د افغانستان اسلامي امارت د یکشنبې پر ورځ د اسرائیلو له‌خوا د سومالیا‌لینډ بېلتون غوښتونکي سیمې پر رسمیت پېژندل وغندل او دا یې د یو اسلامي هېواد د وېش او له نړیوال قانون څخه سرغړونه وبلله.

د هېواد بهرنیو چارو وزارت د خبرپاڼې له مخې؛ دا ډول کړنه به د سیمه‌ییزې سولې او ثبات لپاره منفي پایلې ولري.

اسرائیلو د جمعې پر ورځ سومالیا‌لینډ د یو خپلواک دولت په توګه پر رسمیت وپېژاند، چې دا کړنه د ټولو اسلامي او عربي هېوادونو له‌خوا وغندل شوه.

سومالیا‌لینډ، چې په ۱۹۹۱ کال کې له سومالیا څخه د خپلواکۍ د اعلان راپدېخوا رسمي پېژندنه نلري؛ د یوې خپلواکې، سیاسي او امنیتي ادارې په توګه فعالیت کوي، چې مرکزي حکومت نشي کولی پرې کنټرول ولري.

د سومالیا حکومت دا سیمه د خپلې خاورې نه بېلېدونکې برخه ګڼي.

د ایران بهرنیو چارو وزیر سید عباس عراقچي د روسیې په یوه پوهنتون کې د وینا پر مهال ويلي، چې په افغانستان کې خلک باید د خپل برخلیک او د حکومت د بڼې د ټاکلو حق ولري.

د ایرنا خبري سرچینې د څرګندونو له مخې؛ عراقچي روسیې ته د خپل وروستي سفر په لړ کې له یوه پوهنتون څخه د لیدنې پر مهال ویلي، چې د ایران او افغانستان ترمنځ د سرحدي امنیت په ګډون د اوبو، مخدره توکو او مهاجرت ستونزې ناحله پاتې دي.

هغه زیاته کړې: “مونږ باید په افغانستان کې له شته حکومت سره خبرې وکړو، چې وکولی شو دا ننګونې اداره او د ایران او افغانستان د دواړو ملتونو ګټې ډاډمنې کړو. مونږ تر دې دمه په افغانستان کې شته حکومت پر رسمیت ندی پېژندلی او باور لرو، چې په افغانستان کې ټول خلک باید د حکومت د بڼې او خپل برخلیک په ټاکلو کې حق ولري؛ خو مونږ به د افغانستان له حکومت سره خپلې خبرې اترې روانې ساتو.”

د یادونې ده، چې اسلامي امارت ویلي؛ افغانانو په افغانستان کې داسې حکومت جوړ کړی، چې ټول قومونه په کې ځان ویني.