تازه خبرونه
مونږ په ملکي او موخه ییزو وژنو کې ښکېل نه یوـ طالبان
طالبانو نن (دوشنبه د سلواغې ۱۳) د یو لړ بهرنیو هېوادونو هغه ادعاوې رد کړې، چې ګني دوی د ملکي وګړیو په وژلو، موخه ییزو وژنو او د بیخبنایي پروژو په ویجاړولو کې ښکېل پاتې دي.
طالبانو په یوه خبرپاڼه کې څرګنده کړې؛ د دوی پالیسي د خبرو اترو له لارې د ستونزو اواری دی او “د افغانستان اسلامي امارت دا ډول تورونه ردوي.”
طالبانو ویلي، چې د ملکي وګړیو او عامه تاسیساتو ساتنه د دوی له دیني او انساني مسوولیتونو څخه یو مسوولیت دی.
د ناټو په ګډون په افغانستان کې د اروپا اتحادیې او یو شمېر بهرنيو سفارتونو استازیو پرون په یوه ګډه اعلامیه کې ویلي وه، چې طالبان په افغانستان کې د ډېري تاوتریخوالي مسوول دي او د ملکي وګړیو په موخه ییزو وژلو کې هم ښکېل پاتې دي.
طالبان بهرني ځواکونه په افغانستان کې د تاوتریخوالي لامل بولي او وایي؛ بهرني اشغال په افغانستان کې د روان کړکیچ یو لوی فاکتور دی، چې له ۲۰ کلونو راپدیخوا افغانان وژل شوي، پر خلکو یوه بې کفایته اداره مسلط شوې او له فاسد رژیم ملاتړ ته دوام ورکوي.
طالبان د اروپایي ټولنې په ګډون یو شمېر بهرني هېوادونه د افغانستان په کړکیچ پړه بولي او په ډاګه کوي، چې بدبختانه دغو هېوادونو په تېرو شل کلونو کې زموږ د ملت پر وړاندې په ناورینونو، ویجاړی ، بمي چاودنو، وژنو او جرمونو کې په مستقیم یا غیر مستقیم ډول دخیل شوي او یو شمېر یې “اوس هم ښکېل دي.” دوی هڅه کوي په افغانستان کې د امریکایي اشغالګرو ځواکونو حضور پراخ کړي او اوسنۍ جګړې ته دوام ورکړي.
طالبان د دوحې تړون پلي کول د امریکا او افغانستان لپاره ګټور بولي او څرګندوي: که د دوحې تړون پلی شي؛ دا به د امریکا، د ښکېلو نورو هېوادونو د ښېګڼې او د افغانانو د خیر لپاره وي. ” که څوک د دوحې کنوانسیون له پامه غورزوي او د جګړې د دوام او نیواک د غزولو لپاره عذرونه جوړوي بیا؛ نو د افغانستان مجاهدین کولی شي پر سرلوړۍ له خپلو ارزښتونو، خاورې، هېواد او حقونو دفاع وکړي. لکه څنګه، چې تاریخ ثابته کړې هم ده.
تر دې دمه بهرنیو هېوادونو او افغان حکومت د طالبانو پر دغه غبرګون څه ندي ویلي.
تازه خبرونه
له افغانستان سره پر ټوله پوله اغزن تار نهغځیږي – ایران
یوه ایراني پوځي چارواکي ویلي، چې له افغانستان سره د ایران پر ټوله پوله اغزن تار نهغځوي، بلکې یوازې په زیانمنونکیو برخو کې به فزيکي خنډونه رامنځته کړي.
د ایران پوځ په ډاګه کړې، چې له څلور مټره کانکریټي دیوال، اغزن تار او کټارو سره د پولې د تړلو پلان به په درې کلونو کې پلي شي.
د ایسنا خبری آژانس د راپور له مخې؛ د ایران پولیسو مرستیال قومندان قاسم رضایي د ختیځو پولو د بندولو د پلان په اړه ویلي: په ځینو شمال لویدیځو او ختیځو سرحدونو کې د پولو له بلې خوا ګواښونه شته، چې مونږ ورسره مقابله کوو.
هغه زیاته کړې؛ د نشهیي توکو قاچاق، انساني قاچاق او ان د ترهګرو نفوذ له دې پولو څخه ترسره کېږي. له همدې کبله پرېیکړه شوې، چې دا سرحدونه په ښه توګه اداره او وڅارل شي.
د یو بل خبر له مخې؛ د ایران کورنیو چارو وزیر اعلان کړی، چې په تېر کال کې څه باندې یو میلیون او ۳۰۰ زره بهرني وګړي خپلو هېوادونو ته ستانه شوي دي.
احمد وحیدي زیاته کړې، چې غیر قانوني وګړي باید له ایران څخه ووځي او دغه هېواد نوي وګړي نه مني.
تازه خبرونه
له افغانستان سره د روغتیا نړیوالې ټولنې همکاري اړینه ده – عبدالسلام حنفی
د ریاست الوزراء اداري مرستیال په کابل کې د روغتیا نړیوالې ټولنې له یوه لوړپوړي چارواکي سره په کتنه کې د لریو پرتو سیمو د کلینیکونو د جوړولو او د څانګوالو یا متخصصینو د روزنې په ګډون په بېلابېلو برخو کې د دې ټولنې د همکاریو غوښتنه وکړه.
د ریاست الوزراء د رسنیو له دفتره په خپره شوې خبرپاڼه کې راغلي، چې په دې کتنه کې عبدالسلام حنفي د اسلامي امارت له واکمنۍ سره د مخدره توکو له توليد او قاچاق سره د مبارزې په ګډون په ټول هېواد کې پر نشهیی توکو د روږدو کسانو د راټولولو او درملنې، د اداری فساد د له منځه وړلو او د امنیت د خوندي کولو پرمختګونو ته په نغوته کې له دې ټولنې وغوښتل، چې د افغانستان څوکۍ دې د اسلامي امارت استازي ته وسپاري او د مدیترانې سیمې د اجرائیوي بورډ او رهبرۍ په غونډو کې د افغانستان غړیتوب بېرته خوندي کړي.
