د افغانستان د سولې لپاره د امریکا پخواني استازي زلمي خلیل‌زاد د پاکستان د دفاع وزیر خواجه آصف وروستیو څرګندونو ته په غبرګون کې نوې پوښتنې راپورته کړې دي.

خواجه آصف تېره ورځ د پاکستان پارلمان ته ویلي، چې پاکستان د سپټمبر د یوولسمې له پېښو وروسته «ځان امریکا ته پر کرایه ورکړی و» او د ترهګرۍ پر ضد جګړه کې یې له واشنګټن سره همکاري کوله.

زلمي خلیل‌زاد دغو څرګندونو ته په نغوته(اشاره) کې ویلي: په داسې حال کې، چې پاکستان له امریکا څخه مالي او پوځي مرستې ترلاسه کولې؛« همهاله یې هغو کسانو ته پناه‌ځایونه برابرول، چې په افغانستان کې د امریکايي ځواکونو پر ضد جنګېدل.»

د امریکا پخواني استازي پوښتنه کړې، چې آیا دا اقدام د یوې «دوه‌مخې لوبې» برخه وه؟ او آیا د پاکستان چارواکو د امریکا مخالفانو ته د پناهځایونو برابرولو په بدل کې له کوم بل ځواک څخه هم امتیاز یا «کرایه» ترلاسه کوله که نه؟

خلیل‌زاد زیاته کړې، چې د دغو پوښتنو ځوابونه کولی شي د افغانستان د جګړې پر مهال د سیمې د سیاستونو نوي اړخونه روښانه کړي.

دا په داسې حال کې ده، چې پرون خواجه آصف د پاکستان پارلمان ته دا هم ویلي، چې په افغانستان کې پخوانۍ جګړې د سیاسي ګټو لپاره ترسره کېدې.

د امریکا د ولسمشر مرستیال جي‌ډي ونس د آذربایجان له ولسمشر الهام علی‌اف سره د یوې ګډې خبري ناستې پر مهال د افغانستان په جګړه کې د باکو له ونډې مننه کړې ده.

جي‌ډي ونس د امریکا د ولسمشر له‌خوا د آذربایجان ولسمشر او خلکو ته د درناوي د څرګندولو تر څنګ ویلي؛ د دواړو هېوادونو اړیکې « د همکارۍ او دوستۍ اړیکې دي، چې ښايي لږ ورته پاملرنه شوې وي؛ خو د امریکا لپاره ډېرې اړینې دي.»

هغه زیاته کړې؛ ښايي ډېر امریکایان ونه‌پوهېږي، چې آذربایجاني ځواکونه له هغو وروستیو کسانو څخه ول، چې افغانستان یې پرېښود.

د نوموړي د څرګندونو له مخې؛ آذربایجان «د تروریزم پر ضد نړیواله جګړه» کې د اړین ملاتړی رول لوبولی او ځواکونه یې په افغانستان کې د امریکا د سمندري ځواکونو تر څنګ جنګېدلي دي.

د امریکا د ولسمشر مرستیال دا ټینګار هم کړی، چې واشنګټن غواړي له دې همکاریو مننه وکړي او د دواړو هېوادونو په اړیکو کې نوی پړاو پرانیزي.

دا په داسې حال کې ده، چې امریکا او آذربایجان په باکو کې د اقتصادي او امنیتي همکاریو په ګډون د سټراټیژیکو همکاریو تړون لاسلیک کړی دی.

د اقتصادي کمیسیون په اوونیزه غونډه کې، چې مشري یې د ریاست‌الوزرا اقتصادي مرستیال ملا عبدالغني برادر کوله؛ د کرنې او مالدارۍ سکټور د پراختیا ملي پالیسي تائید شوه.

د ریاست‌الوزرا د خبرپاڼې له مخې؛ د کرنې او مالدارۍ سکټور میکانیزه کول، د کرنې د څېړنیزو او ترویجي سیسټمونو پراختیا، د کرنې، اوبولګولو او مالدارۍ وده، د اوبولګولو د سیسټمونو مدیریت، په یادو برخو کې د پانګونې ملاتړ او خلکو ته د باکیفیته کرنیزو او حیواني محصولاتو د لاسرسي برابرول د دې پالیسۍ بنسټیزې موخې دي.

په دې غونډه کې د کب‌روزنې د سکټور د پراختیا طرحه هم تائید شوه.

د دغې طرحې له مخې؛ د خصوصي سکټور د پانګونې له لارې به د هېواد په بېلابېلو سیمو کې پر ۶۵۰۰ هکټاره ځمکه د کب‌روزنې ۷۷۰۰ واړه، منځني او لوی فارمونه جوړ شي.

ویل کیږي، چې د دې طرحې له پلي کېدا سره به په مستقیم ډول ۵۰ زره کسانو او په غیرمستقیم ډول ۲۵۰ زره نورو ته د کار زمینه برابره شي.