تازه خبرونه
په افغانستان کې د وسلهوالو مخالفانو بریدونه کم شوي – ملګري ملتونه
د ملګرو ملتونو عمومي منشي د افغانستان په اړه په خپل نوي راپور کې ویلي، چې په دې هېواد کې د وسلهوالو مخالفانو بریدونه کم شوي دي.
یوناما د جمعې د ورځې په خپور شوي راپور کې لیکلي؛ داعش د روان کال د اګست له لومړۍ نېټې څخه د نومبر تر اوومې پورې د افغانستان په درې ولایتونو کې اته بریدونه کړي. په داسې حال کې، چې د ۲۰۲۲ کال په همدومره وخت کې دې ډلې په شپږ ولایتونو کې ۲۷ بریدونه کړي وه.
ملګرو ملتونو ویلي، چې د روان کال د اګست له لومړۍ نېټې څخه د اکتوبر تر ۲۲ نېټې پورې په افغانستان کې امنیتي پېښې د تېر کال د همدومره وخت پر پرتله دوه سلنه ډېرې شوې دي؛ خو وسلهوالې نښتې ۴۱ سلنه او چاودنې ۷۲ سلنه کمې شوې دي.
د ملګرو ملتونو سرمنشي په خپل راپور کې د افغانستان اقتصادي وضعیت ته هم نغوته ( اشاره) کړې او ویلي یې دي، چې د دغه هېواد اقتصادي وضعیت نازک دی او د وارداتو د زیاتوالي له کبله د سوداګرۍ کسر لوړ شوی دی.
د راپور له مخې؛ ملګرو ملتونو د ۲۰۲۱ کال له ډسمبر څخه د ۲۰۲۳ کال د اوکټوبر تر ۱۵ نېټې افغانستان ته شاوخوا ۳ اعشاریه ۲ میلیارد ډالر نغدې پیسې رالېږلي دي، چې یو اعشاریه څلور میلیارد ډالر یې د روان کال له پیله انتقال کړي دي. دې پیسو د افغانیو په ثبات کې مرسته کړې ده.
ملګرو ملتونو دا خبرداری هم ورکړی، چې په ډېر لږ وخت کې له پاکستان څخه د زیاتو کډوالو راستنېدا به د افغانستان پر اقتصاد سخت فشار راوړي.
د دغه بنسټ د راپور پر بنسټ، په افغانستان کې ښځې او نجونې کولی شي مدرسو ته ولاړې شي؛ خو څرګنده نهده، چې په دې مدرسو کې څومره زدهکوونکي دي او ایا په دغو بنسټونو کې د معاصرو علومو موضوعات تدریسېږي او که نه.
د ملګرو ملتونو عمومي منشي ویلي، په پام کې ده، چې د افغانستان لپاره د یو شمېر هېوادونو د ځانګړو استازو راتلونکې غونډه په مناسب وخت کې جوړه شي او بیا د راتلونکې په اړه ورته د نړیوالې اجماع د ټینګښت زمینه رامنځته کړي.
تازه خبرونه
اسلامي امارت به نړیوالو فشارونو ته تسلیم نشي – مولوي عبدالکبیر
د ریاست الوزراء سیاسي مرستیال مولوي عبدالکبیر د سې شنبې پر ورځ (د غویی یوولسمه) د کابل پولیتخنیک د زدهکړیالانو د فراغت په مراسمو کې څرګنده کړې، چې اسلامي امارت به نړیوالو فشارونو ته تسلیم نشي او نه به د هیچا پر فرمایش کار وکړي.
د کابل پولیتخنیک پوهنتون د زدهکړیالانو د فراغت مراسم د اسلامي امارت د چارواکو په حضور کې ترسره شول؛ خو ډېر پر سیاسي خبرو راڅرخېدل.
نوموړي په دې مراسمو کې زیاته کړې، چې د سیمې ټرانزیټ له افغانستان پرته ناشوني دی او چارسمبالی حکومت ترې ګټه پورته کوي.
د اسلامي امارت دغه لوړپوړي چارواکي ویلي، چې چارسمبالی حکومت له یوې خوا د پروژو پر پلي کېدا او له بلې خوا د کانونو پر استخراج کار کوي.
هغه دغه راز هېواد ته د مهاجرینو د راستنېدو لپاره د شرایطو پر برابرولو هم ټینګار وکړ.
د امربالمعروف او نهی عن المنکر او شکایتونو اورېدو وزارت چارسمبالي محمد خالد حنفي ویلي، اسلامي امارت په هېواد کې د عصري علومو د پراختیا مخالف ندی او غربي هېوادونه د اسلامي امارت پر خلاف په دې اړه منفي تبلیغات کوي.
د لوړو زدهکړو وزارت چارسمبالي ندا محمد ندیم ټینګار کوي، چې اسلامي امارت د جګړې په ډګر کې بریالی شوی؛ د اقتصاد، روغتیا او پوهنې په ډګرونو کې به هم بریاوې ترلاسه کړي.
