په ۲۰۲۶ز.کال کې د نشه‌یي توکو پر ضد څه باندې ۲۵ زره عملیات شوي

د افغانستان بهرنیو چارو وزارت ويلي، په ۲۰۲۶ ز.کال کې د نشه‌یي توکو پر ضد څه باندې ۲۵ زره عملیات ترسره شوي؛ د کوکنارو او چرسو تر کښت لاندې ۲۶ زره او ۵۰۰ هکټاره ځمکه له منځه وړل شوې او له ۱۰ زره ډېر شکمن کسان نیول شوي دي.

دغه وزارت د سې‌شنبې پر ورځ په کابل کې د« نشه‌یي توکو پر وړاندې د افغانستان اسلامي امارت مبارزه؛ واقعیتونه او لاسته‌راوړنې» تر سرلیک لاندې د یوې غونډې له جوړېدا خبر ورک، چې د اسلامي امارت د چارواکو، د بېلابېلو هېوادونو د سفیرانو او ډیپلوماټانو او د نړیوالو بنسټونو د استازو پر ګډون جوړه شوې وه.

په دې غونډه کې د کورنیو چارو وزارت د نشه‌یي توکو پر وړاندې د مبارزې مرستیال عبدالرحمن منیر ویلي، چې د عملیاتو پر مهال د کوکنارو او چرسو تر کښت لاندې ۲۶ زره او ۵۰۰ هکټاره ځمکه له منځه وړل شوې، ۱۰ زره او ۶۵ شکمن کسان نیول شوي او د نشه‌یي توکو د پروسس ۳۰۱ لابراتوارونه، د کیمیاوي ګولیو دوه کارخونې او د الکولي مشروباتو ۱۵ کارخونې کشف او تړل شوې دي.

د بهرنیو چارو وزیر امیرخان متقي په دې غونډه کې د نشه‌یي توکو د کښت، تولید، پروسس، قاچاق او کارونې د منع کولو په اړه د اسلامي امارت د مشر د فرمان پلي کول، د نشه‌یي توکو پر وړاندې د حکومت د مبارزې څرګندونه بللې ده.

نوموړي په ګاونډ هېوادونو کې د نشه‌یي توکو پراخ کښت او د هغو قاچاق هم د اندېښنې وړ بللی او ویلي یې دي، چې دې موضوع ته د نړیوالې ټولنې له پاملرنې پرته به د نشه‌یي توکو پر وړاندې مبارزه بشپړه پایله ترلاسه نه‌کړي.

دغه راز د بهرنیو چارو وزارت مالي او اداري مرستیال محمد نعیم د بزګرانو لپاره د بدیل معیشت برابرول، د روغتیايي مرکزونو ملاتړ، تخنیکي همکاري او سیمه‌ییزه همغږي د دې مبارزې د لاسته‌راوړنو د ساتلو لپاره اړین بللي دي.

د غونډې ګډونوالو په پای کې د نشه‌یي توکو پر وړاندې د مبارزې پر دوام، بزګرانو ته د بدیل معیشت د پراختیا او د سیمه‌ییزې او نړیوالې همکارۍ پر دوام ټینګار کړی دی.