د امریکا د ځمک‌پېژندنې ادارې د راپور له مخې، نن(شنبه د چنګاښ شپږمه) ماښام د ریښتر پر کچه ۶.۱ درجې زلزلې د افغانستان یو شمېر سیمې ولړزولې.

د راپور له مخې، د دې زلزلې مرکز د بدخشان ولایت د جرم ولسوالۍ ښودل شوی او ژوروالی یې ۲۰۸.۳ کیلومټره و.

تر اوسه د دې زلزلې له کبله د مرګ او ‌ژوبلې یا مالي زیان په اړه کوم راپور نه‌دی خپور شوی.

له افغان شخصیتونو سره د اړیکو کمیسیون رییس شهاب‌الدین دلاور په کابل کې یوې غونډې ته ویلي، چې افغانستان په تېرو ۴۷ کلونو کې له واحد حاکمیت بې‌برخې و؛ خو د اسلامي امارت له واکمنېدو سره دا ستونزه حل شوې ده.

هغه ټینګار کړی، چې اوس له ۴۷ کلونو وروسته په هېواد کې امنیت، واحد حاکمیت، ورورولي او د پرمختګ زمینه برابره شوې ده.

دلاور د عاشورا ورځې ته په نغوته کې ویلي، دا ورځ د جمعې پر ورځ په ټول هېواد کې په بشپړ امنیت سره نمانځل شوې ده.

هغه زیاته کړې؛ دا کمیسیون د افغانانو د خدمت لپاره جوړ شوی او له جلاوطنو سیاستوالو یې غوښتي، چې هېواد ته راستانه شي.

نوموړي ویلي، هیڅ‌څوک نشي کولی د بېرته راستانه کېدونکو کسانو پر ضد مستقیمې ادعاوې مطرح کړي او که کومه حقوقي ستونزه رامنځته شي؛ یوازې همدا بنسټ یې د څېړلو صلاحیت لري.

هغه زیاته کړې، چې له افغان شخصیتونو سره د اړیکو کمیسیون به د حقوقي ستونزو په صورت کې د هغو د حل او فصل چارې پر غاړه واخلي.

شهاب‌الدین دلاور ویلي، چې د اسلامي امارت له بیا واکمنېدا له وخته د روږدو د درملنې د مرکزونو جوړول او د نشه‌یي توکو پر وړاندې په مبارزه کې د پام وړ پرمختګ شوی او د نشه‌يي توکو د روږدو کسانو شمېر هم څرګند کم شوی دی.

نوموړي د اسلامي امارت د نه‌رسمیت پېژندنې نړیوالې موضوع په اړه ویلي، که دی هم د امریکا د چارواکو پر ځای وای؛ نو اسلامي امارت به یې پر رسمیت نه‌وای پېژندلی.

هغه ویلي: «دوی سخته ماتې خوړلې، چې هیڅکله یې نشي هېرولی؛ که مونږ پر رسمیت وپېژني، د خپلو خلکو پر وړاندې به تر پوښتنې لاندې راشي.»

د ټولګټو چارو وزارت ویلي، د سالنګونو لویې لارې اړوند د سویلي سالنګ د ۱۵ کیلومټره سړک د بنسټیزې بیارغونې تړون له ودانیز او سړک جوړونې شرکت سره د څه باندې ۱.۲ میلیارډ افغانیو پر ارزښت لاسلیک شوی دی.

د یاد وزارت د ویاند محمد اشرف حق‌شناس د څرګندونو له مخې؛ دا لاره د اولنګ له سیمې پیلېږي او د جبل‌السراج تر سیمې غځېږي، چې د ۱۵ کیلومټره پر اوږدوالي او ۱۲ مټره پر سور به قیر او بیاورغول شي.

حق‌شناس ویلي؛ په دې پروژه کې د ۵ نویو پلګوټو جوړول، د ۳۳ پلګوټو پراخول او د سړک ترڅنګ د ۶۰۰ مټرو ویالو جوړول هم شامل دي.

د ټولګټو چارو وزیر محمد عیسی ثاني د تړون د لاسلیک پر مهال ویلي، د سالنګونو لویه لار د هېواد له مهمو اقتصادي لارو څخه ده او باید چارې یې له معیارونو سره سمې او پخپل وخت بشپړې شي.

د نوموړي د څرګندونو له مخې؛ دا پروژه د سالنګونو د لویې لارې د اساسي بیارغونې د پراخ پلان یوه برخه ده، چې په سویلي، شمالي او خنجان–دوشي برخو کې روانه ده.

د سالنګونو لویه لار د هېواد له مهمو ټرانسپورټي او ټرانزیټي لارو څخه ده، چې شمالي ولایتونه له پلازمېنې کابل سره نښلوي او د خلکو د تګ راتګ، د سوداګریزو توکو او کرنیزو محصولاتو د لېږد رالېږد په برخه کې مهم رول لري.