له بلېخوا د لوړو زدهکړو وزارت یو شمېر نورو چارواکو ويلي؛ دغه وزارت هڅه کوي، چې د علمي او تحصیلي پراختیا په برخه کې پرمختګ وکړي او له نړیوالو معیارونو سره برابر شي.
د کابل پولیتخنیک پوهنتون د فراغت له دې پړاو څخه د ۱۷ څانګو ۵۳۷ زدهکړیالان فارغ شول او د اسلامي امارت د چارواکو لهخوا د فراغت سندونه ورکړ شول.
تازه خبرونه
افغان ـ ترکمن چارواکو په هرات کې د نورالجهاد سب سټیشن چارې وارزولې
د افغانستان برښنا شرکت څرګنده کړې، چې د دې شرکت د رهبرۍ او ترکمن پلاوي ترمنځ د هرات نورالجهاد سب سټېشن د پاتې تخنیکي چارو د ژر بشپړېدو، فعالېدو او پرانیستلو په اړه ګډه ناسته ترسره شوه.
د افغانستان برښنا شرکت عملیاتي رییس عبدالرحمن رحماني په دې ناسته کې ویلي؛ اوسمهال د نورالجهاد سب سټیشن چارې د بشپړېدو په حال کې دي او ټاکل شوې د دواړو لوریو ترمنځ د تخنیکي مسایلو له حل کېدلو وروسته نوموړی سب سټیشن فعال او ګټې اخیستنې ته وسپارل شي.
دغه راز د ترکمنستان نړیوالو پروژو رییس مراد آرتیکوف ویلي؛ د نورالجهاد سب سټیشن چارې د دواړو لوریو ترمنځ په ښې همغږۍ ترسره شوي او ډېر ژر به بشپړې شي.
د آرتیکوف د څرګندونو له مخې؛ ټاکل شوې د تجهیزاتو او نورو تخنیکي مسایلو پروتوکول هم په راتلونکیو ورځو کې تائید او وروستی شي.
ویل کیږي، چې د نوموړې پروژې له پرانیستې سره به هرات ته د ترکمنستان وارداتي برښنا کچه لوړه او زرګونه نوي پېرودونکي د برښنا له انرژۍ څخه برخمن شي.
تازه خبرونه
له ترهګرۍ سره په مبارزه کې له اسلامي امارت سره همکارۍ ته چمتو یوو- ایران
په کابل کې د ایران سفارت د دوشنبې پر ورځ ( د غویی لسمه) د هرات ولایت په یوه جوماتن کې له وسلهوال برید وروسته څرګنده کړې، چې له ترهګرۍ سره په مبارزه کې له اسلامي امارت سره همکارۍ ته چمتو دی.
یاد سفارت دا غبرګون په هرات ولایت کې د شیعهګانو پر جومات له وسلهوال برید وروسته څرګند کړی دی.
دا سفارت دا برید “ترهګریزه پېښه” بولي او په کلکه یې غندلې ده.
د دغه سفارت په خبرپاڼه کې راغلې، چې ايران غواړي د دغه «جرم» عاملين وپېژني او سزا ورکړي.
دغه سفارت زیاته کړې؛ ایران له ترهګرۍ سره د مبارزې په برخه کې له اسلامي امارت سره د همکارۍ د پیاوړتیا لپاره خپل چمتووالی اعلانوي.
د کورنیو چارو وزارت ویاند عبدالمتین قانع ويلي؛ تېره شپه (دوشنبه د ثور لسمه) د هرات ولایت د ګذرې ولسوالۍ په شهرک سیمه کې ناڅرګندو وسلهوال پر لمونځ کوونکیو د کلاشینکوف ډزې کړي، چې ۶ ملکي وګړي یې وژلي او یو بل ټپي دی.
قانع زیاته کړې، چې د دې پېښې جزئیات به وروسته وړاتندې شي.
تر اوسه کومې ډلې یا شخص د دې پېښې مسوولیت پر غاړه ندی اخیستی.
-
تازه خبرونه2 days ago
د بغلان ولایت د غوري سمنټو تولید زیات شوی
-
سیمه ییز خبرونه2 days ago
په عراق کې به همجنسبازان پر۱۵ کاله بند شي –پارلمان
-
تازه خبرونه2 days ago
ترکمنستان د ټاپي پروژې بشپړولو ته ژمن دی – امانوف
-
لوبی2 days ago
په افغانستان اتلانو لیګ کې موج ساحل ۲-۱ سرسبز یاشلر او سورخ پوشان ۶ -۰ میوند مات کړل
-
سیمه ییز خبرونه1 day ago
د دوبۍ واکمن د هوایي ډګر د نوي ټرمینل جوړولو لپاره ۳۵ میلیارډ ډالر تصویب کړل
-
تازه خبرونه2 days ago
له پاکستان څخه دې د افغان کډوالو د جبري ایستلو چټکتیا راکمه شي
-
تازه خبرونه1 day ago
تېر کال د ۳۵ میلیون ډالرو پر ارزښت پراختیايي او بشري پروژې ترسره شوي
-
لوبی22 hours ago
اټک انرژي او موج ساحل د دوشنبې د ورځې لوبې وګټلې