په برخه کې مننه وکړه او له اقتصاد وزارت سره یې د ګډو همکاریو پر دوام ټینګار وکړ.

د افغانستان برښنا شرکت ویلي، د دغه شرکت د اجرائیوي رییس عبدالحق همکار پر مشرۍ پلاوي د ازبکستان د انرژۍ وزارت له لومړي مرستیال امید محمدامینوف او د دغه هېواد د تخنیکي او انجنیرۍ ادارو له مسوولانو سره د انرژۍ په برخه کې د سټراټیژیکو همکاریو د پراختیا په اړه خبرې کړې دي.

د برښنا شرکت د خبرپاڼې له مخې، په ازبکستان کې د افغانستان سفیر عبدالغفار بحر هم د دواړو هېوادونو ترمنځ د دوه‌اړخیزو اړیکو، متقابلو همکاریو او د انرژۍ په برخه کې د همکاریو پر پراختیا ټینګار کړی دی.

په دې ناسته کې دواړو لوریو د برښنا د تولید، لېږد او وېش شبکو د پراختیا، د تخنیکي وړتیاوو لوړولو، د انجنیرۍ او طرحې په برخو کې د همکاریو، د ځیرکو برښنايي میترونو کارولو، د انرژۍ د اوږدمهاله پلان جوړونې او د افغانستان د برښنا سکټور د عصري کولو په اړه خبرې کړې دي.

د خبرپاڼې له مخې، ازبکستان د افغانستان د انرژۍ سکټور د پراختیا په برخه کې د بشپړې همکارۍ چمتووالی ښودلی او ټینګار یې کړی، چې باثباته او باوري برښنا د افغانستان د اقتصادي ودې، د کانونو پراختیا او صنعتي کېدا لپاره له بنسټیزو اړتیاوو څخه ده.

د ازبکستان چارواکو ویلي؛ همکارۍ به یوازې د برښنا تر صادرولو محدودې نه‌وي، بلکې د تولید، لېږد، وېش او تخنیکي وړتیاوو لوړولو برخې به هم رانغاړي.

د برښنا شرکت اجرائیوي رییس عبدالحق همکار د ازبکستان له وړاندیزونو هرکلی کړی او څرګندوي:« مونږ د افغانستان د انرژۍ سکټور د پراختیا لپاره د ازبکستان وړاندیزونه مهم او ارزښتناک ګڼو. اوس اړتیا ده، چې د دواړو هېوادونو د همکاریو لپاره روښانه او عملي نقشه جوړه او د پلي کېدا پړاو ته وردننه شوو.»

هغه زیاته کړې؛ افغانستان برښنا د تولید په برخه کې پراخو تخنیکي څېړنو ته اړتیا لري او غواړي؛ د هېواد په بېلابېلو سیمو کې د کوچنیو او منځنیو کچو اوبو، لمریزې، ګازي او سکرو پر بنسټ د برښنا تولید پروژو لپاره هر اړخیزې د امکان‌سنجۍ څېړنې ترسره شي، چې د افغانستان لپاره د ملي انرژۍ نقشه جوړه شي.

د نوموړي د څرګندونو له مخې، د افغانستان موخه یوازې د برښنا واردول نه‌دي، بلکې دا هېواد غواړي د برښنا د تولید، لېږد او وېش وړتیاوې پیاوړې کړي.

هغه ویلي، د انجنیرۍ، طرحې، تولید، ګټې اخیستنې او د برښنا د بنسټیزو ودانیو د ساتنې په برخو کې تخنیکي همکارۍ د افغانستان له بنسټیزو اړتیاوو څخه دي.

د برښنا شرکت اجرائیوي رییس همداراز ټینګار کړی، چې د ګډ پلان، پیاوړې تخنیکي همغږۍ او عملي پرېکړو له لارې به د افغانستان د انرژۍ سکټور راتلونکی روښانه او د دواړو هېوادونو اقتصادي اړیکې به هم پیاوړې شي.

په دې ناسته کې دواړو لوریو د سرخان ـ پلخمري د ۵۰۰ کیلوولټه برښنا لېږد پروژې د پرمختګ په اړه هم خبرې کړي او د دې پروژې د ژر او پر وخت پلي کېدا پر اړتیا یې ټینګار کړی دی. دواړو خواوو ژمنه کړې، چې شته ستونزې به د تخنیکي همغږۍ او ګډو همکاریو له لارې اوارې کړي.

