د افغانستان د بشري حقونو خپلواک کمیسیون له حکومت، ملي او نړیوالو مرستندویه ادارو غوښتي، چې په بامیان کې د پرونۍ پېښې قربانیان سمدلاسه کابل ته ولېږدوي.

کمیسیون په یو لړ تویتونو کې څرګنده کړې: په بامیانو کې له چاودنې څخه ۱۸ ګړۍ تېرې شوي؛ د ټپيانو د درملنې لپاره د آسانتیاوو د نشتوالي له کبله د دوی کورنیو له دولت څخه غوښتنه کړې، چې دوی دې کابل ته ولېږدول شي.

د بشري حقونو خپلواک کمیسیون له حکومت، ملي او نړیوالو ادارو غوښتي، چې کابل ته د ټپيانو د لېږدولو لپاره بېړنۍ مرسته وکړي.

د بشري حقونو کمیسیون زیاته کړې؛ د دې سازمان د لومړنیو موندنو له مخې، پرون د بامیان په مرکز کې د دوه ماینونو په چاودنه کې۱۸  ملکي وګړي وژل شوي او۵۹ نور ټپیان دي.

1) Bamiyan attack. Almost 18 hours has passed. Families of those injured are calling on the Afghan government to move their loved ones to Kabul for treatment. 14 individuals in particular urgently need to be moved to Kabul now.

— AIHRC (@AfghanistanIHRC) November 25, 2020

دوی ټینګار کړی، چې د دغو چاودنو د ۱۴ ټپیانو روغتیایي حالت د اندېښنې وړ دی.

یاد کمیسیون همدارنګه زیاته کړې، چې د بامیان ښار امنیت باید په پام کې ونیول شي او د ملکي وګړیو مرګ و ژوبله له نړیوال قانون ښکاره سرغړونه او جنګي جرم دی.

تر دې دمه هیچا د دغو چاودنو مسوولیت پر غاړه ندی اخیستی؛ خو وسلوالو طالبانو په کې لاس لرل رد کړي دي.