تازه خبرونه
په افغانستان کې ۶.۱ درجې زلزلې مړګ و ژوبله مخ پر ډېرېدو ده
نن چارشنبه د افغانستان اسلامي امارت د رییس الوزرا ملا محمد حسن اخوند په مشرۍ په پکتیکا او خوست ولایتونو کې د تېرې شپې د ۶.۱ درجې زلزلې د رامنځته کیدو په اړه بیړنۍ غونډه تر سره شوه.
په دې بېړنۍ غونډه کې پرېکړه وشوه، چې د وژل شويو کسانو له کورنيو سره دې نغدي مرستې وشي او ټپيان دې درملنې ته ولېږدول شي.
چارواکو ته دا لارښوونه هم شوې، چې زیانمنو خلکو ته د خوراکي توکو، جامو، درملو او نورو اړینو توکو رسولو لپاره له ځمکني او هوايي ټرانسپورټ څخه کار واخیسل شي.
د پکتیکا او خوست له زلزله ځپلیو سره د اسلامي امارت مشرتابه د خواشینۍ په پیغام کې راغلي؛ له طبیعي پېښو سره د مبارزې بنسټ، اړوند مسوولین، واليان او عام افغانان دې له خپلو ټولو امکاناتو سره د پيښو ځای ته ځانونه ورسوي او د مرستې لاسونه دې وروغزوي.
د اسلاميۍ امارت مشرتابه له نړیوالې ټولنې، خیریه بنسټونو او ټولو بشرپالو نهادونو څخه هم غوښتي، چې له افغانانو سره په دغه ستر مصیبت کې لاس وکړي او له غم ځپلیو سره هرڅومره چې ممکنه وي خپلې مرستې ونه سپموي.
د پاکستان د بهرنیو چارو وزارت د چارشنبې پر ورځ ویلي، چې له افغانانو هر راز مرستې او ملاتړ ته چمتو دي.
یاد وزارت په ډاګه کړې، د پاکستان حکومت او خلک د افغانستان په پکتیکا ولایت او په شاوخوا سیمو کې د یوې غمجنې زلزلې له کبله د ځاني او مالي زیانونو او یو شمېر نورو ولایتونو کې د سختو سېلابونو له کبله د ژورې خواشینۍ او خواخوږۍ مراتب څرګندوي.
پاکستان دا هم ویلي، چې د دوی اړوند ادارې هڅه کوي، چې له افغانانو سره په همغږۍ کې اړینې مرستې وکړي.
دغه راز د پاکستان لومړي وزیر شهباز شریف تویت کړی، چې په افغانستان کې د زلزلې له کبله د بې ګناه خلکو د مړېنې په اړه خواشینی شوی دی. د پاکستان خلک د خپلو افغان وروڼو په غم او درد کې شریک دي. اړوند چارواکي د اړتیا په دې وخت کې د افغانستان د ملاتړ لپاره کار کوي.
د افغانستان لپاره د اروپايي اتحادیې ځانګړي استازي توماس نیکلسون هم ویلي: اروپایي اتحادیه وضعیت څاري او د اغېزمنو خلکو او ټولنو لپاره اروپايي ټولنه بېړنۍ مرستې همغږې کولو او چمتو کولو ته چمتو ده.
په ورته وخت کې د ملګرو ملتونو د بشري چارو د همغږۍ دفتر ویلي، چې د لټون او ژغورنې عملیات روان دي او د اسلامي امارت د چارواکو لخوا رهبري کیږي.
دغه بنسټ زیاته کړې: له ملګرو ملتونو او بشردوستانه همکارانو څخه غوښتنه شوې، چې د طبیعي پېښو د مدیریت له ادارې سره د سمدستي اړتیاوو په ارزولو او ځواب ویلو کې مرسته وکړي.
د دوی د څرګندونو له مخې، د دغې ادارې بین الافغاني ارزونې ډلې له دې مخکې یو شمېر سیلاب ځپلیو او اغېزمنو سیمو ته ګمارل شوي او په افغانستان کې د ملګرو ملتونو او بشردوستانه هېوادونو ډلې د دې ناورین له ټولو اغېزمنو خلکو سره ژوره خواخوږي څرګندوي.
د اسلامي امارت ویاند ذبیح الله مجاهد تائید کړې، چې له ملي دفاع وزارت سره په همغږۍ کې د سیمه ییزو قطعاتو منسوبین د زلزلې تر ټولو زیانمنو سیمو ته رسېدلي او ټپیان روغتونونو ته لېږدوي.
