د اطلاعاتو او فرهنګ وزارت د خپرونو مرستیال حیات‌الله مهاجر فراهي پر افغانستان د پاکستان وروستي بریدونه وغندل.

هغه نن په یوه غونډه کې ویلي؛ د دغو بریدونو په پایله کې یو شمېر ملکي وګړي، چې ښځې او ماشومان په کې دي؛ «شهیدان» شوي او ټپیان دي.

فراهي ټینګار کړی، چې د پاکستان بریدونه به د اسلامي امارت له‌خوا بې‌ځوابه پاتې نه‌شي او « اسلامي امارت به په مناسب وخت کې د دغو بریدونو ځواب ورکړي».

دا څرګندونې له هغې وروسته راپورته شوې، چې د دوشنبې د ورځې په لومړیو ساعتونو کې د پاکستان د پوځي رژیم له‌خوا د کونړ او پکتیکا ولایتونو پر ځینو سیمو د هوايي بریدونو راپورونه خپاره شول.

په افغانستان کې د ملګرو ملتونو مرستندویه پلاوي(یوناما) ویلي، چې په کونړ کې د هوايي بریدونو له کبله لږ تر لږه درې ملکي وګړي، چې یو نرینه، یوه ښځه او یوه نجلۍ دي، وژل شوي او څلور نور ټپیان دي.

افغان چارواکو دغه بریدونه غندلي او د بهرنیو چارو وزارت په کابل کې د پاکستان شارژدافیر احضار کړی او هغه ته یې خپله رسمي اعتراضیه سپارلې ده.

افغان چارواکو د پاکستان هغه ادعاوې هم رد کړي، چې ګواکې په پاکستان کې د وسلوالو ډلو بریدونه د افغانستان له خاورې سرچینه اخلي.

د پېښور عالي محکمې په خیبر پښتونخوا کې د طب او غاښونو د څانګو د ۱۴ افغان زده‌کړیالانو جبري ایستل لنډمهاله درولي او اړوند چارواکو ته سپارښتنه شوې، چې په ۱۴ ورځو کې خپل لیکلی ځواب وړاندې کړي.

دغه زده‌کړیالان، چې د افغانانو د ځانګړې ونډې له مخې په څو طبي او غاښونو طب په پوهنتونونو کې منل شوي؛ په خپله دعوه کې ویلي، چې د دوی د منلو بهیر د قانون له مخې ترسره شوی او د پاکستان د لوړو زده‌کړو کمیسیون هم د دوی د ویزو د صادرېدا لپاره د نه‌ممانعت سند ورکړی دی.

د زده‌کړیالانو وکیل په محکمه کې استدلال کړی، چې د پاکستان د طب او غاښونو څانګو شورا له‌خوا د افغان زده‌کړیالانو د منلو د لغوه کولو پرېکړه، دوی ته د خپل دریځ د څرګندولو له فرصت ورکولو پرته او د پاکستان د اساسي قانون د ځینو مادو او نړیوالو ژمنو خلاف شوې ده.

محکمې د یوه لنډمهالي حکم پر صادرولو د دغو ۱۴ زده‌کړیالانو جبري ایستل درولي او اجازه یې ورکړې، چې د راتلونکې محکمې تر پرېکړې پورې خپلې زده‌کړې روانې وساتي.

ټاکل شوې، چې د دې قضیې بله غونډه د اوکټوبر پر دولسمهمه ترسره شي.

د افغانستان بهرنیو چارو وزارت په کابل کې د پاکستان سفارت شارژدافیر احضار کړ او د پاکستاني پوځ له لوري د افغانستان د هوايي حریم د نقض او په کونړ او پکتیکا ولایتونو کې پر ملکي سیمو او تأسیساتو د هوايي بریدونو په اړه یې احتجاج لیک ورته وسپاره.

د افغانستان اسلامي امارت دغه بریدونه د هېواد د ملي حاکمیت او ځمکنۍ بشپړتیا ښکاره نقض بللي او پر کلکو ټکو یې غندلي دي.

اسلامي امارت یو ځل بیا هغه ادعاوې رد کړې، چې ګواکې په پاکستان کې وروستۍ امنیتي پېښې د افغانستان له خاورې پلان دي.

د افغانستان اسلامي امارت ویلي، چې د دا ډول بې‌بنسټه ادعاوو وړاندې کول او د هغو پر بنسټ د پوځي اقداماتو توجیه کول؛ د واقعیتونو د تحریف او د عامه افکارو د مغشوشولو هڅه ده.

اسلامي امارت له پاکستان څخه غوښتي، چې د خپلو امنیتي او سیاسي ستونزو د حل لپاره د نورو هېوادونو پر ملامتولو او د خپلو داخلي ستونزې له بهرني اړخ سره پر تړلو د تمرکز پر ځای، د دغو ستونزو د واقعي لاملونو او خپلو مسوولیتونو پر موندلو او حلولو راوڅرخیږي.