عبدالسلام حنفي دغه راز د کوکنارو د کښت د بدیل برابرولو او له سیلاب ځپلیو سره د مرستې په برخه کې د نړیوالو بنسټونو د همکارۍ غوښتنه وکړه.
دغه راز نوموړي د پولیو پر له منځه وړلو د ټینګار تر څنګ د روغتیا له نړیوالې ټولنې وغوښتل، چې د پولیو د تشخیص لابراتوارونه فعال او واکسین ورکړي، د سرطان د درملنې مرکز جوړ کړي، په ماشومانو کې د خوارځواکۍ مخه ونیسي او د پاکو اوبو د زمینې په برابرولو کې همکاري وکړي.
د اسلامي امارت د اداري مرستيالۍ د خبرپاڼې له مخې، د روغتيا نړيوالې ټولنې د ختيځې مديترانې سيمې مشرې حنان حسن بلخي په دې غونډه کې ويلي، چې د دې ټولنې لپاره روغتيايي موضوع غير سیاسي او د دې ټولنې یو له لومړیتوبونو څخه ده.
نوموړې په بېلابېلو برخو کې د اسلامي امارت لاسته راوړنو ته نغوته وکړه او هیله څرګندوي، چې د روغتیا او پوهنې په برخه کې به د افغانانو لپاره ښه شرایط برابر شي.
میرمن بلخي وایي؛ د روغتيا نړيوالې ټولنې له نورو نړيوالو ټولنو او اروپايي ټولنې سره په ګډه درې کلنه پروژه لري، چې د افغانستان په بېلابېلو ولايتونو کې د روغتيايي مرکزونو جوړول هم په کې شته.
نوموړې دغه راز د پوليو پر وړاندې د مبارزې په برخه کې د اسلامي امارت له هلو ځلو قدردانی وکړ او زياتوي، چې د افغان بزګرانو لپاره د بديل معيشت د برابرولو په اړه به له نړيوالې روغتيايي ټولنې او نورو اړوندو ادارو سره خبرې وکړي.
دا په داسې حال کې ده، چې دې پلاوي په تېرو دوه کلونو کې د عامې روغتیا وزارت د لاسته راوړنو، د افغان روغتیايي پرسونل د ظرفیت لوړولو، د ولسوالۍ کچې روغتونونو د جوړېدو، د روغتیایي سیسټم د پیاوړتیا، دوامداره همکارۍ، د ساري ناروغیو د کنټرول او غوره همغږۍ په اړه د عامې روغتیا له چارسمبالي سره هم بحث او خبرې کړې دي.
تازه خبرونه
د اسلامي همکاریو ټولنې سرمشریزې په افغانستان کې د نجونو پر زدهکړو ټینګار څرګند کړ
په ګمبیا کې د یکشنبې پر ورځ د اسلامي همکاریو ټولنې د پېنځلسمې سرمشریزې ګډونوالو د افغانستان له اسلامي امارت وغوښتل، چې د افغان نجونو او ښځو د زدهکړو او کار کولو حق ته درناوی وکړي.
د دې غونډې په پای کې دوی د زدهکړو او کار حق د افغان نجونو او ښځو له اساسي حقونو څخه وباله او په دې اړه یې د اسلامي امارت له چارواکو سره د نورو ډېرو بحثونو غوښتنه وکړه.
دغه راز د غونډې ګډونوالو په افغانستان کې د هر اړخیزې حکومتولۍ او تلپاتې سولې او ثبات د خوندي کولو لپاره د قومي ډلو، نشهیي توکو، تروریزم او ټولنیزو ستونزو مخنیوي ته د هڅو پر اړتیا ټینګار څرګند کړ.
د اسلامي همکاریو ټولنې د ۵۷ غړیو هېوادونو استازو په دغه کنفرانس کې، چې د تلپاتې پراختیا لپاره د خبرو له لارې د یووالي او پیوستون پیاوړتیا تر سرلیک لاندې جوړه شوې وه، ګډون کړی و.
د یادونې ده، چې په دې غونډه کې د اسلامي امارت یوه پلاوي ګډون درلود.
-
تازه خبرونه2 days ago
په غور کې د سېلابونو له کبله سلګونه خلک بې ځایه شول
-
تازه خبرونه2 days ago
اسلامي امارت په بدخشان کې د اعتراضي لاريون د څېړلو لپاره یو پلاوي وټاکه
-
تازه خبرونه2 days ago
په افغانستان کې پر کوکنارو د بندیز له کبله کروندګرو خپل عاید له لاسه ورکړی – نړیوال بانک
-
لوبی5 days ago
سرخ پوشان خوافي او خدیم د خپلو اړوند سیالیو ګټونکي شول
-
نړۍ1 day ago
اسرائیلي ځواکونو بیت المقدس ته نږدې د الجزیرې پر رسنیز دفتر چاپه ووهله
-
تازه خبرونه1 day ago
د اسلامي همکاریو ټولنې سرمشریزې په افغانستان کې د نجونو پر زدهکړو ټینګار څرګند کړ
-
سوداگري2 days ago
د ترکمنستان د سوداګرو او صنایعو اتحادیې مشر هرات ته سفر وګړ
-
تازه خبرونه5 days ago
داعش له تېرو دوه میاشتو راپدیخوا ۱۵۴ کسانو ته مرګ او ژوبله اړولې ـ راپور