د رییس الوزرا اقتصادي مرستیال ملا عبدالغني برادر آخوند د یکشنبې پر ورځ د نیالګیو کېنولو د کمپاین پر مهال ویلي، چې شل کلنې جګړې د چاپېریال او هوا کیفیت ته ډېر زیانونه اړولي دي.

ملا برادر د کابل ښار په بادام باغ سیمه کې د کرنې، اوبولګولو او مالدارۍ وزارت لخوا د نیالګیو کېنولو ملي کمپاین په مناسبت جوړې شوې غونډې ته ویلي: د څو لسیزو په اوږدو کې د اشغالګرو لخوا له خطرناکو بمونو او کیمیاوي وسلو کار اخیستل شویاو زمونږ د هېواد پر هوا او طبیعت ناوړه اغېز کوي.

ملا برادر نیالګیو کېنولو کمپاین ستایلی او له هېوادوالو او په ځانګړې توګه یې له کابل ښاریانو وغوښتل، چې په خپلو کورونو کې لږ تر لږه یو نیالګی کېنوي او پاللو ته یې پاملرنه وکړي. که دا کار ترسره شي، په راتلونکیو څو کلونو کې به د کابل ټولې غونډۍ او تپې زرغونې شي.

هغه وایي: مونږ ډاډه يوو، چې ډېرې شاړې ځمکې به شنې شي او طبيعت به ترې ګټه پورته کړي.

هغه ویلي: افغانستان يو کرنيز هېواد دى، چې ډېرې اوبه او مناسب طبيعي چاپېريال لري.

هغه زیاته کړې، د دغه ککړ چاپېریال او وژونکیو کیمیاوي موادو له اغېزو د خلاصون یوازنۍ لار د بوټو او ونو کرل او کېنول دي.

په هغه غونډه کې، چې د نيالګيو ايښودلو د ملي کمپاين په مناسبت جوړه شوې وه، برادر له ټولو ښاريانو په ځانګړي توګه د کابل له ښاريانو وغوښتل، چې لږ تر لږه يو نيالګی په خپل کور او باغ کې کېنوي او پالنه يې وکړي.

برادر وایي: دا يوازې د دولت دنده او مسووليت ندى، بلکې د هېواد هر وګړى بايد په دې برخه کې کار وکړي، څو خپل هېواد زرغون او پاک چاپېريال رامنځته شي.

برادر څرګنده کړې: زه ډاډه یم، چې که دا کار وشي، په راتلونکیو څو کلونو کې به د کابل ټولې سیمې زرغونې شي.