د افغانستان له ۱۹ کلنو ټیټ عمره کرکټ ملي لوبډلې د آسیا جام سیالیو په لړ کې سریلانکا ته د ۱۰۶ منډو پر توپیر ماتې ورکړه او په دې سیالیو کې یې خپله درېیمه پرله‌پسې بریا ثبت کړه.

سریلانکا پچه وګټله او لومړی یې د توپ اچونې پرېکړه وکړه.

افغانستان په ۴۹.۵آورونو کې د ټولو لوبغاړو پر سوځېدا ۲۷۵ منډې جوړې کړې.

سبحان زاخېل د توپ‌وهنې په برخه کې وځلېد او پر ۱۱۱ توپونو یې ۱۰۷ منډې وکړې.

عبدالله نادرجان هم پر ۶۴ توپونو ۵۵ منډې جوړې کړې او د افغانستان په بریا کې یې مهمه ونډه ولرله.

سریلانکا ټاکل شوي هدف ته د رسېدا لپاره په ۳۴.۱آورونو کې د ټولو لوبغاړو پر سوځېدا ۱۶۹ منډې وکړې او د ۱۰۶ منډو پر توپیر یې ماتې وخوړه.

نورعلي نیازي د افغانستان لپاره تر ټولو ښه توپ اچونه وکړه او څلور لوبغاړي یې وسوځول. نوموړي په تېره لوبه کې هم د مالیزیا پر وړاندې ښه لوبه کړې وه او شپږ لوبغاړي یې سوځولي وه.

دا په سیالیو کې د افغانستان درېیمه پرله‌پسې بریا ده. د هېواد له ۱۹ کلنو ټیټ عمره لوبډلې له دې مخکې بنګله‌دېش او مالیزیا ته هم ماتې ورکړې وې.

د یکشنبې پر ورځ د افغانستان ۱۷ کلنو فوټبال ملي لوبډلې د ۲۰۲۷آسیایي ملتونو جام ته د لار موندنې سیالۍ د کوربه میانمار پر وړاندې د ۴ پر ۱ له بریا سره پیل کړې.

محمد فهیم حماس د درې ګولونو پر وهلو د دې لوبې غوره لوبغاړی و او طیب قادري هم یو ګول وواهه، چې له دې سره افغانستان په A ګروپ کې خپلې لومړۍ درې نمرې ترلاسه کړې.

طیب قادري په نهمه دقیقه کې د افغانستان لومړی ګول وواهه او شپږ دقیقې وروسته محمد فهیم حماس د افغانستان د ګولونو شمېر دوه ته ورساوه.

حماس په درویشتمه دقیقه کې یو ځل بیا د میانمار دروازه پرانیسته او لومړۍ نیمايي د افغانستان د ۳ پر صفر له بریا پای ته ورسېده.

د افغانستان ملي لوبډلې په دوه‌یمه نیمايي کې هم خپله برلاسي وساتله او حماس د دې نیمايي له پیل څلور دقیقې وروسته خپل درېیم ګول وواهه او هټریک یې بشپړ کړ.

د میانمار لوبډلې په شپږپنځوسمه دقیقه کې د پنالټۍ له لارې یو ګول وواهه؛ خو افغانستان په پای کې دا لوبه ۴ پر ۱ وګټله.

افغانستان په دې سیالیو کې له انډونیزیا، میانمار، فیلیپین او کمبودیا سره په یوه ګروپ کې دی او په خپله راتلونکې لوبه کې به د چارشنبې پر ورځ له کمبودیا سره مخ شي.

د افغانستان اتلانو لیګ روشن د شپږم پړاو په اووه اویایمه لوبه کې آرمان اف‌سي له طوفان هرات څخه دوه پر صفر ماتې وخوړه.

دا لوبه د شنبې پر ورځ د افغانستان د فوټبال فډراسیون په لوبغالي کې ترسره شوه او دواړو لوبډلو د امتیاز ترلاسه کولو لپاره سیالي وکړه.

د آرمان اف‌سي لوبغاړو له پرله‌پسې هڅو سره- سره سیالې لوبډلې ته ګول ورنه‌کړی شو.

دغه راز طوفان هرات په لومړۍ نیمايي کې یو ګول وواهه او د دوه‌یمې نیمايي په وروستیو شېبو کې یې دوه‌یم ګول هم وواهه او په دې توګه یې لوبه د دوه پر صفر پایلې پر ګټلو پای ته ورسوله.

آرمان اف‌سي به په راتلونکې لوبه کې د نومبر پر یوولسمه له ابو مسلم فراه سره مخ کېږي او طوفان هرات به د نومبر پر لسمه له سرسبز یاشلر خوافي سره لوبه وکړي.

د افغانستان اتلانو لیګ روشن د شپږم پړاو ټولې لوبې د آریانا ټلویزیون له لارې پر ژوندۍ بڼه خپرېږي.