سیمه ییز خبرونه
په بلخ ولايت كې د سبو حاصلات ډېرشوي
د بلخ د كرنې اداره وايي:
پر لپسې اورښت، مناسب اقليم او د سبو كرنې لارو چارو په دې ولايت كې د سبو په حاصلاتو كې ډېروالى راوستى دى.
څرگندونې ښيي، چې همدا اوس په ورځ كې زرگونه كيلو گرامه سابه له بلخ څخه جوزجان ، فارياب او سرپل ته استول كيږي.
گلپي او كرم هغه سابه دي، چې په تېرو كلونو كې د امكاناتو د نشتوالي له كبله له گاونډ هېوادونو راوړل كيدل.
د بلخ د كرنې رياست مرستيال اسدالله ستيغ وايي:
سږ كال د سبو او په تېره بيا گلپيو حاصلات په سلو كې شل زيات شوي او نور اړتيا نه لرو، چې بلخ ته سابه راوړل شي.
اسدالله ستيغ زياتوي، چې:
اوس زرگونه كيلو گرامه سابه له بلخ څخه جوزجان، فارياب او سرپل بازارونو ته وړاندې كيږي.
د مزارشريف اوسيدونكي هم د سبو په زياتوالي خوښي ښيي.
يو شمير سابه پلورونكي وايي:
پر لپسې اورښتونه او د سبو د كركيلې د نويو لارو چارو د عملي كولو له كبله په دې محصولاتو كې زياتوالى راغلى دى.
بلخ په وروستيو كلونو كې د كرني او په ځانگړي توگه د سبو د حاصلاتو لخوا د پام وړ وده كړې ده.
چهاربولك، چمتال او دهدادي د كرنې لپاره مناسبې سيمې دي، چې هركال د بلخ د اوسيدونكيو د اړتيا وړ زر ټنه سابه برابروي.