د مهاجرینو او راستنېدونکو چارو وزیر مولوي عبدالكبیر په کابل کې د ترکیې د استازولۍ له مشر سادین آی یلدیز سره په لیدنه کې د دوه‌اړخیزو همکاریو د پراخېدا او په ترکیه کې د افغان کډوالو د ستونزو د حل په اړه خبرې وکړې.

د یاد وزارت په هغه خبرپاڼه کې، چې نن(چهارشنبه د غویي درویشتمه) خپره شوې؛ د یلدیز له قوله لیکلي، چې نوموړي ویلي: «افغانستان د ترکیې د حکومت لپاره ځانګړی ارزښت لري او په اوس وخت کې د دولتي مرستو ترڅنګ د ترکیې ځینې نادولتي بنسټونه هم په افغانستان کې د اړمنو خلکو د مرستې او پراختیایي پروګرامونو پر پلي کولو بوخت دي.»

د یلدیز د څرګندونو له مخې؛ ترکیه له یوه باثباته او پر ځان‌بسیا افغانستان څخه ملاتړ کوي او باور لري، چې افغانستان د سیمه‌ییز اتصال په برخه کې اړین ځای لري.

هغه زیاته کړې، چې انقره د افغانستان د ستونزو د حل په اړه له خبرو اترو پلوي کوي او په همدې برخه کې خپلې هڅې روانې ساتي.

نوموړي همداراز ویلي، چې ترکیې یوازې د مالدارۍ په برخه کې د ۲۰ زره افغان وګړو لپاره د کار ویزې صادرې کړې دي او هڅه کوي د ناقانونه کډوالۍ لپاره مناسبې حللارې ومومي.

په دې لیدنه کې مولوي عبدالكبیر د ترکیې له مرستو او همکاریو مننه کړې او څرګندوي؛ د کابل او انقرې اړیکې تل د متقابل درناوي او همکارۍ پر بنسټ پرمختګ کړی او هیله ده، چې دا اړیکې نورې هم نږدې او پراخې شي.

نوموړي ویلي، چې افغانستان د بشپړ امنیت او ثبات په ترلاسه کولو سره ګڼ فرصتونه لري او هڅې روانې دي، چې هېواد د سیمه‌ییز اتصال یو مهم او فعال مرکز وګرځي.

هغه د افغانستان او ترکیې د خصوصي سکټورونو پر همکاریو ټینګار وکړ او د افغان کډوالو ځینو ستونزو ته یې په نغوته کې وویل، چې اسلامي امارت د افغان کډوالو له داوطلبانه راستنېدا ملاتړ کوي.

ویل کیږي، چې مولوي عبدالكبیر یو ځل بیا د افغانستان او پاکستان ترمنځ په خبرو کې د ترکیې له منځګړیتوب څخه د خوښۍ څرګندونه وکړه او ترکیه یې د افغانستان دوست هېواد وباله.

د هلمند ولایت په بغني او باغران ولسوالیو کې درې بابه نوې روغتیایي ودانۍ د له بشپړېدا وروسته رسماً ګټې اخیستنې ته وسپارل شوې.

د عامې روغتیا ریاست د خبرپاڼې له مخې؛ د دې ریاست رییس نقیب الله فاتح ویلي؛ د دغو روغتیایي ودانیو د جوړولو چارې د دې ریاست د انجنیري ډلې او د فیضي بلډرز ساختماني شرکت له لوري معیاري ترسره شوي او له بشپړېدا وروسته اړوندو روغتیایي مسوولانو ته د کارونې لپاره سپارل شوې دي.

نقیب الله فاتح زیاته کړې؛ د یادو روغتیایي مرکزونو له فعالېدا سره به د بغني او باغران ولسوالیو اوسېدونکو ته د لومړنیو او اساسي روغتیایي خدمتونو وړاندې کولو زمینه نوره هم پراخه او د لرې سیمو خلکو ته به د درملنې آسانتیاوې برابرې شي.

ویل کیږي، چې دا ودانۍ د (IOM) مؤسسې پر مالي ملاتړ د شاوخوا ۲۵ میلیون افغانیو پر لګښت جوړې شوې دي.

په ننګرهار ولایت کې سرحدي ځواکونو تورخم ښارګوټي ته نږدې د سلګونو جراحي وسایلو، طبي درملو او د سبو تخمونو د قاچاق له مخنیوي خبر ورکړی دی.

د هېواد په ختیځ کې د ۲۰۱ خالد بن ولید قول اردو له‌خوا په خپره شوې خبرپاڼه کې راغلي، چې دغه محموله د مهمندرې ولسوالۍ په اړوند سیمو او تورخم ښارګوټي ته نږدې د دوه‌یمې سرحدي لوا د درېیم کنډک ځواکونو د کشفي راپورونو او استخباراتي ضد فعالیتونو پر بنسټ کشف او ضبط کړې ده.

د خبرپاڼې له مخې: په دې توکو کې سلګونه جراحي وسایل، بېلابېل درمل او د سبو تخمونه شته، چې له پاکستان څخه افغانستان ته قاچاق کېدل؛ خو امنیتي ځواکونو یې مخه نیولې ده.

په خبرپاڼه کې راغلي، چې نیول شوي توکي به ډېر ژر اړوند قانوني ادارو ته وسپارل شي.