د سی‌بی‌اس نیوز خبري شبکې راپور ورکړی، چې ایران د امریکا د احتمالي بریدونو له وېرې خپلې یو شمېر پوځي او ملکي الوتکې پاکستان او افغانستان ته لېږدولې دي.

د راپور له مخې؛ د ایران ځینې پوځي الوتکې د پاکستان د اسلام‌آباد ترڅنګ د نورخان هوايي اډې کې لیدل شوې دي.

سرچینو سی‌بی‌اس ته ویلي، چې په دغو الوتکو کې یوه د څارنې الوتکه «RC-130» هم لېدل شوې ده.

سی‌بی‌اس همدارنګه راپور ورکړی، چې ماهان هوايي شرکت خپلې ځینې الوتکې د جګړو له پیلېدا مخکې کابل ته لېږدولې وې.

د دې رسنۍ د څرګندونو له مخې؛ د ایران د هوايي حریم له تړل کېدا وروسته دا الوتکې په افغانستان کې پاتې شوې او وروسته د افغانستان او پاکستان ترمنځ د کرښې په اوږدو کې د ترینګلتیاوو له کبله د هرات هوايي ډګر ته لېږدول شوې دي.

دغه راز د اسلامي امارت ویاند ذبیح‌الله مجاهد سي‌بې‌اس ته د خبرو پر مهال په افغانستان کې د ایران د الوتکو شتون رد کړی دی.

همدارنګه پاکستانيو چارواکو هم هغه راپورونه رد کړي، چې ګواکې د ایران پوځي الوتکې د پاکستان په هوايي اډو کې ناستې دي.

د ALIPH ( د کلتوري میراثونو د ساتنې نړیوالې ټولنې یا الف نړیوالې ټولنې) استازو په کابل کې د اطلاعاتو او کلتور وزارت د کلتور او هنر له مرستیال عتیق الله عزیزي سره په لیدنه کې د دې وزارت فرهنګي هڅې ستایلي او د ګڼو فرهنګي پروژو د پيل او دوام ژمنه یې وکړه.

د اطلاعاتو او کلتور وزارت د خپرې شوې خبرپاڼې له مخې؛ نن( دوشنبه د غویي یوویشتمه ) د دې وزارت د کلتور او هنر له مرستیال مولوي عتیق الله عزیزي سره د الف نړیوال بنسټ استازو کارلوس اډوارډو او الکسانډرا فایبیګ او د آغا خان بنسټ د کلتوري برخې مسوول انجنیر میوندي ولیدل.

یادو استازو د لوګر ولایت د مس‌عینک سیمې د آثارو د خوندیتوب او تحکیماتي هڅو، په بامیان کې د یو شمېر پروژو، د غور ولایت منار جام د ساتنې، د هرات د منارونو، د کابل بالاحصار او په نورو ولایتونو کې د تر کار لاندې پروژو یادونه کړې او دا یې د پام وړ بللي دي.

د فرهنګ او هنر مرستیال عتیق الله عزیزي افغانستان ته د یاد بنسټ استازو له راتګ هرکلی کړی او د افغانستان د کلتوري او لرغونو میراثونو د پیاوړتیا او خوندیتوب په برخه کې یې د دې بنسټ هڅې او ملاتړ اړین وباله.

عزیزي ویلي؛ له لسیزو وروسته، په لومړي ځل داسې زمینه برابره شوې، چې د افغانستان د تاریخي آثارو، لرغونو سیمو او کلتوري میراثونو ساتنه وشي؛ نو له نړیوالو بنسټونو تمه ده، چې له سیاسي ملاحظاتو پرته د هېواد د کلتوري میراثونو او تاریخي ابداتو په استحکام او خوندیتوب کې اغېزمن رول ولوبوي.

ویل کیږي، چې د الف نړیوال بنسټ استازو د اطلاعاتو او کلتور وزارت سره د نږدې، منظم او اغېزمن کار او همغږۍ لپاره پر یو روښانه میکانیزم او چوکاټ رامنځته کولو ټینګار وکړ.

افغانستان له ازبکستان څخه غوښتي، چې د دواړو هېوادونو د خصوصي سکټورونو ترمنځ د سوداګریزو اړیکو د پیاوړتیا لپاره د ترمذ په سرحدي بازار کې د همغږۍ او اړیکو یو دفتر رامنځته کړي.

دغه موضوع د افغانستان د صنعت او سوداګرۍ وزارت د وزیر نورالدین عزیزی او د ازبکستان د قره‌قالپاقستان د عالي شورا د رییس امانبای اورینبایوف ترمنځ په مزارشریف ښار کې د لیدنې پر مهال وړاندې شوې ده.

په دې لیدنه کې دواړو لوریو د پنبې، ډبرو سکرو، د افغانستان د تازه او وچو مېوو د صادراتو او د خوراکي توکو د تولید، ساختماني توکو، ګرځندوی، د درملو تولید، د معدني توکو پروسس او په مهمو اقتصادي برخو کې د ګډو پروژو په اړه خبرې وکړې.

ازبک چارواکو خبر ورکړی، چې د صادراتو د ملاتړ او سیمه‌ییزو بازارونو ته د ښه لاسرسي لپاره به په روسیه، قزاقستان او قرغېزستان کې د سوداګرۍ خونې جوړې کړي.

ویل کیږي، چې ازبک پلاوي د خپل سفر پر مهال په مزارشریف ښار کې د خپل هېواد د ملي تولیداتو یو نندارتون هم پرانیستی دی.