سیمه ییز خبرونه
په شمال ولايتونو كې د واورې په وريدو لارې بندې دي
په تېرو څو ورځو كې د درندې واورې په وريدو د جوزجان ولايت د قوشتپې او درزاب ولسواليو او د سرپل ولايت د بلخاب ولسوالۍ لارې بندې شوې دي. له دې وړاندې د بلخ ، جوزجان ، سرپل او فارياب تر منځ لويې لارې د ترافيكو پر مخ بندې شوې وې.
د جوزجان د فوايد عامې اداره وايي:
ډېرې يخې هوا مو ماشينونه له كاره غورزولي دي.
د جوزجان والي محمد عالم ساعي وايي، چې:
اړوند ادارو بايد له وړاندې څخه په دې برخه كې تدابير نيولي واى.
د جوزجان د فوايد عامې سرپرست رييس عطاالله وايي، چې:
له حده زياتې يخې هوا له ستونزو سره مخ كړي يو.
بل لوري ته د سرپل د بلخاب ولسوال عبدالغني ابراهيم وايي:
د بلخاب ولسوالۍ يوازنۍ لار قوم كوتل د درندې واورې د وريدو له كبله بند شوى، چې په دې ولسوالۍ كې يې د خواركې او سون توكو بيې لوړې كړې دي.
بلخاب ولسوالي د سرپل ولايت په ۱۴۰ كيلو مترۍ كې پرته غرنۍ ولسوالي ده، چې نورې لارې يې د تېر كال د سيلابونو له كبله ورانې شوې دي.