د هوا پېژندنې ادارې د سالنګ په ګډون د هېواد په ۳۲ ولایتونو کې د درندو واورو او بارانونو د ورېدو اټکل کړی دی.

د دې ادارې د څرګندونو له مخې؛ په کابل، هرات، فراه، نیمروز، هلمند، کندهار، بادغیس، فاریاب، جوزجان، بلخ، سرپل، غور، روزګان، دایکند، بامیان، سمنګان، زابل، غزني، پکتیکا، وردګ، خوست، پکتیا، لوګر، ننګرهار، لغمان د سالنګ په ګډون پروان، کاپیسا، پنجشېر، نورستان، کونړ، بدخشان ولایتونو کې له سیلابونو سره د درندې واورې او باران امکان شته.

دا اداره وايي، چې په بېلابېلو سیمو کې د واورې او باران د اورښت کچه له ۱۵ څخه تر ۵۰ ملي مټرو پورې ده.

د هوا پېژندنې ادارې مشر نجیب الله سراج ویلي؛ په هېواد کې اوسنی اورښت د هېواد له لویدیځ او جنوب لویدیځ څخه د راغلو توپانونو او د هوا د پراخو توپانونو پایله ده، چې د هېواد په ځینو سیمو کې د درندو اورښتونو لامل شوی دی. دا په ځینو سیمو کې د سیلابونو او سختو واورو له ګواښ سره مخ دی، چې تر اوسه یې لارې تړلې دي.

له طبیعي پېښو سره د مبارزې وزارت وايي، په یو شمېر هغو ولایتونو کې چې د لارو د بندېدو خطر موجود دی، لومړنۍ مرستې رسولي او هڅې روانې دي چې د منابعو په راټولولو او زیانمنو شویو ولایتونو ته لا ډېرې مرستې ورسوي.

په همدې حال کې له طبیعي پېښو سره د مبارزې وزارت د بېړنۍ کمیتې مشر احمد خان نافع وايي، که څه هم دوی د منابعو له کمښت سره مخ دي؛ خو زیانمنو ولایتونو ته یې د مرستو رسولو چمتووالی نیولی دی.

دغه راز د هغو ولايتونو يو شمېر اوسېدونکي، چې سيمې يې د سختو سيلابونو له ګواښ سره مخ دي وايي، مخکې له دې، چې لارې بندې شي؛ مسوولې ادارې بايد له خلکو سره مرسته وکړي.

د بدخشان ولایت د خاش ولسوالۍ اوسېدونکی فتح الله فرهمند وايي: تر اوسه له خاش ولسوالۍ سره هېڅ ډول مرسته نده شوې.

د کندهار ولايت اوسېدونکي حکيم اغا زياته کړې: اوس زمونږ د کورونو لوریو ته اوبه راغلي او کورونو ته مو رادننه شوي دي . دا ټول د زورواکونو له کبله، چې پاملرنه یې نده کړې.

د کندهار ولايت اوسېدونکی يار محمد وایي؛ دلته یو خندق دی، چې کابل بانک بند کړی دی . تر همدې ځایه اوبه راځي . اسلامي امارت باید دا مشکل حل کړي او د لارې لار خلاصه کړي.  

له دې مخکې نړیوالو مرستندویه ټولنو په افغانستان کې د قحطۍ او لوږې له کبله د یوه بشري ناورین د رامنځته کېدو خبرداری ورکړی و او ټینګار یې کړی، چې په افغانستان کې د وضعیت د کنټرول لپاره باید بشري مرستې ډېرې شي.