د طبیعي پېښو پر وړاندې د مبارزې وزارت وايي؛ زلزلې په زرګونه کورونه او حتا څو کلي ویجاړ کړي. د پکتیکا د برمل په ولسوالۍ کې زیاتره ښځې او ماشومان تر نړیدلو کورنو لاندې شول او مړه شوي دي.
د اسلامي امارت د اړوند چارواکو د څرګندونو له مخې؛ د چارشنبې تر غرمې پورې په پکتیکا او خوست ولایتونو کې یوې سختې زلزلې ۹۲۰ تنه مړه کړي او له ۶۰۰ ډېر ټپیان دي.
تازه خبرونه
تېر ۲۰۲۳ کال د افغانستان د خلکو لپاره د سترو ننګونو کال و -راپور
په ۲۰۲۴ کال کې به د افغانستان شاوخوا ۱۵ اعشاریه ۸ میلیون خلک د خوړو د خوندیتوب له بحران او بېړنۍ کچې سره مخ شي.
په افغانستان کې د ملګرو ملتونو ټولنې د ۲۰۲۳ کال د پایلو په کلني راپور کې ویلي، چې په افغانستان کې میلیونونه وګړي له لوږې او خوارځواکۍ سره مخ دي، چې ډېري یې خپلې لومړنۍ اړتیاوې پوره کولی نشي.
ملګرو ملتونو څرګنده کړې، چې بشري ناورین په ۲۰۲۳ کال کې هم دوام درلود او دغه هېواد یوه لسیزه شاه تګ کړی او دا مهال د افغانستان نیمايي وګړي په بې وزلۍ کې ژوند کوي.
د اقتصاد وزارت مسلکي مرستیال عبداللطیف نظري له افغانانو سره د بشري مرستو پر اړتیا ټینګار کوي او زیاتوي، چې دغه وزارت په هېواد کې د فقر او لوږې د ختمولو لپاره مناسب پلانونه لري.
ملګرو ملتونو په راپور کې راغلي، چې له ۲۰۲۱ کال راپدیخوا د اقتصادي تولیداتو کچه یو پر څلورمه راټیټه شوې او د نړیوال بانک د راپور له مخې دا مهال د افغانستان نیمايي نفوس په بېوزلۍ کې ژوند کوي.
دا په داسې حال کې ده، چې ملګرو ملتونو اندېښنه ښودلې او څرګندوي؛ دوی له افغانستان سره د مرستو د دوام لپاره د بودجې له کمښت سره مخ دي.
تازه خبرونه
ملګرو ملتونو تېر کال په افغانستان کې د اوبو ۴۷۰ کیلومټره کانالونه جوړ کړل
د خوړو نړيوال پروګرام ویلي، چې تېر کال يې په افغانستان کې د سيمهييزو ټولنو پر همکارۍ د شاوخوا ٤٧٠ کيلومټرو پر اوږدوالي د اوبو کانالونه جوړ کړي دي.
د دې پروګرام د افغانستان برخې د چارشنبې پر ورځ (د وري نههویشتمه ) په ایکس پاڼه کې لیکلي؛ په افغانستان کې کروندګر اوبو ته له لاسرسي پرته خپل ژوند روان ساتلی نشي.
دغه راز څرګنده شوې؛ د اوبو کانالونو له کروندګرو سره مرسته کړې، چې خپلو کورنیو ته خواړه برابر کړي او خپل اضافي تولیدات او محصولات وپلوري.
د خصوصي سکتورغړي هم وايي؛ د خوړو نړیوال پروګرام لهخوا په هېواد کې د اوبو د مدیریت لپاره د کانالونو له جوړولو هرکلی کوي او څرګندوي، چې د هېواد د اوبو مدیریت کولی شي افغانستان له فقر او اقتصادي بحران څخه وژغوري.
دا په داسې حال کې ده، چې له څو کلونو وچکالۍ وروسته؛ وروستیو اورښتونو د افغانستان کروندګر هیله من کړي، چې راتلونکی کال به ښه حاصلات ولري.
تازه خبرونه
په بیجینګ کې د چین او افغانستان درېیمه اقتصادي ناسته تر سره شوه
په بیجينګ کې د افغانستان اسلامي امارت او د چين ولسي جمهوريت د بهرنيو چارو وزارتونو د اړوند سياسي څانګو پر مشرۍ د بشري مرستو او اقتصادي بيارغونې پر ميکانيزمونو درېيمه ناسته ترسره شوه.
