تازه خبرونه
یو شمېر سیاسي ډلې د داوود زي ټاکنه سمبولیکه ګڼي
یو شمېر سیاسي ډلې د ولسمشر لخوا د سیمه ییزې اجماع لپاره د خپل استازي په توګه د عمر داوودزي ټاکنه سمبولیکه ګڼي او باوري دي، چې دا ټاکنه به د سولې پر بهیر هیڅ اغېز ونکړي؛ ځکه حکومت تر اوسه داسې طرحه نلري، چې وسلوال طالبان پرې سولې ته قانع کړي.
د افغان سولې لپاره په کور د ننه او نړیواله کچه د هڅو په بهیر کې ولسمشر محمد اشرف غني تېره ورځ د یوه فرمان له مخې، محمد عمر داوودزی د سولې د سیمه ییزې اجماع لپاره د خپل استازي او د سولې د عالي شورا د دارالانشا د ريیس په توګه وټاکه.
یو شمېر سیاسي ډلې د داوودزي ټاکنه سمبولیکه ګڼي او وايي، چې د سولې له بهیر سره به هیڅ مرسته ونکړي.
د جنبش اسلامي ګوند مرستیال عبدالله قرلق وایي: دا یوه حکومتي او فرمایشي څوکۍ ده؛ ځکه، چې د ښاغلي داوودزي د غلي کولو لپاره یې نوموړی خپل استازی کړ. هغه نه یوازې پر حکومت نیوکې کولې، بلکې ولسمشریزو ټاکنو ته هم یو احتمالي نوماند و.
د نوموړي د څرګندونو له مخې: د هغه دغه څوکۍ؛ ځکه سمبولیکه ده، چې نه مخالفان پرې باور لري او نه هم د سولې پر بهیر اغېز لرلی شي.
د ګلبدین حکمتیار په رهبرۍ د حزب اسلامي ګوند وايي، چې حکومت باید د سولې لپاره خپله اراده نوره هم پیاوړي کړي.
د حزب اسلامي غړی غیرت بهیر وایي: یو شمېر اړخونو ته یو ښه فرصت رامنځته شوی؛ ځکه، چې ښاغلی داوودزی ښه کاري تجربه لري. هغه ته باید د ملاتړ ترڅنګ صلاحیت هم وروسپارل شي او په کارونو کې یې له لاسوهنې ډډه وشي؛ خو مهمه داده، چې: آیا د سولې اراده شته او د منلو وړ طرحه جوړه شوې او کنه؟!
په هند کې د افغانستان پخوانی سفیر شیدا محمد ابدالی په دې باور دی، چې د سولې د خبرو لپاره د دولس کسیز حکومتي پلاوي ټاکنه به د سولې بهیر نور هم پیچلی کړي او نورې ستونزې به راوزیږوي.
د نوموړي د څرګندونو له مخې؛ د ۱۲ کسیزې کمیتې رامنځته کول د حکومت، خلکو او قومونو له ګډون پرته د سولې بهیر اوږدوي او دا کار د هېواد پر زیان دی؛ ځکه، چې ناپېیلي او مطرح خلک د سولې په خبرو کې مرسته کوونکي دي.
د ولسمشرۍ ماڼۍ بیا وايي، چې د سولې بهیر یې ملي کړی او سولې ته د رسیدو لپاره هڅې روانې دي.
د ولسمشر د ویاند مرستیال شاه حسین مرتضوي وایي: ولسمشر غني په تېرو اته میاشتو کې له بېلابېلو شخصیتونو سره لیدلي؛ د سولې بهیر مو ملي او د اجماع له مخې روان ساتل شوی دی.
دا په داسې حال کې ده، چې د افغانستان د سولې لپاره د امریکا ځانګړی استازی زلمی خلیلزاد د سیمې هېوادونو ته په درېیم سفر راوتلی دی.
خبریال: رفیع صدیقي
تازه خبرونه
اسلامي امارت به نړیوالو فشارونو ته تسلیم نشي – مولوي عبدالکبیر
د ریاست الوزراء سیاسي مرستیال مولوي عبدالکبیر د سې شنبې پر ورځ (د غویی یوولسمه) د کابل پولیتخنیک د زدهکړیالانو د فراغت په مراسمو کې څرګنده کړې، چې اسلامي امارت به نړیوالو فشارونو ته تسلیم نشي او نه به د هیچا پر فرمایش کار وکړي.
د کابل پولیتخنیک پوهنتون د زدهکړیالانو د فراغت مراسم د اسلامي امارت د چارواکو په حضور کې ترسره شول؛ خو ډېر پر سیاسي خبرو راڅرخېدل.
نوموړي په دې مراسمو کې زیاته کړې، چې د سیمې ټرانزیټ له افغانستان پرته ناشوني دی او چارسمبالی حکومت ترې ګټه پورته کوي.
د اسلامي امارت دغه لوړپوړي چارواکي ویلي، چې چارسمبالی حکومت له یوې خوا د پروژو پر پلي کېدا او له بلې خوا د کانونو پر استخراج کار کوي.
هغه دغه راز هېواد ته د مهاجرینو د راستنېدو لپاره د شرایطو پر برابرولو هم ټینګار وکړ.
د امربالمعروف او نهی عن المنکر او شکایتونو اورېدو وزارت چارسمبالي محمد خالد حنفي ویلي، اسلامي امارت په هېواد کې د عصري علومو د پراختیا مخالف ندی او غربي هېوادونه د اسلامي امارت پر خلاف په دې اړه منفي تبلیغات کوي.
