د افغانستان د صنایعو او سوداګرۍ وزارت ويلي، د کابل او اسلام‌آباد ترمنځ د نوي تړون له مخې افغان باروړونکي موټر له لنډمهالو اسنادو سره پاکستان ته ننوته او اوس موټر چلوونکي د تګ راتګ لپاره پاسپورټونو او ویزو ته اړتیا نلري.

دوۍ زیاتو، چې د نوې  هوکړې له مخې د پکتیا د ډنډپټان ګمرک  له لارې پاکستان ته  لومړی سوداګریزه  لارې ولېږدول شوه او دا بهیر به نور هم  پراخه شي.

د صنعت او سوداګرۍ وزارت زیاته کړې، چې د نوې هوکړې له مخې د دواړه هېوادونو موټر چلوونکي کولی شي له پاسپورټ او ویزې پرته د سوداګریزو توکو لېږد تر سره کړي.

افغان لوری هیله څرګندوي، چې دا هوکړه به د دې سبب شي، چې د هېواد صادارتي بهیر په پراختیا کې خصوصي سکټور ته اسانتیا وي برابرې کړي.

د صنعت او سوداګرۍ وزارت ویاند عبدالسلام اخوندزاده وایي: مونږ د افغانستان او پاکستان ترمنځ د صادارتو او سوداګرۍ د پراختیا لپاره له پاکسانيو مسوولینو سره داسې هوکړې کړي، چې د روان میلادي کال تر پایه به د دواړو لوريو موټر چلوونکي له ویزې پرته سوداګریز لېږد – رالېږ تر سره کوي.

د افغانستان او پاکستان د ګډې سوداګرۍ خونې اجرائیه رییس نقیب الله ساپي ويلي، چې د افغان سوداګرو سوداګریز توکي پرون پاکستان ته ورسېدل. هیله لرو، چې په روان کال کې د دواړه هېوادونو ترمنځ له ستونزو پرته سوداګري او ټرانزیټ تر سره شي.

د اقتصادي چارو شنونکي که څه هم د افغانستان او پاکستان ترمنځ  نوې هوکړې ته هیله مندي ښيي؛ خو د صنعت او سوداګرۍ له وزارته غوښتنه کوي، چې له پاکستان پرته په  نورو هېوادونو کې هم د افغان توکو لپاره بازرا ومومي، چې له دغه هېواد سره د ستونزو او کړکېچونو پرمهال افغان سوداګر زیانمن نشي.

د اردن پر کوربتوب د منځني ختیځ د سیمه‌ییزفورم (UIC) د کلني پروګرام په درې ورځنۍ ناسته کې د افغانستان د ټولګټو چارو وزارت د اوسپنې پټلۍ مرستیال بخت الرحمن شرافت ګډون وکړ.

د ټولګټو چارو وزارت د څرګندونو له مخې؛ په دې غونډه کې د غړیو هېوادونو استازو د اوسپنې پټلۍ پر خدمتونو، د معیاري کولو، ډیجیټل کولو او برښنایي کولو په اړه خبرې کړې دي.

همدارنګه په بندرونو کې د سوداګریزو کالیو د لیږد پر چټکتیا، زیاتوالي او د اوسپنې پټلۍ پرمختګ ته پر پاملرنه ټینګار شوی دی.

د غړو هېوادونو ترمنځ د اوسپنې پټلۍ غځول، د نویو دهلیزونو جوړول، د لېږد رالېږد چټکتیا او د بیې راټیټول د خبرو اترو مهم ټکي دي.

د ټولګټو وزارت ویاند ویاند محمد اشرف حق شناس وايي، چې په دې غونډه کې د مخابراتو  نوي سیستمونه هم معرفي شوي دي.

د کارپوهانو د څرګندونو له مخې؛ د ټولګټو چارو وزارت هڅه کوي، چې د هېواد په بېلابېلو بندرونو کې د بېخبناوو په ځانګړي ډول د اوسپنې پټلۍ، سړکونو او د سوداګریزو توکو د لېږد رالېږد ټرانسپورټي اسانتیاوې برابرې کړي.

د اقتصادي ډګر یو شمېر نور کارپوهان هم د اوسپنې پټلۍ په غځولو کې پانګونه د هېواد د اقتصاد د ودې او د سیمې له هېوادونو سره د افغانستان د نښلېدا لپاره اړینه بولي.

د هېواد خصوصي سکټور هم په افغانستان کې د صادراتو او سوداګرۍ د ودې لپاره د اوسپنې پټلۍ جوړول اړین بولي او په دې باور دي، چې د اوسپنې پټلۍ پراختیا  د اقتصاد په وده او د هېواد د عوایدو په ډېرولو کې پوره اغېز رامنځته کولی شي.

 د اسلامي امارت د رهبرۍ د حکم له مخي د هېواد ټول هغه اصناف، چې کلنی خرڅلاو يي تر دوه میلیون افغانیو رسیږي؛ له مالیاتو معاف شوي دي.