د افغانستان بهرنیو چارو وزارت ویاند عبدالقهار بلخي په ایکس پاڼه کې لیکلي، چې په دې ناسته کې د افغانستان د بهرنيو چارو وزارت پر استازیو سربېره د صنعت او سوداګرۍ، کانونو او پټروليم، د کډوالو او بېرته راستنېدونکیو چارو او د طبيعي پېښو پر وړاندې د امارت وزارت استازو ګډون کړی و.
دغه راز په دې ناسته کې د چين د سوداګرۍ، طبيعي سرچينو، د چين نړيوالې پراختيايي ادارې او نړيوالې همکارۍ ادارو استازو هم برخه اخیستې وه.
د بهرنیو چارو وزارت د څرګندونو له مخې؛ په دې ناسته کې له تېرو دوه نيمو کلونو راپدیخوا د طبيعي پېښو، جبري راستانه شویو کډوالو او روغتيا په برخه کې د مرستو پر میکانیزمونو بیا کتنه وشوه.
افغان پلاوي د چين د مرستو د ګټورتوب لپاره خپل وړانديزونه او سلا مشورې چينايي اړوند لوري ته وړاندې کړل.
چينايي لوري ژمنه کړې، چې له افغانستان سره به د چين بشري مرستې د افغان لوري د اړتياوو او لومړيتوبونو له پام کې نيولو سره تنظيم کړي. دغه راز به له افغانستان سره د جبري راستانه شویو کډوالو د مېشتېدو په برخه کې د چين د سل میلیون يوانو په مرستو کې د افغان لوري وړانديزونه هم په پام کې ونيول شي.
د چين سره صليب ټولنې ژمنه کړې، چې په چين کې به د افغان ماشومانو د زړه ناروغيو د درملنې د بيا پيل زمينه هم برابره کړي.
د عبدالقهار بلخي د څرګندونو له مخې؛ د افغانستان د اقتصادي بيارغونې ميکانيزم په چوکاټ کې د دواړو هېوادونو ترمنځ د سوداګرۍ پر زياتوالي په ځانګړي توګه چين ته د زیاتو افغان توکو د صادرولو د زمينې برابرولو، وړتیا لوړونې او په افغانستان کې د کانونو او معاصرې سوداګرۍ په برخه کې د چين د پانګونې د فرصتونو په اړه هر اړخیزې خبرې وشوې.
دواړو لوريو چين ته د افغانستان د جلغوزو له صادراتو وروسته د انارو د صادراتو زمينې د برابرولو د هرکلی ترڅنګ په افغانستان کې د نفتو د استخراج کچې لوړولو او د لوګر مس عینک کان د استخراج د پيلولو په برخه کې د وروستيو پرمختګونو په اړه خبرې وکړې او ټينګار وشو، چې د چارو د چټکتيا پر طرحو به غور وشي.
افغان لوري د چين پر ملاتړ د افغانستان د حکومت په ګڼو وزارتونو او ادارو کې د ملکي مامورينو د وړتیا لوړونې لپاره له روزنيزو پروګرامونو او افغانانو ته د سکالرشپونو د لړۍ له پراخولو هرکلی وکړ.
ویل کیږي، چې په دې ناسته کې د واخان اقتصادي دهلیز د اهميت او احتمالي ګټو او د دې کوريډور د پرانيستو پر امکاناتو هم بحثونه شوي دي.
-
لوبی4 days ago
د افغانستان اتلانو ليګ د درېيم پړاو سیالیو پچهاچونه پای ته ورسېده
-
ساینس او ټیکنالوژي3 days ago
اپل شرکت د نړۍ د تر ټولو د لوی ګرځند پلورونکي دریځ له لاسه ورکړ
-
سیمه ییز خبرونه5 days ago
پر ایران به د اسرائیلو برید له سخت ځواب سره مخ شي
-
تازه خبرونه4 days ago
د کابل په هوايي ډګر کې د ۲۰۲۱ ز. کال ځانمرګی بریدګر عبدالرحمن لوګری و- امریکا
-
نړۍ2 days ago
امريکا او متحدین یې پر ايران د نورو بنديزونو لګولو هڅې کوي
-
تازه خبرونه3 days ago
ازبکستان، سعودي عربستان او قطر پر افغانستان او افغان – ټرانس پټلۍ خبرې وکړې
-
نړۍ4 days ago
امریکا به پر ایران د اسرائیلو په ځوابي برید کې برخه وانخلي
-
لوبی2 days ago
آریانا ټلویزیون د ۲۰۲۴ پاریس المپیک سیالیو د خپراوي حق ترلاسه کړ