د لوړو زدهکړو وزارت چارسمبالي ندا محمد ندیم ټینګار کوي، چې اسلامي امارت د جګړې په ډګر کې بریالی شوی؛ د اقتصاد، روغتیا او پوهنې په ډګرونو کې به هم بریاوې ترلاسه کړي.
له بلېخوا د لوړو زدهکړو وزارت یو شمېر نورو چارواکو ويلي؛ دغه وزارت هڅه کوي، چې د علمي او تحصیلي پراختیا په برخه کې پرمختګ وکړي او له نړیوالو معیارونو سره برابر شي.
د کابل پولیتخنیک پوهنتون د فراغت له دې پړاو څخه د ۱۷ څانګو ۵۳۷ زدهکړیالان فارغ شول او د اسلامي امارت د چارواکو لهخوا د فراغت سندونه ورکړ شول.
تازه خبرونه
افغان ـ ترکمن چارواکو په هرات کې د نورالجهاد سب سټیشن چارې وارزولې
د افغانستان برښنا شرکت څرګنده کړې، چې د دې شرکت د رهبرۍ او ترکمن پلاوي ترمنځ د هرات نورالجهاد سب سټېشن د پاتې تخنیکي چارو د ژر بشپړېدو، فعالېدو او پرانیستلو په اړه ګډه ناسته ترسره شوه.
د افغانستان برښنا شرکت عملیاتي رییس عبدالرحمن رحماني په دې ناسته کې ویلي؛ اوسمهال د نورالجهاد سب سټیشن چارې د بشپړېدو په حال کې دي او ټاکل شوې د دواړو لوریو ترمنځ د تخنیکي مسایلو له حل کېدلو وروسته نوموړی سب سټیشن فعال او ګټې اخیستنې ته وسپارل شي.
دغه راز د ترکمنستان نړیوالو پروژو رییس مراد آرتیکوف ویلي؛ د نورالجهاد سب سټیشن چارې د دواړو لوریو ترمنځ په ښې همغږۍ ترسره شوي او ډېر ژر به بشپړې شي.
د آرتیکوف د څرګندونو له مخې؛ ټاکل شوې د تجهیزاتو او نورو تخنیکي مسایلو پروتوکول هم په راتلونکیو ورځو کې تائید او وروستی شي.
ویل کیږي، چې د نوموړې پروژې له پرانیستې سره به هرات ته د ترکمنستان وارداتي برښنا کچه لوړه او زرګونه نوي پېرودونکي د برښنا له انرژۍ څخه برخمن شي.
تازه خبرونه
له ترهګرۍ سره په مبارزه کې له اسلامي امارت سره همکارۍ ته چمتو یوو- ایران
په کابل کې د ایران سفارت د دوشنبې پر ورځ ( د غویی لسمه) د هرات ولایت په یوه جوماتن کې له وسلهوال برید وروسته څرګنده کړې، چې له ترهګرۍ سره په مبارزه کې له اسلامي امارت سره همکارۍ ته چمتو دی.
یاد سفارت دا غبرګون په هرات ولایت کې د شیعهګانو پر جومات له وسلهوال برید وروسته څرګند کړی دی.
دا سفارت دا برید “ترهګریزه پېښه” بولي او په کلکه یې غندلې ده.
د دغه سفارت په خبرپاڼه کې راغلې، چې ايران غواړي د دغه «جرم» عاملين وپېژني او سزا ورکړي.
دغه سفارت زیاته کړې؛ ایران له ترهګرۍ سره د مبارزې په برخه کې له اسلامي امارت سره د همکارۍ د پیاوړتیا لپاره خپل چمتووالی اعلانوي.
د کورنیو چارو وزارت ویاند عبدالمتین قانع ويلي؛ تېره شپه (دوشنبه د ثور لسمه) د هرات ولایت د ګذرې ولسوالۍ په شهرک سیمه کې ناڅرګندو وسلهوال پر لمونځ کوونکیو د کلاشینکوف ډزې کړي، چې ۶ ملکي وګړي یې وژلي او یو بل ټپي دی.
قانع زیاته کړې، چې د دې پېښې جزئیات به وروسته وړاتندې شي.
تر اوسه کومې ډلې یا شخص د دې پېښې مسوولیت پر غاړه ندی اخیستی.
-
تازه خبرونه2 days ago
د بغلان ولایت د غوري سمنټو تولید زیات شوی
-
تازه خبرونه3 days ago
ترکمنستان د ټاپي پروژې بشپړولو ته ژمن دی – امانوف
-
سیمه ییز خبرونه3 days ago
په عراق کې به همجنسبازان پر۱۵ کاله بند شي –پارلمان
-
سیمه ییز خبرونه2 days ago
د دوبۍ واکمن د هوایي ډګر د نوي ټرمینل جوړولو لپاره ۳۵ میلیارډ ډالر تصویب کړل
-
لوبی3 days ago
په افغانستان اتلانو لیګ کې موج ساحل ۲-۱ سرسبز یاشلر او سورخ پوشان ۶ -۰ میوند مات کړل
-
تازه خبرونه3 days ago
له پاکستان څخه دې د افغان کډوالو د جبري ایستلو چټکتیا راکمه شي
-
تازه خبرونه2 days ago
تېر کال د ۳۵ میلیون ډالرو پر ارزښت پراختیايي او بشري پروژې ترسره شوي
-
لوبی1 day ago
اټک انرژي او موج ساحل د دوشنبې د ورځې لوبې وګټلې