د ازبکستان د انرژۍ وزارت لومړي مرستیال هم ویلي، چې د افغانستان د انرژۍ سکټور د پراختیا لپاره به ۱۵ کلن جامع پلان جوړ شي او د تخنیکي څېړنو او د امکان‌سنجۍ له بشپړېدا وروسته به د لومړیتوب لرونکو پروژو تخنیکي جزئیات او لګښتي اټکلونه له برښنا شرکت سره شریک شي.

ویل کیږي؛ دواړو لوریو د ګډو تخنیکي کاري ډلو پر جوړولو، د تجربو او ټکنالوژۍ پر تبادلې، د وړتیاوو پر لوړولو او د افغانستان د انرژۍ سکټور د عصري کولو لپاره د عملي همکاریو پر دوام ټینګار وکړ.

په افغانستان کې د ملګرو ملتونو د نشه‌يي توکو او جرمونو دفتر او د کډوالۍ نړیوالې ټولنې د انساني قاچاق پر وړاندې د مبارزې نړیوالې ورځې پر مناسبت خبرداری ورکړی، چې پرله‌پسې کړکېچونو په افغانستان کې د انساني قاچاق او ښکېلاک خطر زیات کړی او د قربانیانو د مخنیوي، پېژندنې او ملاتړ لپاره یې د همغږو هڅو غوښتنه کړې ده.

د ملګرو ملتونو د نشه‌يي توکو او جرمونو دفتر د خپرې شوې خبرپاڼې له مخې، له ګاونډ هېوادونو څخه د افغانانو پراخ جبري ستنېدا، د کوکنارو پر کرکیلې ولاړ اقتصاد کمزوري کېدا، د بشري مرستو کمښت، طبیعي پېښې او د ښځو او نجونو پر حقونو محدودیتونه د خلکو زیان‌منېدا څو برابره کړې ده.

د دغو بنسټونو د موندنو له مخې، یوازې ۱۱ سلنه راستنېدونکي ثابت کار یا کار و بار لري. په داسې حال کې، چې ۵۶ سلنه کورنۍ د ژوند د لومړنیو اړتیاوو د پوره کولو وس نه‌لري. نږدې نیمایي راستنېدونکي د پورونو او مالي مرستو پر مټ ژوند کوي، چې دا وضعیت د انساني قاچاق، جبري کار او نورو ښکېلاکي او استثماري کړنو خطر زیاتوي.

دواړو بنسټونو ویلي، چې قربانیان اوس هم ناامن کار، جبري مزدوري، جنسي ښکېلاک، د غلامۍ ورته حالتونو او آن د بدن د غړو جبري ایستلو ته اړ ایستل کېږي.

د دوی د څرګندونو له مخې؛ ښځې، ماشومان، راستنېدونکي او پوروړې کورنۍ تر ټولو ډېر له دې ګواښ سره مخ دي.

د ملګرو ملتونو د نشه‌يي توکو او جرمونو دفتر استازي پولیاک اوک سري ویلي، اوسنيو فشارونو د انساني قاچاق او ښکېلاک خطر ډېر کړی او د مخنیوي او ملاتړ د هڅو پیاوړتیا ته جدي اړتیا شته.

همداراز د کډوالۍ نړیوالې ټولنې د افغانستان مشر میهیونګ پارک ویلي: د راستنېدونکو اوسنی شمېر د افغانستان د خلکو له وړتیا لوړ دی او که نړیواله ټولنه پراخ ملاتړ ونه‌کړي، ډېری راستنېدونکي به د کار، استوګنځي او بنسټیزو خدمتونو له کمښت سره مخ شي؛ هغه وضعیت، چې کولی شي خلک د انساني قاچاق د شبکو ښکار کړي.

دواړو بنسټونو له نړیوالې ټولنې غوښتي، چې د سیمه‌ییزو همکاریو، د ملاتړو خدمتونو، د پرله‌پسې معیشتي فرصتونو او د خوندي کډوالۍ لارو پر پراختیا د انساني قاچاق د دې مخ پر زیاتېدونکي ګواښ د کمولو لپاره عملي ګامونه پورته کړي.