د ریاست الوزرا اداري مرستیال نن پنجشنبه د غبرګولي لسمه په کابل کې د اصنافو د ثابتې مالیې د معافیت او تخفیف په اړه جوړ شوي خبري کنفرانس ته ویلي، چې په هېواد کې د اصنافو او کسبګرو بېلا بېلو برخو فعالیت کوونکیو لپاره د اسلامي امارت د رهبرۍ د حکم له مخې د ټولو هغو کسبګرو او هټیوالو، چې دوه میلیون افغانۍ کلنی خرڅلاو لري؛ له مالیاتو معاف او له دوه میلیون افغانیو څخه زیات هغه لرونکیو کلنۍ مالیه صفر اعشاریه درې ته راټیټه شوې ده.

 د ریاست الوزرا اداري مرستیال عبد السلام حنفي وایي: د اسلامي امارت د زعیم د حکم پربنسټ ټول هغه اصناف او کسبګر، چې په هېواد کې فعالیت کوي او تر دوه میلیون افغانیو کلنی خرڅلاو لري؛ له مالیاتو معاف کړي، چې هېوادوالو او ولس ته اسانتیاوې رامنځته شي.

د ماليي وزارت مسوولین وايي؛ اسلامي امارت ژمنه کړي، چې ملت او خصوصي سکتور ته اسانتیاوې برابروي.

دغه راز د مالیې وزارت چارسمبالي محمد ناصر د اسلامي امارت د زعیم د حکم پر بنسټ د هغو هټۍ‌والو او کسبګرو، چي کلنی خرڅلاو یې تر دوه میلیون افغانیو پورې وي؛ د ثابتې مالیې له ورکړې څخه په بشپړه توګه معاف دي.

نوموړي زیاته کړې؛ هغه هټۍ‌وال او کسبګر، چې له دوه میلیون ډېر خرڅلاو لري مالیه یې له ۰.۵ سلنې څخه ۰.۳ سلنې ته راکښته شوې ده.

 د ماليي وزارت د مسوولینو د څرګندونو له مخې؛ د اسلامي امارت د رهبر دا فرمان د روان کال له پیل څخه د اجرا وړ دی.

 د ماليي وزارت چارسمبالی وايي؛ په هېواد کې د اسلامي امارت له راتلو سره خصوصي سکټور او اصنافو لپاره ځانګړې اسانتیاوې رامنځته شوي، چې د مالیو د معاف کیدو له دې حکم سره به په هېواد کې د خصوصي سکټور پر عمومي فعالیتونو مثبتي اغېزې زیاتې شي.

 محمد ناصر وایي: د اسلامي امارت له راتلو سره سم مو له خصوصي سکټور سره د توان په کچه په مالیاتو کې همکاري درلوده؛ پر لومړي کال له یو اعشاریه پېنځه څخه ۵ سلنه کړه، پر دوه‌یم کال له ۵ سلنې څخه صفر اشاریه پېنځه کړه په درېیم کال کې مو بشپړ مافیت رامنځته کړ.

 د صنعت او سوداګرۍ وزارت چارسمبالي نورالدین عزیزي ویلي: په هېواد کې ورځ تر بلي د اقتصادي فعالیتونو د پرا ختیا لپاره هڅې رواني دي؛ د رهبرۍ له‌خوا دا مافیت پخپله په هېواد کې د اقتصادي فعالیتوتو د هڅونې لپاره مهم اقدام دی.

د اسلامي امارت یو شمېر مسوولین بیا وايي، چې دا حکمونه په داسې حال کې کیږي، چې د هېواد ټوله بودجه له داخلي عوایدو څخه تنظمیږي او یو اعشاریه شپږ میلیون کسانو ته د اسلامي امارت له‌خوا معاشونه ورکول کیږي.

د اقتصاد وزارت چارسمبالی دین محمد حنیف وایي: سره له دې، چې اسلامي امارت په اوسنیو شرایطو کې د خپلو لګښتونو لپاره زیاتو مالي سرچینو ته اړیتا لري؛ خو له دې سره – سره بیا هم د خپل ولس د اسانتیاوو لپاره په مالیاتو کې مافیتونه رامنځته کوي.

 د لوړو زده‌کړو وزارت چارسمبالي ندامحمد ندیم ویلي: له پیل څخه اسلامي امارت ملت ته د اسانۍ رامنځته کولو او په دنیا کې ورته د ښه ژوند برابرولو هڅې کړي، چې وروستۍ هڅه يي ښه بېلګه ده.

 د اصنافو او کسبګرو ټولنې استازی شیرین اغا سخي وایي: مونږ د اسلامي امارت له دې کړنې هرکلی کوو. له مونږ سره يي د اسلامي امارت له حاکمیت راپدیخوا همکاري کړې او د نورو همکاريو هیله هم لرو.

ویل کیږي، چې په ټول هېواد کې ۲۰۶ ډوله اصناف فعالیتونه لري او له ټولو اصنافو غوښتنه شوې، چې د ماليي وزارت د هر کار کوونکي له‌خوا د بې مورده غوښتنې په صورت کې رسمي شکایت وکړي.