سیمه ییز خبرونه
په كابل كې د ړندو نړيواله ورځ ونمانځل شوه
ړندو ته د خدمتونو د وړاندې كولو موسسې مشره ميرمن بنفشه، چې خپله هم د سترگو له نور بې برخې ده؛ وايي:
تراوسه معلولينو خپل اساسي حقونه نه دي ترلاسه كړي.
د نوموړې په وينا:
يو زيات شمېرمعلولين يوازې يوه هيله لري، چې په ټولنه كې د نورو كسانو په شان ومنل شي.
په كابل كې د ړندو د ځواكمنولو بنسټ مشرې ميرمن بنفشې په لومړي ځل د دوشنبې په ورځ(د تلې ۲۵) د (سپينې لكړې ) يا د ړندو نړيواله ورځ ونمانځله .
دا ورځ له ۵۰ كلونو را پديخوا د ملگرو ملتونو له خوا نمانځل كيږي .
د كار، ټولنيزو چارو، معلولينو او شهيدانو د چارو وزارت مرستياله ثريا پيكان وايي:
معلولينو ته د حكومت او نړيوالو بنسټونو له خوا شوې پاملرنه كافي نه ده.
هغه وايي:
دې قشرته د خدمتونو وړاندې كول يوازې د حكومت او يا په ځانگړي توگه د كار، ټولنيزو چارو معلولينو او شهيدانو وزارت كار نه دى، بلكې خلك او ټولنه هم د دوى په وړاندې مسووليت لري.
د پېنځه كلنو مخكينيو شمېرو له مخې د افغانستان اووه سلنه نفوس معلولين او معيوبين دي.